Ҷаримабандӣ барои риоя накардани қонун

0
391 просмотров

Аз ҷониби судҳои  Ҷумҳурии Тоҷикистон нисбат ба 771 нафар шахсоне, ки Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон»-ро риоя накардаанд, 793 парвандаи ҳуқуқвайронкунии маъмурӣ баррасӣ ва онҳо ба маблағи 3 миллиону 349 ҳазору 80 сомонӣ ҷаримабандӣ шудаанд.  Ҳамчунин дар доираи риоя нагардидани Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» мақомоти судии мамлакат 17 ҳазору 136 парвандаи ҳуқуқвайронкунии маъмуриро баррасӣ кардаанд. Дар натиҷа нисбат ба 5 ҳазору 28 нафар ҷазои огоҳӣ ва нисбат ба 10 ҳазору 629 нафар ҷаримаи маъмурӣ таъйин карда шудааст. Раиси Суди Олии Ҷумҳурии Тоҷикистон Шермуҳаммад Шоҳиён зимни нишасти матбуотӣ, ки нимаи дуюми имрӯз дар толори Суди Олӣ бо иштироки намояндагони ВАО баргузор гардид, зикр кард, ки дар давраи ҳисоботӣ аз ҷониби ҳамаи марҳилаҳои судии мамлакат 148 ҳазору 733 адад парвандаҳо баррасӣ гардидаанд. Нишондиҳандаи мазкур нисбат ба ҳамин давраи соли гузашта 541 адад кам мебошад. Ҳамчунин дар давраи ҳисоботӣ аз ҷониби мақомоти судӣ ба фоидаи давлат ба маблағи умумии 58 миллиону 274 ҳазору 114 сомонӣ боҷи давлатӣ, ҷарима, мусодираи молу мулк, товони зарари аз тасарруфи молу мулки давлатӣ расонидашуда рӯёнида шудааст. Бо мақсади баланд бардоштани маърифату дониши ҳуқуқии шаҳрвандон 15 ҳазору 188 парванда дар мурофиаҳои сайёри судӣ баррасӣ гардиданд. Маҷлисҳои сайёри судӣ ҷиҳати тарбияи ҳуқуқии аҳолӣ, ташвиқу тарғиби қонунҳо ва амалӣ намудани «Барномаи таълим ва тарбияи ҳуқуқии шаҳрвандони Ҷумҳурии Тоҷикистон барои солҳои 2009-2019» нақши муҳим бозидаанд. Илова бар ин, мақомоти судии мамлакат бо мақсади ҷалб намудани диққати мақомоти давлатӣ, ташкилоту созмонҳои ҷамъиятӣ ва шахсони мансабдор ба ҳолатҳои вайронкунии қонун, муайян намудани сабабу шароите, ки ба содир шудани қонунвайронкунӣ мусоидат кардаанд, 16 723 таъйиноти хусусӣ бароварда, ба мақомоти дахлдор ҷиҳати пешгирӣ намудани чунин ҳолатҳо 423 пешниҳодҳо ирсол намудаанд. Дар нишасти матбуотӣ зикр гардид, ки рӯзҳои шанбе аз ҷониби раиси Суди Олӣ соли гузашта ҳазору 357 муроҷиаткунанда ва дар рӯзҳои корӣ аз ҷониби муовинони раиси Суди Олӣ ва раисони коллегияҳои Суди Олӣ 122 нафар шаҳрвандон қабул карда шудаанд. Дар нишасти матбуотии Суди Олии Тоҷикистон мушовири калони бахши Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Содиқ Шоназаров иштирок намуд.

 

 

Манбаъ: сомонаи расмии АМИТ «Ховар»

Нет комментариев

Также рекомендуем