Акмал Ҷумаев аз пиратҳо шикоят дорад

0
510 просмотров

Акмал Ҷумъаев аз зумраи ҷавонони пуртакопӯи тоҷик аст, ки ҳатто як лаҳзаи умрашро беҳуда намегузаронад. Дар бораи чунин ҷавонони серҳаракат, ҷӯянда ва эҷодкор мегӯянд: “ Панҷ панҷааш ҳунар аст”. Дили Акмал ба мисли чашма ҳамеша ҷӯш мезанад. Дар чанд соли охир ин коргардони ҷавон тавонист 7 филмро ба навор бигирад. “Интизорӣ”, “Ҷӯрагӣ то охира”, “Овораи ишқ”, “Меҳмони нохонда” ва дигар филмҳои ин коргардони ҷавонро мардум, хоса насли ҷавон хеле дӯст медоранд, зеро аксари ин филмҳо мазҳакавӣ буда, аз ишқу муҳаббат ва дигар фоҷиаю ҳаводиси рӯзгори ҷавонон нақл мекунанд. Дар арафаи соли нави 2018 Акмал Ҷумаев мухлисони синаморо ба рӯнамоии филми нави худ “Гурезаҳо” даъват карда буд, ки дар жанри комедия-боевик” ба навор гирифта шудааст. Маросим хеле хотирмон гузашт ва ҳамагон интизор буданд, ки ин филм ба зудӣ манзури омма мегардад, аммо як сол аз байн гузашту то ҳол диски “Гурезаҳо”-ро дар дӯконҳои фиттафурӯшӣ пайдо карда намешавад. Тақдири ин филм чӣ шуд ва имрӯз коргардон бо чӣ корҳо машғул аст? Барои ба ин савол ҷавоб гирифтан, мо бо Акмал Ҷумаев ҳамсӯҳбат шудем.

Акмалҷон, Шуморо хайрамақдам мегӯем ба радиои Тироз .

Ташаккур! Хушҳолам, ки меҳнати маро қадр карда суроғ мекунед. Мухлисон баъди тамошо кардани “Меҳмони нохонда” боз ба суроғи мо афтодагистанд… (механдад)

-Филми наватон “Меҳмони нохонда” аллакай мухлисони худро пайдо кардааст, вале мо шуморо бо дигар масъала даъват кардем.  Тақдири “Гурезаҳо” чӣ шуд? Магар қаҳрамонҳоятон гурехта, ба хориҷи кишвар рафтанд?

Аввалан бояд бигӯям, ки “Меҳмони нохонда” моли бародари азизи мо Алишер аст, чунки тамоми хароҷотҳои ин филм маҳз аз ҳисоби ҳамин кас буд. Дар мавриди  “Гурезаҳо” бошад, ташвиш накашед, Худо хоҳад, аввалҳои моҳи феврал фиттаҳои ин филм ба фурӯш мебароянд…

-Чаро корро ин қадар кашол додед?

-Азбаски ягон сарпараст надоштем, ман аз бонк пули калон қарз гирифта, ин филмро аз ҳисоби худам наворбардорӣ карда будам. Беш аз дусад ҳазор сомонӣ пул сарф кардем, ақаллан нисфи хароҷоти филмро набароварда, чӣ хел фиттаҳои онро паҳн мекардем?!

Магар аз ҳисоби фурӯши филм фоида намебинед?

Меҳнатро мо-эҷодкорон мекунем, вале фоидаашро пиратҳое мебинанд, ки ба фурӯши фиттаҳо машғуланд. Имрӯз на танҳо ман, балки тамоми сарояндаҳо, ҳаҷвнигорон ва коргардонҳои тоҷик аз дасти ин пиратҳо меноланд, чунки ҳосили заҳмати ҳамаро бачаҳои фиттафурӯш ба кисаи худашон мезананд. Шумо тасаввур кунед, ки як коргардони бечора ду-се сол ҷон канда, филм ба навор мегирад, сароянда пули калон сарф намуда, консерт медиҳад, вале аз ин филму аз ин консерт на ба коргардон як тин фоида мемонад, на ба сароянда…

Магар пеш аз баровардани фиттаҳо бо шумо, яъне бо эҷодкорон шартнома  намебанданд?

-Ҳама чиз ба танзим даромад, ҳатто тӯю сур, маргу мурда ва либоси занҳо, намедонам чаро ҳамин шоу-бизнес ҳеҷ ба танзим намедарояд. Пиратҳо бо ким-кадом роҳу воситаҳои ба мо номаълум фиттаи консерт ва филмҳои навро ба даст оварда, чолокона нусхабардорӣ мекунанд ва дар як рӯз бозор пур мешавад. Ҳазорон-ҳазор фиттаи филм ё консерт ба фурӯш меравад, аммо аз ин на ба коргардонҳо ягон фоида мерасаду на ба сарояндагон. Аз ҳамин сабаб, аксари эҷодкорон дилхунук шуда истодаанд. Ба кас алам мекунад, вақте ки ҳосили заҳмати туро дигарон мехӯранд.

-Шумо ҳам дилхунук шудед ё банди эҷод ҳастед?    

Тавба накардаам, вале ба худам қавл додам, ки дигар бе сарпараст филм ба навор намегирам. Ҳоло “Ёсин” ном филми наверо ба навор гирифта истодаем, ки дар бораи як варзишгари ҷавон нақл мекунад. Ҳунармандони шинохта, аз ҷумла Моҳпайкар Ёрова, Қурбони Собир, Назирмад Мусоев ва Дӯстмурод Шариповро ба филм ҷалб намудем.

-Гуфтагӣ барин, чаро дар тамоми филмҳои шумо танҳо Мугамбо, Дон-Жуан ва боз 2-3 чеҳраи дигар нақш мебозанду халос?

Ман ҳам бисёр мехоҳам ҳунармандони машҳурро даъват намоям, вале имконияти иқтисодӣ даст намедиҳад. Ба ҳунармандони шинохта барои ҳар як рӯзи кориашон то 1000 сомонӣ пул додан лозим аст. Наворбардории филм тақрибан ду моҳ давом кунад, ба ҳар як ҳунарманд 60 000 сомонӣ додан лозим мешавад. Азбаски мо, коргардонҳо чунин имконият надорем, ба ҷавонҳо такя мекунем.

-Кадоме аз филмҳои офаридаатон ба худатон бештар писанд аст?

-Саволи душвор, чунки барои коргардон ҳар як филме, ки ба навор мегирад, мисли фарзандаш азиз аст. Соли 2012 “Интизорӣ”-ро ба навор гирифтем. Мардум онро хуш қабул карданд, дар назди дӯконҳои фиттафурӯшӣ чунон одам ҷамъ мешуд, ки ногуфтанӣ. Филми дуюмамон “Ҷӯрагӣ то охира” ба дараҷаи “Интизорӣ” нарасид, вале “ Овораи ишқ”-ро то имрӯз мардум бо шавқ тамошо мекунанд. Ногуфта намонад, ки аз филмҳои ба навор гирифтаамон фақат ҳамин  “Овораи ишқ” ба мо даромади иқтисодӣ оварду халос. Пиратҳо аз “Меҳмони нохонда” ва дигар филмҳои мо фоидаи калон диданду худамон зарар.

-Дар оғози суҳбат гуфтед, ки барои ба навор гирифтани “Гурезаҳо” аз бонк пули калон қарз гирифтам. Дигар филмҳоро бо кӯмаки кӣ офаридед?

-Филми “Интизорӣ”-ро  Илҳом Муродов сарпарастӣ карда буд. “Гурезаҳо”-ро аз ҳисоби худам сабт кардам. “Меҳмони нохонда”-ро Алишер аз ҳисоби худаш ба навор гирифт. Тамоми хароҷотҳои филми “Овораи ишқ” аз ҳисоби Убайдуллои Саъдулло ва Илҳомҷони Шодӣ буд. Мо, бачаҳои ташнаи санъат худамон нахӯрдаю напӯшида, пули меёфтаамонро ба кино ва суруду мусиқӣ сарф мекунем. Ин як нав бемории эҷодӣ аст. Магар одами сиҳат дар ҳамин замонаи душвор чунин корро мекунад? (механдад)

-Як замон овозхонӣ ҳам мекардед?

Бале, аввалин суруди ман дар бораи зиндониҳо буд ва бо мисраи  “Мара мефора брам хона” оғоз меёфт. Ман он замон дар курси дуюм мехондам ва бо маслиҳати ҳамсабақонам ин сурудро дар шакли рэп пешкаши мухлисон гардонида будам. Дар як ҳафта ин тарона вирди забони мардум гашта, дили ман ба рэп гарм шуд ва то соли 2009 рэпсароӣ кардам. Айни ҳол ҳам эстрада ва ҳам рэп месароям.

-Нақшаҳои наздиктарини эҷодиатон?    

Сабти филми “Ёсин”-ро ба охир расонида, наворгирии қисми сеюми “Меҳмони нохонда”-ро сар карданиам. Албоми нави таронаҳоямро пешкаши мухлисон мегардонам. Хулоса, аз пайи эҷод ҳастам ва то дилам ҷӯш мезанад, тарки ҳунар нахоҳам кард.

Комёб бошед!

Нет комментариев

Также рекомендуем

Cмайликҳо ҳиссиётро боз ҳам наздиктар карданд

Хазинаи байналмилалии The Global Language Monitor соли гузашта, тадқиқотӣ истифодабарандагони забони интернетиро гузаронид. Тадқиқот муайян намуд, ки захираи луғавии миёнаи сокини Аврупо аз захираи луғавии ...
%d такие блоггеры, как:

Сообщить об опечатке

Текст, который будет отправлен нашим редакторам: