50 кишвар дар як сол: Тоҷик ба саёҳати дунё меравад

0
1 389 просмотров

Сайёҳи тоҷик Фарҳод Калонов, ки соли чорум аст лоиҳаи «Мо — тоҷикон»-ро амалӣ менамояд, санаи 1-уми июн худ танҳо бо пойгаи автомобилӣ дар атрофи кураи замин сафар хоҳад кард. Ӯ давоми сол зиёда аз 100 ҳазор километрро паси сар менамояд. Дар ин муддат, сайёҳи тоҷик ният дорад парчами Тоҷикистонро тавассути қаламрави 50 кишвари панҷ қитъаи сайёра гузаронад.

— Ҳаракати ватандӯстонаи «Мо — тоҷикон» — лоиҳаи сатҳи байналмилалӣ аст, ки на танҳо дар Тоҷикистон, балки дар тамоми Осиёи Марказӣ назир надорад. Ҳадаф – бурдану гузаронидани парчами миллӣ дар тамоми роҳи ҳаракат, ташвиқоти тарзи ҳаёти солим, баланд бардоштани шинохти кишварамон, ҷалби сайёҳони хориҷӣ ба Ҷумҳурии Тоҷикистон мебошад, — гуфт Фарҳод.

Сафарҳои пешина аз рӯи лоиҳаи «Мо — тоҷикон», ки соли 2015 оғоз ёфта буданд, бо воситаи мототсикл сурат гирифтанд. Масофаи умумии роҳ дар кишварҳои ИДМ, Туркия, Аврупо, ИМА, Шарқи Дур ва Наздик, бидуни сафар ба кишварҳои ҳамсоя, беш аз 100 ҳазор километрро ташкил дод.

— Ғояи сафар аз сайёҳат сар зад. Ман дар гузашта аксар вақт сафар мекардам, вале ҳадафи асосӣ набуд. Барои роҳати худ сафар мекардам. Ва бо гузашти вақт фаҳмидам, ки имконияти маҳдудиятҳои худро васеъ бояд намуд. Чизи беҳтарро наёфтам аз он ки ин корро зери шиори ватандӯстона ба сомон расонам. Ҳамин тавр, лоиҳаи «Мо — тоҷикон» тавлид шуд. Давоми се сол 4 пойгаи мототсиклӣ гузаронидем, — гуфт ӯ.

Дар мавсими нав Фарҳод қарор дод, ки дар гирду атрофи тамоми ҷаҳон гардад.

— Лоиҳаи мазкур 50 кишвар, наздик ба 1000 шаҳр, тахминан 100 ҳазор километр роҳро фаро мегирад. Чунин лоиҳаро дар кишварҳои Осиёи Марказӣ то ба имрӯз касе амалӣ накардааст, ба истиснои як нафар сайёҳи Қазоқистон, ки гирду атрофи ҷаҳонро бо мототсикл гаштааст, — гуфт ӯ.

Ин навбат Фaрҳод Kaлонов қарор дод, ки на бо мототсикл, балки бо мошин ба сафар барояд.

— Сабабҳои зиёди интихоби автомобил вуҷуд доранд. Яке аз онҳо – қисме аз сафар ба фасли зимистон рост меояд, вақте ки бо мототсикл ҳаракат намудан ғайриимкон мешавад, аммо гузаронидани зимистонро дар ягон ҷое кас намехоҳед. Варианти дигар низ вуҷуд дошт — интихоби чунин хатсайре, ки ба даври зимистон нафарояд. Аммо ин роҳ низ рад карда шуд. Бо мошин сафар кардан боз ҳам осонтар аст. Аз таҷрибаи худ медонам, ки сафар бо мототсикл дар масофаи дур чӣ қадар душвориҳо дорад. Агар Шумо сахт хаста шудед ва ин албатта рӯй медиҳад, яъне эҳтимолияти зиёди рӯбарӯ шудан ба мушкилот вуҷуд дорад. Дар вақти пойгаи «Километри некӣ» соли 2017 ҳангоми бозгашт аз Владивосток ман хеле хаста шудам, аз сардӣ хунук хӯрдам ва бо «КамАЗ» ба садамаи нақлиётӣ фаромадам. Бо латхӯрии қабурғаам ҷароҳати вазнин бардоштам ва табобатро дар хона идома додам, — гуфт Фарҳод.

Мошини Toyota Land Cruiser 76-ро байкерони тоҷик ва акнун сайёҳи автомобилӣ, чунон муҷаҳҳаз намуданд, ки дар он имконияти зиндагӣ кардан, хоб рафтан, тайёр намудани хӯрок, ҳатто оббозӣ кардан мавҷуд аст, чунин як хонаи хурдакак дар болои чархҳое, ки дар он як соли ҳаёти худро гузаронидан мумкин аст. Ин имкон медиҳад, ки маблағро барои меҳмонхонаҳо ва хӯрок сарфа намоед.

Фарҳод Калонов инчунин дар бораи бартариятҳои автомобилаш сухан кард.

— Toyota Land Cruiser 76-ро шикорчиён ва дӯстдорони сайру сайёҳати табиат хеле дӯст медоранд. Ин мошини хеле оддӣ буда, бо сӯзишвории дизелӣ ҳаракат мекунад. Сарфи сӯзишворӣ  — 12 литр дар масофаи 100 км. Дар муқоиса бо вазнаш ин хеле кам аст. Он – маҳз ҳамон мошине аст, ки метавон бо воситаи он ба гирду атрофи ҷаҳон сафар кард, — гуфт ӯ ва қайд намуд, ки барои ин сафар се моҳ инҷониб омодагӣ мебинад.

— Ман 5 сол инҷониб ба саёҳат мебароям, таҷриба дорам. Ҳама чизро қаблан омӯхтаам ва рӯз ба рӯз ба нақша гирифтаам. Масалан, медонам, ки баъди 67 рӯз ё 109 рӯзи сафар дар куҷо хоҳам буд. Ҳамааш мантиқан омӯхта ва амик шудааст. Маблағро ҳисоб кардам, барои роҳ, хӯрок, маводи сӯзишворӣ, раводид, паром, трансферҳо чӣ қадар харҷ мешавад, — мегӯяд Фарҳод.

Дар муқоиса бо сафарҳои гузашта, ин навбат касе аз шарикони Фарҳод хоҳиши бо ӯ рафтанро изҳор накард.

— Одамон барои тамоми сол аз ҳаёти оилавӣ ҷудо шудан, метарсанд, — мегӯяд Фарҳод. — Дар асл, ин тавр нест. Шумо аз ҳаёт ҷудо намешавед, балки шояд нисбат ба ҳаёти муқаррарие, ки аз рӯи принсипи «хона-кор-хона» зиндагӣ мекунед, бештар зиндагии ҷолибу шавқоварро аз сар мегузаронед. Дӯстоне, ки пештар маро дар сафарҳои мототсиклӣ дастгирӣ мекарданд, ба воя расида, соҳиби оилаи худ шуданд. Барои ҳамин, ман онҳоро мефаҳмам. Худи ман шахси ғайриоддӣ, оилаам низ ҳамин тавр аст, дастгирии пурраи оилаам ҳаст, ман пушту паноҳи хеле боэътимод дорам. Аз ин рӯ, далерона пеш меравам.

Фарҳод гуфтааст, ки бори аввал дар таърихи Тоҷикистон сафари ҳисоботии худро дар атрофи ҷаҳон 1-уми июн аз майдони Исмоили Сомонӣ (агар ҳукумат иҷозат диҳад) оғоз менамояд.

Ӯ ба тамоми нияти устувори худ назари нек дорад.

— Нисфи роҳ бароям шинос аст, — мегӯяд ӯ. — Аммо намедонам, ки дар Африқо ва Амрикои Ҷанубӣ чӣ рӯй медиҳад. Кишварҳои гуногун, эҳтимол дар он ҷо мушкил бошад. Бо вуҷуди ин, ман ҳамеша ба беҳтарӣ умед дорам, зеро некию хубиро мебарам.

Ӯ ин суханонро беҳуда ва бе сабаб намегӯяд. Сухан дар он аст, ки Ташкилоти ҷамъиятии «СИДА» — Маркази дастгирии волидони кўдакон бо аломати бемории «Дауна» сайёҳи тоҷикро Сафири паёми некӣ интихоб кардааст. Бинобар ин, аксияи ӯ на танҳо хислати ватандӯстона, балки хайриявӣ низ ба шумор меравад.

— Паёми некиро ба ҳамаи мардуми сайёра мерасонам, ки кўдакон бо аломати бемории Дауна – ба монанди ҳар нафари дигар ҳамон аъзои ҷомеа мебошанд, — таъкид дошт ӯ.

Фарҳод Калонов пойгаи автомобилиро дар саросари ҷаҳон гузаронида, мехоҳад дар амалишавии ташаббуси Президенти Ҷумҳурии Тоҷикистон Эмомалӣ Раҳмон, ки соли 2018-умро дар Тоҷикистон «Соли рушди сайёҳӣ ва ҳунарҳои мардумӣ» эълон кардааст, саҳми худро гузорад.

Мавод дар тарҷума аз матлаби Сомонаи «Открытая Азия онлайн» омода гарид.

Нет комментариев

Также рекомендуем