Ҳаҷми гардиши савдои ҳориҷии вилоят дар ёздаҳ моҳи соли равон ба 1 миллиарду 853,2 миллион доллари ИМА, аз ҷумла воридот 1 млрд 337,8 миллион ва содирот 515,4 миллион доллари ИМА баробар шуд.
Дар сохтори воридоту содирот тағйиротҳои мусбат ба назар мерасанд. Аз ҷумла, суръати афзоиши содирот нисбат ба воридот зиёд шуда, мутаносибан 114,5 ва 94,3 фоизро ташкил намудааст. Нишондиҳандаи мусбати содирот асосан аз ҳисоби содироти маъдан ва консентрат, семент, наҳи пахта ва либосворӣ таъмин гардидааст.
Комёбии назаррас дар самти содирот ба фурўш баровардани семент ба бозорҳои беруна мебошад. Дар ёздаҳ моҳи соли 2018 ба миқдори 435 ҳазор тонна семент ба маблағи 20,2 миллион доллари ИМА содирот карда шуд, ки нисбат ба ҳамин даври соли 2017 мутаносибан 201,1 ҳазор тонна ва 10,5 миллион доллари ИМА зиёд мебошад.
Ҳаҷми содироти маъдан дар ёздаҳ моҳи соли равон ба 369,3 миллион доллари ИМА баробар шуда, дар маҷмўъ 317,8 ҳазор тонна маъдан ва консентрат ба содирот бароварда шудааст. Ҳиссаи ин намуди маҳсулот дар сохтори содирот 71,7 фоизро ташкил додааст.
Инчунин, дар ёздаҳ моҳи соли 2018 ба маблағи 9,5 миллион доллари ИМА маҳсулоти кишоварзӣ содиротгардид. Аз ҷумла, ба маблағи 4,5 миллион доллари ИМА ба миқдори 18668 тонна хушкмева ва ба маблағи 3,4 миллион доллари ИМА ба миқдори 75809 тонна пиёз ба бозорҳои беруна бароварда шудааст.
Манбаъ: Хадамоти матбуоти Раиси вилояти Суғд
Нет комментариев