Ба муносибати Рӯзи кормандони соҳаи тиб дар Кохи фарҳанги ба номи Абӯабдуллоҳ Рӯдакии маркази вилоят бо иштироки Раиси вилояти Суғд Раҷаббой Аҳмадзода ҷамъомади тантанавӣ баргузор гардид.
Раиси вилоят Раҷаббой Аҳмадзода зимни суханронии худ кулли кормандони соҳаи тибби вилоятро бахшида ба иди касбиашон,ки ба рўзи мавлуди алломаи Машриқзамин, падари табибони олам Шайхурраис Абўалӣ ибни Сино рост меояд, табрик гуфт. Таъкид гардид, ки табибони вилоят иди касбии хешро бо шукргузорӣ аз сиёсати пешгирифтаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо дастовардҳои назарраси меҳнатӣ истиқбол гирифта, баҳри боз ҳам баланд бардоштани сифати хизматрасонии тиббӣ кўшиш ба харҷ дода истодаанд.
Раиси вилоят иброз дошт, ки бо дастру ҳидоятҳои Пешвои миллат муҳтарам Эмомалӣ Раҳмон мақомоти иҷроияи ҳокимияти давлатии вилоят пайваста барои баланд бардоштани мақоми табибон ва беҳтар гардидани сатҳу сифати хизматрасонии тиббӣ ба аҳолӣ тадбирҳои амалӣ меандешад. Ин аст, ки агар дар соли 2003 аз буҷети вилоят барои соҳаи тандурустӣ ҳамагӣ 9,4 миллион сомонӣ маблағ ҷудо шуда бошад, пас ин нишондиҳанда дар соли 2018-ум ба 391 миллион сомонӣ баробар шуд, ки нисбати понздаҳ соли пеш қариб 42 маротиба зиёд мебошад. Ҳамзамон, дар нимсолаи аввали соли равон аз буҷети вилоят ба соҳаи тандурустӣ 172,9 миллион сомонӣ маблағ ҷудо карда шудааст, ки нисбат ба ҳамин давраи соли гузашта 21,8 фоиз зиёд аст.
Иттилоъ дода шуд, ки имрӯзҳо бо дастгирии Ҳукумати Ҷумҳурии Тоҷикистон сохтмони биноҳои нави Беморхонаи ноҳиявии №3-юми ноҳияи Бобоҷон Ғафуров, шўъба дар таваллудхонаи шаҳрии шаҳри Панҷакент, шўъбаи ҷарроҳии Беморхонаи шаҳри Конибодом ва шўъбаи таваллуди Беморхонаи марказии ноҳияи Деваштич, бинои нави Беморхонаи минтақавии Ҷамоати деҳоти Урметани ноҳияи Айнӣ, Беморхонаи марказии ноҳияи Куҳистони Мастчоҳ, инчунин 15 Маркази саломатӣ дар ноҳияҳои Деваштич, Ҷаббор Расулов, Мастчоҳ, 21 бунгоҳҳои саломатӣ дар шаҳрҳои Панҷакенту Истаравшан ва ноҳияҳои Айнӣ, Ашт, Кўҳистони Мастчоҳ ва Деваштич идома дорад.
Бо мақсади сазовор истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон бо маблағгузорӣ аз ҳамаи сарчашмаҳо сохтмон, таъмир ва азнавсозии 267 иншооти тандурустӣ ба маблағи 165,7 миллион сомонӣ ба нақша гирифта шуда, дар ин самт корҳо аллакай оғоз гаштаанд. Аз ҷумла, рӯзи гузашта бо ба бунёди бинои нави табобатии Маркази бемориҳои дил ва ҷарроҳии дилу рагҳои вилоят ба номи профессор Амонулло Орифов санги асос гузошта шуд.
Масъалаи таъминоти муассисаҳои тиббӣ бо мутахассисони дорои маълумоти олӣ ва миёнаи тиббӣ яке аз масъалаҳои аввалиндараҷаи соҳа маҳсуб ёфта, аз оғози сол то имрўз 61 нафар мутахассисони дорои маълумоти олии тиббӣ, аз ҷумла 34 нафар мутахассисони ҷавон тибқи роҳхати Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба кор қабул гаштаанд. Дар маҷмӯъ имрӯзҳо ба аҳолии вилоят 5025 нафар табибон ва 16 ҳазору 659 нафар кормандони миёнаи тиббӣ ва 6359 кормандони хурди тиб хизмати тиббӣ расонида истодаанд.
Ҳифз ва таъмини беҳдошти саломатии модарону кўдакон барои ҳар миллату давлат муҳим буда, бо ин мақсад тибқи қарорҳои Раиси вилоят “Дар бораи расонидани кўмакҳои антинаталӣ ба занҳои ҳомила”, «Дар бораи таъмини хуни бехатари донорӣ», «Дар бораи таъмини кўдакони синни то 3 сола ва маюбони модарзод бо дорувориҳо» ҳамасола 232 ҳазор сомонӣ ҷудо карда мешавад.
Раҷаббой Аҳмадзода инчунин аз камбудиҳои соҳаи тандурустии вилоят низ ёдовар шуд ва барои ислоҳи онҳо дар назди масъулин вазифагузорӣ намуд. Изҳори боварӣ карда шуд, ки ҷаҳду талошҳо ва меҳнату заҳмати ҳазорон нафар табибони вилоят барои болоравии маърифати санитарии аҳолӣ, расидан ба нишондиҳандаҳои мусоиди вазъи саломатии сокинон, алалхусус модарону кўдакон, тарғиби тарзи ҳаёти солим, коҳиш додани бемориҳои сироятӣ ва аҳамияти иҷтимоидошта, ташаккули ҷисмонии наврасону ҷавонон натиҷаҳои назаррас ба бор меоранд.
Дар вазъияти тантанавӣ аз ҷониби Раиси вилоят ба 20 нафар собиқадорони соҳаи тандурустӣ туҳфаҳои хотиравӣ ва ба 9 нафар ғолибони озмуни вилоятии “Беҳтарин сартабиби муассисаи тандурустӣ” ба миқдори аз 2 то 10 000 сомонӣ мукофотпулиҳо тақдим карда шуд.
Дар охир аз ҷониби санъаткорони вилоят барномаи рангини фарҳангӣ пешниҳод гардид.
Манбаъ: Хадамоти матбуоти Раиси вилояти Суғд
Нет комментариев