Хонандагони арҷманди Медиапортали «Тироз». Ин навбат меҳмони бахши «Дурахши ситораҳо» яке аз наврасоне, ки новобаста ба хурдсолиаш дар сохаи варзиш маъруфу машхур гардид. Яъне, дар ҳақиқат, дар байни хурдсолон чун ситораи варзиш гардид ва дар олами бузурги варзиш дурахшон гашт. Ӯ ҳамагӣ 8 сол дошта, ба қавле «ҷаҳондида» мебошад. Зеро, дар якчанд мусобиқаву чемпионатҳои ҷумҳуриявӣ ва байналмилалӣ иштирок намудааст. Ӯ Мансур Сабуров мебошад.
Мансур Сабурови хурдҷусса тавонистааст, ки дар сабқатҳои зӯрозмоии универсалӣ ва муҳорибаи тан ба тан чӣ дар Тоҷикистон ва чӣ дар хориҷ 18 маротиба ҷои аввалро соҳиб шавад.
Мансури 8-сола — 18 кило вазн ва 18 медал дорад. Ӯ ин медалҳоро барои ҷои якум дар сабқатҳои зӯрозмоии универсалӣ ва муҳорибаи тан ба тан дар дохил ва хориҷи кишвар ба даст овардааст. Ҳоло ин дастовардҳояш як гӯшаи Литсейи инноватсионии шаҳри Душанберо зеб медиҳанд.
Ин навраси дар зоҳир хурдҷусса мегӯяд, хеле кам иттифоқ афтодааст, ки бидуни дастовард аз майдони набард берун шавад. Мансури хурдсол ба гирифтани медали тилло то ҳадде одат карда, ҳатто назди худ шарт гузоштааст, ки агар дар сабқате барояш нишони ҷои дувум лоиқ дониста шуд, аз баҳри он хоҳад гузашт.
Варзишгари навраси дар зоҳир оромтабиат, замони вориди майдони набард шудан, комилан тағйир меёбад ва бидуни пас гаштан ба рақиби худ ҳамла мекунад. Зеро, ҳадаф дастболо шудан аз ҳарифӣ худ аст. Устодонаш ҳам мегӯянд, ҷасорати нуҳуфта дар ботинашро ғолибиятҳои пай дар пай бедор кардааст. Маҳз ҳамин ҳаракатҳои ба қавли устодон худодод ӯро аз толори варзишии тамрин то ба майдонҳои мусобиқаҳои ҷаҳонӣ бурд.
Мансур Сабуров, яке аз аввалин наврасонест, ки дар синни 8-солагӣ чемпиони ҷаҳон дар намуди варзиши муҳорибаи универсалӣ миёни кӯдакони аз 7 то 9 сола гардид. Ӯ ин унвонро тобистони соли 2015 дар шаҳри Калугаи Русия, маҳалли баргузории мусобиқаи муҳорибаи универсалӣ миёни наврасони 40 кишвари ҷаҳон ба даст овардааст.
Дар ин мусобиқа Мансур Сабуров 4 ҳарифи худро бо ҳисоби 6 бар сифр шикаст дод ва бо гирифтани Ҷои аввал – Чемпиони ҷаҳон шуд. Ӯро дар ин ва дигар мусобиқаҳо устоди риштаи муҳорибаи унверсалӣ Фирдавс Шарифов ҳамроҳӣ кардааст. Устоде, ки ба гуфти Мансур беш аз чор сол ӯро тамрин медиҳад.
18 медал — дастовардҳои Мансурҷони 8-сола
Мансур ҳоло дар синфи дувуми Литсейи инноватсионии шаҳри Душанбе таҳсил мекунад. Омӯзгорон мегӯянд, ӯ танҳо бо тамрини варзиш машғул нест ва дар мактаб низ бо баҳои аъло мехонад. Директори Литсейи инноватсионии Душанбе Одинамоҳ Одинаева мегӯяд: «Мансур миёни хонандагон намунааст чунки, вақте ӯ ба синфи якум омад, аллакай соҳиби медал буд».
Аслан дар хонаводаи Сабуровҳо, ҳатто дар миёни хешовандонашон нафаре варзишгари ҳирфаӣ нест. Модари Мансур — Назира Сабурова мегӯяд, танҳо завқу шавқи писараш онҳоро бетараф нагузошт ва ҳанӯз аз синни 4-солагӣ ӯро ба яке аз толорҳои варзишии Душанбе бурданд, то қувваашро дар роҳи нигоҳдошти солимии худ сарф кунад.
Модар ҳоло дар танҳоӣ ду фарзанди худ — Мансур ва Таҳминаро ба воя мерасонад ва талош дорад, орзуи падари хонаводаро, ки мехост дасти болои писарашро дар мусобиқаҳои ҷаҳонӣ бубинад, амалӣ намояд.
Зеро, падари Мансур — Миралӣ Хоҷаев ҳамагӣ 20 рӯз пеш аз сафари писараш ба мусобиқае, ки Мансур дар он Чемпиони ҷаҳон шуд, аз бемории ногаҳонӣ фавтид. Ин навраси тоҷик, ки дар намудҳои гуногуни варзиши муҳорибаи универсалӣ тамрин мекунад, орзу дорад, теъдоди медалу дипломҳояшро бештар кунад ва дар мусобиқаҳои касбӣ ҳам чемпиони ҷаҳон шавад.
Дар фарҷом аз номи ҳамаи хонандагони бахши «Дурахши ситораҳо»-и Медиапортали «Тироз» ба варзишгари маъруфи наврас Мансурҷон Сабуров дарозумрӣ, саломативу сарбаландӣ ва фатҳи қуллаҳои баланди варзишро таманно менамоем.
Дар симои ӯ кулли кӯдакону бачагони диёрро бо фарорасии Рӯзи байналмилалии ҳифзи кӯдакон табрик намуда, орзу мекунем, ки имрӯзу ҳамарӯз некному саодатманд бошанд!
Исломҷон Бобоев
Нет комментариев