5 медали хонандагон дар Олимпиадаи ҷаҳонӣ

0
197 просмотров

Аз 21 то 29 июли соли равон  дар шаҳри Лисабони Ҷумҳурии Португалия 49-умин Олимпиадаи ҷаҳонӣ аз фанни физика (49th IPhO 2018) баргузор гардид. Дар он аз Тоҷикистон 5 нафар хонандагони муассисаҳои таҳсилоти миёна иштирок намуда, сазовори ҷойҳои намоён гардиданд.

Тавре аз Вазорати маориф ва илми Ҷумҳурии Тоҷикистон хабар доданд, дар олимпиада зиёда аз 400 нафар довталаб аз 90 давлати дунё иштирок карданд.

Тибқи иттилои Маркази ҷумҳуриявии дарёфт ва рушди истеъдодҳо, дар ҷамъбаст хонандаи синфи 11-и Литсей барои хонандагони болаёқат дар шаҳри Душанбе Сабина Абдураҳмонова, хонандаи синфи 9-и Литсей-интернати тоҷикӣ-русӣ «Ҳотам ва ПВ» дар шаҳри Душанбе Далер Пиров сазовори ҷойи дуюм ва хонандаи синфи 10-и Литсей-интернати тоҷикӣ-русӣ «Ҳотам ва ПВ»  дар шаҳри Душанбе Фараҳманд Ҳасанов сазовори ҷойи сеюм гардида, Парчами Тоҷикистонро  дар байни 90 давлати дунё баланд бардоштанд.

Инчунин,  аз 19 то 29 июли соли равон  дар Ҷумҳурии Словакия ва Ҷумҳурии Чехия  50-умин Олимпиадаи ҷаҳонӣ (50th IChO 2018) аз фанни химия баргузор гардид, ки  дар он   280 нафар довталаб зиёда аз 70 давлати дунё иштирок намуданд.

Дар ин   Олимпиада хонандаи синфи 11-и Литсей барои хонандагони болаёқат дар шаҳри  Душанбе Иномҷон Маҷидов ва хонандаи синфи 11-и муассисаи таҳсилоти миёнаи умумии №3 ноҳияи Спитамен Аҳрор Исмолӣ сазовори медали биринҷӣ гардиданд.

Дар маҷмӯъ, хонандагони тоҷик ин навбат ба кишвар 5 медал (2 нуқра ва 3 биринҷӣ)  оварданд.  Бояд гуфт, ки чунин пирӯзӣ миёни довталабони зиёди 90 кишвар ва тобоварӣ дар рақобат далели равшани вусъати ҳаракати олимпӣ, зиёд шудани таваҷҷуҳи хонандандагон ба илмомӯзӣ ва натиҷаи робитаи устувори мактаб ва оила мебошад.

Бояд гуфт, ки аз аввали соли 2018 хонандагони кишвар дар 16 олимпиадаи байналмилалӣ фаъолона иштирок намуда, сазовори 206 медал, аз ҷумла, 47 медали тилло, 73 медали нуқра ва 86 медали биринҷӣ гардиданд.

Манбаъ: АМИТ «Ховар»

Нет комментариев

Также рекомендуем