35 шартнома ба имзо расид

0
936 просмотров

Ярмаркаи байналмилалии тиҷорат «Суғд-2016», ки санаҳои 17 – 18-уми июни соли ҷорӣ дар маркази вилоят, шаҳри Хуҷанд баргузор гардид, собит намуд, ки вилояти Суғд тадриҷан ба водии имкониятҳо табдил ёфта истодааст. Ин тадбири муҳим бо ибтикори Мақомоти иҷроияи ҳокимияти давлатии вилоят дар ҳамкорӣ бо Палатаи савдо ва саноати вилояти Суғд сурат гирифта, танҳо дар соли 2016 ин аллакай дуюмин тадбир ва сеюмин ярмаркаи тиҷорат ба ҳисоб меравад. Чорабинии мазкур моҳиятан ба тадбири тиҷоратии байналмилалӣ табдил ёфт, зеро барои иштирок дар ин ҳамоиш аз минтақаҳои гуногуни давлатҳои хориҷӣ ҳавасмандӣ зоҳир намуданд.

Ярмаркаи байналмилалии тиҷорат «Суғд-2016» дар сатҳи баланди омодагиву ташкилӣ ба роҳ монда шуда, дар кори он зиёда аз 260 нафар меҳмонони хориҷӣ бо намояндагӣ аз доираҳои соҳибкорӣ, мақомоти давлатӣ, палатаи савдову тиҷорат, корхонаҳои истеҳсолии Федератсияи Русия, ҷумҳуриҳои Белорус, Лаҳистон, Қирғизистон, Қазоқистон, шаҳри Душанбе, ноҳияҳои тобеи ҷумҳурӣ, вилояти Хатлон иштирок намуданд. Ин аст, ки ярмаркаи тиҷорати «Суғд -2016» сол аз сол густариш меёбад.

Маҳз қабулу татбиқ шудани чунин барномаҳо имконият дод, ки рушди иқтисодиёт таъмин карда шавад. Маҷмўи маҳсулоти дохилии вилоят дар соли 2015 ба маблағи 11,6 млрд. сомонӣ, яъне 106 фисад таъмин гардида, ин нишондод дар 6 моҳи нахусти соли 2016 106,9 дарсадро ташкил дод. Танҳо давоми 2 соли охир зиёда аз 170 корхонаи миёнаву бузурги истеҳсолӣ-саноатӣ таъсис дода шуданд, ки аксаран маҳсулоти воридотивазкунанда истеҳсол менамоянд. Фаъолияти минтақаи озоди иқтисодии Суғд бо пешниҳоди якчанд имтиёзҳои андозиву гумрукӣ, ки алҳол дар он беш аз 27 субъект ба қайд гирифта шудаанд, ба рушди соҳибкории истеҳсолӣ асоси воқеӣ гузошт. Алҳол дар соҳаи истеҳсолот бо сармоягузорони Ҷумҳурии Чин, Федератсияи Русия, Амрико, Туркия, Эрон ва кишварҳои халиҷи Форс ҳамкориҳо ба роҳ монда шудааст. Дар натиҷа суръати афзоиши маҳсулоти саноатӣ дар 5 моҳи соли ҷорӣ ба 130,4 фоиз расонида шуд.

Дар вилояти Суғд иқтидорҳои содиротӣ сол аз сол аз ҳисоби истеҳсоли меваву сабзавот афзоиш меёбад. То ҳамин муддат, яъне моҳи июн беш аз 60 ҳазор тонна пиёз, 4 ҳазор тонна зардолуи тару тоза ба берун аз минтақа содирот шуда, содироти меваи хушк дар соли 2015-ум 15 ҳазор тоннаро ташкил дода буд. Ин иқтидор дар самти истеҳсоли маҳсулоти полезӣ кам нест.

Дар рўзҳои баргузории ярмарка гуфтушуниди тарафҳо, мулоқоти рў ба рў, омода намудани шартномаҳо ҷараён гирифта, натиҷаҳои дилхоҳ ба даст омаданд. Федератсияи Русия аз ҳамкорони стратегии Тоҷикистон аст. Ҳайати бонуфузи он бо намояндагӣ аз доираҳои соҳибкорӣ, истеҳсолӣ, илмӣ дар кори ярмарка иштирок намуданд. Ҳамин тавр, Палатаи савдову саноати вилояти Суғд бо Ширкатҳои «Холидей», «Агротехнология», заводи аппаратураҳои барқии шаҳри Чебоксари Федератсияи Русия, Ширкати сохтмонии «Тиниал»-и вилоят бо Ширкати «Белавина Радмила Владимировна» ва бисёр дигарҳо шартномаи ҳамкорӣ ба имзо расониданд. Ҷамъ 35 адад шартномаи ҳамкорӣ бобати пешниҳоди маҳсулот ба имзо расонида шуд.

Манбаъ: http://sugd.tj/

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: