128 нафар қурбониёни ҳамлаи террористӣ шуданд

0
124 просмотров

Шумораи қурбониёни ҳамлаи террористӣ дар Покистон, ки рӯзи ҷумъа, 13 июл дар ҷанубу ғарби музофоти Балуҷистон содир карда шуд, ба 128 нафар расид. Ҳамчунин на кам аз 100 каси дигар ҷароҳат бардоштанд. Дар ин бора агентии «Синхуа» бо истинод ба маъмурияти музофоти мазкур хабар медиҳад.

Ба иттилои манбаъ, дар айни  ҳол маҷрӯҳон дар беморхонаҳои гуногун табобат гирифта истодаанд.

Тавре чанде пеш ВАО-и маҳаллӣ хабар доданд, нимаи дуюми рӯзи ҷумъа ҳангоми ба майдони баргузории ҳамоиш омадани мошини яке аз роҳбарони Ҳизби халқии Балуҷистон террористи маргталаб дастгоҳи таркандаи дар баданаш бударо ба кор даровардааст.

Масъулияти ҳамларо гурӯҳи террористии «Давлати исломӣ» /мамнӯъ дар Тоҷикистон/ бар дӯш гирифт.

Тибқи иттилои ВАО-и Покистон, чунин як таркиши дигар рӯзи ҷумъа ба муқобили роҳбари ҳизб дар шимолу ғарби музофоти Ҳайбар-Пахтунхва содир карда шуд, ки дар натиҷа на кам аз 4 нафар қурбон ва 32 каси дигар маҷрӯҳ шуданд.

Ёдовар мешавем, ки 25 июл дар Покистон интихоботи Ассамблеяи миллӣ баргузор мегардад.

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Исломии Покистон Мамнун Ҳусейн барқияи тасаллият ирсол намуданд, ки дар он гуфта мешавад:

«Ҷаноби Олӣ,

Хабари фоҷеабори ба ҳалокат расидан ва ҷароҳати вазнин бардоштани теъдоди зиёди шаҳрвандони кишвар бар асари ҳамлаҳои золимонаи террористон дар Ҷумҳурии Исломии Покистон боиси андӯҳу нафрати беандозаи мо гардид.

Тоҷикистон ин амалҳои ғайриинсонии неруҳои аҳриманро қатъиян маҳкум намуда, зарурати бетаъхири тақвияти муборизаи қотеонаро бо ҳамагуна зуҳуроти терроризм ва ифротгароӣ дар сатҳҳои мухталиф муҷаддадан таъкид менамояд.

Ҳамдардиву тасаллияти амиқи хеш ва тамоми мардуми Тоҷикистонро ба аҳли наздикони фавтидагон изҳор намуда, хоҳони шифои комили ҳамаи осебдидагон ҳастем».

Манбаъ: АМИТ «Ховар»

Нет комментариев

Также рекомендуем

«АвтоВАЗ» выпустил самую дешевую Lada Priora

Волжский автозавод приступил к выпуску удешевленной версии Lada Priora, передает ТАСС. Максимально упрощенная версия машины получила название «Стандарт». Автомобиль оснащен подушкой безопасности, ходовыми огнями, ABS ...