Ҷаҳонгарди амрикоӣ: шефтаи Хуҷанд гардидам

0
851 просмотров

Блогнависи амрикоӣ Дрю Бинскиро табиат, фарҳанг ва меҳмоннавозии мардуми Тоҷикистон  хеле шефта кардааст.  Дар ояндаи наздик Осиёи Марказӣ ба далели ҷаззобияти табиату фарҳанг ва дастрасии молияш ҳатман яке аз маконҳои аслии гардишгарии ҷаҳонӣ хоҳад шуд, навиштааст гардишгару блогнависи амрикоӣ дар Huffington Post.

«Ман чанде пеш аз гардиши даҳрӯза дар Тоҷикистон, Ӯзбекистон ва Қирғизистон будам. Ба ростӣ, ин гашту гузор яке аз беҳтарин гардишҳо дар зиндагиям буд. Мо ба кӯҳҳо мебаромадему аз шаҳрҳои қадимӣ боздид мекардем, шабро дар рустоҳо рӯз мекардему аз бозорҳо хӯрданиҳо мехаридем ва пухтупази хӯрокҳои маҳаллиро меомӯхтем», — навиштааст ин гардишгари амрикоӣ.

Ба гуфти Дрю, донистаниҳояш дар бораи Осиёи Марказӣ пеш аз ин сафар андак буд.

«Росташро бигӯям, амрикоиҳо одат доранд ҳар кишвареро, ки номаш пасванди «-истон» дошта бошад, хатарнок бишуморанд. Вале ин гумон комилан нодуруст будааст. Инак чаҳор далеле, ки бино бар онҳо ҳатман бояд аз Тоҷикистон, Ӯзбекистон ва Қирғизистон дидан кунед», — гуфтааст вай.

Мардумони меҳмоннавоз

Дрю Бински аз гуфтану навиштан дар бораи бархурди гарму самимии мардумон бо якдигар ва бо хориҷиён дар ин кишварҳо хаста намешавад.
«Маро борҳо меҳмон кардаанду бо бисёр касон чойхӯрӣ кардаам, гарчи ман забонашонро на медонистам ва на мефаҳмидам», — мегӯяд гардишгар ва таъкид мекунад, ки касе барои чой ё хӯрок аз онҳо пул нахоста, ки бештар аз ҳар коре ин ҷавони амрикоиро ҳайратзада кардааст.

«Ман дар рустоҳои шимоли Тоҷикистон меҳрубонтарин мардумро дучор шудам. Онҳо зиндагии содае — бе интернет, оби гарм ва худраве — ба сар мебаранд. Ин дидаҳо маро водор кард, ки аз доштаҳоям шукргузор бошам», — мегӯяд гардишгар.

Табиати бисёр зебову диданӣ

Гардишгар ёдоварӣ карда, ки 94 дарсад аз қаламрави Қирғизистон кӯҳсор аст ва дар Тоҷикистон кӯҳситонҳо 97 дарсад аз сарзаминашро фаро гирифтаанд, ки ин кишварҳоро биҳиште барои кӯҳнавардон ва дӯстдорони истироҳати фаъол мегардонад.

«Аз дидани табиъати Тоҷикистон кас ҳайратзада мешавад. Ин ҷо маконест, ки то ҳол камтар гардишгаре онро дидааст. Ончи ман дар Тоҷикистон дидам — кӯҳҳои пурбарф, рӯдҳои шитобон, ҷангалҳои сарсабз — аз беҳтарину ёдмонтарин хотираҳои ҷаҳонгардиям шуд «, — бо ҳаяҷон мегӯяд Бински.

Нархҳои арзон

Гардишгарӣ дар ин се кишвари осиёӣ гарон нест. Кас ба осонӣ метавонад аз шаҳрҳои гуногун боздид кунаду аз ҳазинаҳо парвое надошта бошад.

Афзун бар ин, Дрю ба гардишгароне, ки мехоҳанд аз он кишварҳо боздид кунанд, тавсияҳое додааст: чунончи, дулорҳоро беҳтар аст на дар бонк, балки дар «бозори сиёҳ» мубодила кард то бештар пул ба даст овард. Масалан, агар дар бозори сиёҳи Ӯзбекистон 1 доллар 8 ҳазор сӯм нарх дошта бошад, дар бонк он ду баробар камтар, яъне 4 ҳазор сӯм нарзиш дорад.
Мероси торихии Роҳи абрешим
Ба қавли гардишгари ҷавон торихи кишварҳои Осиёӣ Марказӣ, ки Роҳи бузурги абрешим аз сарзамини кунунии онҳо мегузашт, худ бисёр ҷолиб аст.

«Ман аз ҳама шаҳрҳо бештар  Хуҷандро бо масҷидҳову оромгоҳҳои зебо дӯст доштам. Дар Тоҷикистон мо аз шаҳри Хуҷанд дидан кардем. Ин ҷо ҳар гардишгаре бояд аз бозори суннатии шарқӣ боздид кунад», — тавсия медиҳад ин гардишгари амрикоӣ.

Дрю Бински бовар дорад, ки ин далелҳо бояд сайёҳонро ангеза диҳанд, ки аз Тоҷикистон, Ӯзбекистон ва Қирғизистон ҳатман боздид кунанд.

Манбаъ: http://sputnik-tj.com/

Нет комментариев

Также рекомендуем