Қабули барномаҳои таълимӣ дар ДДҲБСТ талаботи замон

0
175 просмотров

Дар Донишгоҳи Давлатии ҳуқуқ бизнес ва сиёсати Тоҷикистон нишасти матбуотии ректори донишгоҳ Шарифзода Мумин Машокир бо намояндагони васоити ахбори умум бо мақсади фаҳмонидадиҳии натиҷаҳои фаъолияту дастовардҳои донишгоҳ дар нимсолаи дуюми 2017 доир гардид. Сараввал Мумин Шарифзода сухан карда, баён намуд, ки асоси кору пайкори ҳайати устодону профессорони донишгоҳро татбиқи сиёсати маънавибунёди Сарвари давлат дар соҳаи маориф, баланд бардоштани сатҳу сифати таълиму тарбия ва ободии рӯзгори омӯзгорону кормандонро ташкил медиҳад. Дар иртибот ба таъмини ҳидоятҳои созандаи Сарвари давлатамон нисбат ба соҳаи маориф, таваҷҷӯҳу дастгирии ҳамешагии Вазорати маориф ва илми кишвар, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии вилояти Суғд ва шаҳри Хуҷанд нимсолаи дуюми соли 2017 ҷомеаи меҳнатии донишгоҳ ба дастовардҳои назаррас ноил гардиданд.

Ректори донишгоҳ доир ба таҳкими заминаҳои моддию техникии раванди таълим ва пажӯҳишоти илмии донишгоҳ гуфт, ки то имрӯз миқдори компютер 643 адад,  ноутбук 46 адад, 183 адад принтер, УПС 146 адад, тахтаи электронӣ 5 адад, 19 адад телевизор, 36 адад экран барои проектор ва 114 адад камера харидорӣ гашта, аз он 57 адад камераҳои назоратӣ дар биноҳои таълимӣ насб гардиданд, ки ин ба бехатарӣ ва барои назорати донишҷӯёну устодон мусоидат мекунад.

Миқдори умумии омӯзгорони штатии донишгоҳ 332 нафарро ташкил медиҳад, ки аз онҳо 17 нафар докторони илм ва 123 нафарашон номзадҳои илм ҳастанд. Теъдоди умумии донишҷӯён 6753 нафарро ташкил мекунад ва аз он миқдор 4364 нафарашон дар шӯъбаи рӯзона, 2389 нафар дар шӯъбаи ғоибона ва 398 нафар дар магистратура таҳсил мекунанд. Гуфтан шуд, ки дар соли таҳсили 2016-2017 шумораи умумии хатмкардагон 1274 нафар буданд, 41 нафари онҳо таҳсилро бо дипломи аъло ҷамъбаст карданд. Аз моҳи сентябри соли 2017 сар карда, чунин гурӯҳу факултетҳо ба таҳсилоти фосилавӣ фаро гирифта шуданд: 1 гурӯҳи курси якуми факултети инноватсия ва телекоммуникатсия ва 3 гурӯҳи курси якуми факултети ҳуқуқшиносӣ. «Аз соли хониши нав 21 ихтисоси амалкунанда ба таҳсилоти фосилавӣ фаро гирифта мешаванд»-зикр намуд ректори ДДҲБСТ. Тибқи ҷамъбасти натиҷаҳои сессияи зимистонаи соли хониши 2017-2018 сатҳи донишандӯзӣ дар донишгоҳ ба 89 фоиз баробар аст. Дар асоси корҳои санҷиши гирифташуда ба намуди хаттӣ сатҳи донишазхудкунӣ 90 фоизро нишон дод ва сатҳу сифати таълим баҳои «4» ва «5» 45,8 фоизро ташкил дод. Дар донишгоҳ давоми моҳҳои сентябр-декабри соли 2017 аз тарафи устодони донишгоҳ бисёр дарсҳои кушод, дарсҳои намунавӣ ва дарсиҳамоӣ гузаронида шуд, ки эҳсоси меҳру муҳаббат ба ватан, ба устодон ва донишҷӯёнро баланд гардонид. Соли 2017 аз тарафи устодони донишгоҳ Султонов Ш.М., Яқубов Ҷ.К., Давлатов М.Д., Тоатов Ҳ.С., Муродбекова М., Шокиров Т.С., Ҳомидова Н.Ш., Ҳайитбоева Н.А. ва дигарон асарҳои илмӣ, манографияҳо аз чоп бароварда шуд. Инчунин ҳамин сол дар густариши фаъолияти илмии донишгоҳ донишҷӯён низ бо таълиф ва чопи китобҳои худ саҳмгузорӣ намуданд. ДДҲБСТ робитаҳои худро бо муассисаҳои кишварҳои хориҷӣ, созмонҳои байналмилалӣ таҳким бахшида, иқтидори илмӣ, таълимӣ  ва фарҳангиро густариш медиҳад. Имрӯз дар донишгоҳ 51 муассисаи илмӣ ва таълимии кишварҳои хоричӣ: Русия, ИМА, Ҳиндустон, Ҷопон, Финляндия, Украина, Белорусия, Хитой, Қазоқистону Қирғизистон дар асоси шартнома ҳамкорӣ дорад. Соли сипарӣ ду лоиҳаи нав дар чорчӯбаи Эразмус+ амалӣ карда шуда, 3 лоиҳаи (САNEM-2, FLEEP, INOCAST) бомувафаққият ба анҷом расид. Дар лоиҳаи САNEM-2 3 нафар устодон ба Донишгоҳи Генуяи Италия, 1 нафар ба Донишгоҳи Лас Палмас де Гран Канария ва 2 нафар донишҷӯ ба Донишкадаи бонкии Чехия сафарбар шудаанд. Тибқи нақшаи кори лоиҳаи FLEEP 7 нафар омӯзгорон дар шаҳрҳои Аврупо такмили ихтисос ва ё таҷрибаомӯзӣ карданд.  Дар заминаи лоиҳаи INOCAST дар донишгоҳ озмоишгоҳи инноватсионӣ таъсис дода шуд, бо таҷҳизот ба маблағи 22010 евро таъмин карда шуд. Дар қисмати дуюми нишасти матбуотӣ ректори донишгоҳ ба саволҳои сершумори намояндагони васоити ахбори омма посух дод.

Бахусус, аз ҷониби кормандони телевизион ва радио доир ба таҳияи барномаҳои таълими вобаста ба пешрафти замони муосир, аз ҷумла дар соҳаи телекоммуникатсия, навовариҳо дар раванди таълими донишҷӯён, ифтитоҳи гурӯҳҳои русӣ дар бархе аз ихтисосҳо саволҳои саривақти пешниҳод гардидаанд, ки сарвари донишгоҳ посухҳои қаноатбахш дод. Дар охир ректори Донишгоҳи Давлатии ҳуқуқ бизнес ва сиёсати Тоҷикистон Шарифзода Мӯмин Машокир аз намояндагони воситаҳои ахбори омма хоҳиш намуд, ки барои ҷоннок намудани фаъолият дар соли 2018 ҳамкориро пурзӯр намоянд.

Нет комментариев

Также рекомендуем