Ҳар рӯзи кор дар Радиои “Тироз” хотирмон буд!

0
135 просмотров

Kibriyo-Kamolova-Akhmedjanova-1_новый размер

Чунин буд хулосаи собиқ  директори барномаҳо, муҳаррири пешбар, наттоқи ширинкаломи Радиои “Тироз” Кибриё Аҳмадҷонова (Камолова) пас аз оростани мусоҳиба.

Муаррифнома

Кибриё Аҳмадҷонова (Камолова) дар оғози бедории табиат, фасли зебои сол – Баҳори хуҷаставу фаррухпай, 2-юми марти соли 1981 дар шаҳри Хуҷанд чашм ба олами ҳастӣ кушодааст. Шояд аз ҳамин сабаб бошад, ки чун баҳор зебосанаму фариштахӯй ва некгуфтору некрафтор мебошад.

Пас аз хатми мактаби миёна таҳсилашро дар факултети юристпруденсияи Донишгоҳи давлати Хуҷанд ба номи академик Б.Ғафуров ва факултети иҷтисодии Донишгоҳи давлатии тиҷорати Тоҷикистон идома дода, соҳиби ихтисосҳои ҳуқуқшинос ва иқтисодчӣ гардид.

Ҳамзамон, дар солҳои мухталиф шунавандаву толибилм ва иштирокчии курсҳои махсус, семинар ва тренингҳо гашта, сатҳу сифати донишу тахассус ва маҳорату малакаи хешро баланд бардоштааст.

К. Аҳмадҷонова фаъолияти меҳнатии хешро соли 1998 дар Телевизиони мустақили “СМ-1” оғоз карда, то соли 2002-юм ба ҳайси муҳаррири шӯъбаи иттилоот ва ровӣ ё худ барандаи барномаҳо ифои вазифа намудааст.

Аз рӯи толеънома – Моҳӣ, аз рӯи мучал – Мурғ, хӯроки дӯстдоштааш – Дӯлмаи гӯштӣ (голупси), фасли писандидааш – Баҳор, гули дӯстдоштааш – Садбарг, ранги писандидааш – Бунафшранг (фиолетовый), рақами дӯстдоштааш – 10, Радио ва ё телевизиони дӯстдоштааш – “Тироз” ва “СМ-1”.

Kibriyo-Kamolova-Akhmedjanova-2_новый размер

Сипас соли 2002 бо пешниҳоди Директори генералии Ширкати телевизион, радио ва рекламавии  “Тироз” Хуршед Ӯлмасов барои идомаи фаъолият ба ин даргоҳи муқаддас (чуноне худи ӯ мегӯяд) омад.

Беҳтараш ҳоло таваҷҷӯҳ намоед ба он мусоҳибае, ки бо худи Кибриё Аҳмадҷонова анҷом додаем:

  1. Чӣ тавр шуд, ки барои идомаи фаъолият, ба Радиои “Тироз” омадед?

Соли 2002-юм буд, маро Директори генералии Ширкати телевизион-радио ва рекламавии “Тироз” мӯҳтарам Хуршед Азимҷонович ба кор даъват карданд ва ман пешниҳоди он касро қабул намудам. “Тироз” он солҳо байни мардум обрӯву нуфузи баланд ва мухлисони зиёд дошт. Аз ин рӯ, ман ҳам ба ин радио ҳаваси зиёди кор кардан доштам.

  1. Чаро Шумо аз аввал маҳз касби наттоқиро пеша намудед?

Ба ростӣ аз хурдӣ ба касби ҳунари наттоқӣ ё худ барандагӣ шавқу ҳаваси зиёд доштам. Дар дилам орзуи зиёд доштам, то ҳангоми ба воя расиданам наттоқи телевизион ва радио шавам. Шукрона, ки ба орзуя расида ҳам дар телевизион ва ҳам дар радио чун наттоқ (ровӣ) фаъолият кардам.

  1. Солҳои фаъолиятатон дар радио, кадом лаҳзаҳои хотирмон дар хотиратон нақш бастаанд?

Он вақт коллективи Радиои “Тироз” бениҳоят ҷавон буд. Духтаракону писаракони ҷавон, ки бисёриашон донишҷӯй буданд, кор мекарданд. Ҳар рӯзи кор дар Радио хотирмон буд, зеро дар атрофи чунин кормандони ҷавону соҳибистеъдод ва бениҳоят ҳозирҷавобу чаққон кор кардан, ба ман ҳаловат мебахшид.

Kibriyo-Kamolova-Akhmedjanova-3_новый размер

  1. Барои худи Шумо аз ҳама шавқовару завқовар ҳангоми фаъолиятатон дар Радиои “Тироз” чӣ буд?

Як чизи аҷоиби радио нисбат ба телевизион дар он аст, ки шунаванда туро мешунавад. Ва ту бояд танҳо бо овози хушу ширадор ва гӯшнавозу дилписанд таваҷҷӯҳи онҳоро ҷалб карда тавонӣ!

Хотирмон боз он буд, ки чанд маротиба бо пешниҳоду дастгириҳои Директори генералии ШТРР “Тироз” мӯҳтарам Хуршед Ӯлмасов бо мақсади такмили ихтисос ва ивази таҷриба дар семинару тренингҳои байналхалқӣ дар ҷумҳуриҳои Қазоқистон ва Қирғизистон иштирок намудам. Аз ин сафарҳои хотирмон ва хеле бароям муфид, пеш аз ҳама аз роҳбарияти ширкат басо миннатдорам! Бахусус, пас аз иштирок дар тренингҳое, ки дар шаҳри Оши Ҷумҳурии Қирғизистон (соли 2005) ва шаҳри Алма-атои Ҷумҳурии Қазоқистон (соли 2006) гузаронида шуданд, ба ростӣ ҷаҳонбиниам васеъ ва нигоҳам ба радио дигаргун гаштанд.

  1. Шумо чанд сол қабл дар ин радио фаъолият карда будед? Тафовути дирӯзу имрӯзи радиоро эҳсос ё мушоҳида менамоед (ҳам дар бахши эҷодӣ ва ҳам бахши техникӣ)?

Солҳои фаъолиятам дар радио ҳам дар бахши эҷодӣ ва ҳам дар бахши техникӣ тамоми шароити корӣ барои мо-кормандон аз ҷониби роҳбарияти ширкат муҳайё гардида буданд. Ба фикрам ҳоло низ аз пештара беҳтару хубтар аст. Зеро, пас аз шунидани баромаву гуфторҳои Радиои “Тироз” ҳар як шунаванда низ чунин хулоса мебарорад!

Хулоса, бароям беҳтарин солҳои фаъолияти кории ман дар ин давра буд.

  1. Агар Шуморо боз барои кор ба Радиои “Тироз” даъват мекарданд, розӣ мешудед?

Бигзор ҷавонон кор кунанд, чи хеле, ки шоир гуфтааст:

Рафтанду равему боз оянду раванд.

Солҳое буданд, ки мо кор кардем, рафтем, ҷои моро кормандони дигари боистеъдод пур карданд.

Бо баробари аз номи Шумо – хонандагони Медиапортали “Тироз” барои чунин сӯҳбати хотирмон ташаккур изҳор намудан ба Кибриё Аҳмадҷонова, илова карданием, ки алҳол ӯ дар Ҷамъияти саҳҳомии кушодаи “Бонки Эсхата” ба ҳайси PR менеҷер (яъне, боз ҳам кор бо васоити ахбори омма, идораҳои давлатӣ ва умуман бо ҷомеа) ифои вазифа менамояд ва муваффақияту комёбиҳои корашро ҳамоно аз Радиои “Тироз” меҳисобад!

Kibriyo-Kamolova-Akhmedjanova-4_новый размер

Зеро, ҳар нафаре, ки аз Мактаби “Тироз” гузаштааст, ҳамеша сарбаланду пешсаф ва дар зиндагиву фаъолият муваффақ мегардад!    

Нет комментариев

Также рекомендуем

Необычные коллекции

Таким хобби, как коллекционирование, люди увлекаются во всем мире. Филателисты собирают марки, нумизматы коллекционируют монеты, а фалеристы – разные награды. Но есть и такие люди, ...