Мақомоти иҷроияи ҳокимияти давлатии вилояти Суғд ба масъалаҳои солимгардонӣ ва истироҳату фароғати кўдакон таваҷҷуҳи хоса зоҳир намуда, барои ҷалби кӯдакони ятиму бепарастор ва аз оилаҳои камбизоат ба истироҳатгоҳҳо тадбирҳои мушаххасро амалӣ менамояд.
Дар назар аст, ки дар давраи тобистони соли ҷорӣ ба чорабиниҳои солимгардонӣ дар лагерҳои беруназшаҳриву наздимактабӣ, истироҳатию меҳнатӣ, солимгардонӣ ва машғулиятҳои меҳнатӣ ва лагерҳои варзишӣ-беҳдоштӣ зиёда аз 75000 нафар кўдакону наврасон фаро гирифта шаванд. Аз шумораи умумии кӯдакону наврасоне, ки ба истироҳат фаро гирифта мешаванд, беш аз 1000 нафарашон кўдакони ятиму бепарастор ва беш аз 7600 нафар аз оилаҳои камбизоат мебошанд ва онҳо ройгон ба истироҳатгоҳҳо ҷалб мешаванд.
Ҷоизи зикр аст, ки бо таваҷҷўҳ ва дастгирии мақомоти иҷроияи ҳокимияти давлатии вилоят дар давраи таътили зимистонаи соли 2018-ум 100 нафар кўдакони ятиму бепарастор ва 200 нафар ғолибони озмуну олимпиадаҳои вилоятӣ ва ҷумҳуриявию байналмилалӣ ройгон ба истироҳату фароғат ҷалб карда шуданд ва ин тадбирҳо минбаъд низ идома дода мешавад.
Манбаъ: Хадамоти матбуоти Раиси вилояти Суғд
Нет комментариев