Ҷавоне, ки ҳамнабзи сайёра аст!

0
311 просмотров

Роҳи ягонаи амалӣ намудани мақсадҳои накӯ, пайдо намудани мавқеи худ дар ҷомеа ва саҳм гузоштан дар рушди кишвар маҳз тавассути омӯхтани илму дониш ва аз бар намудани касбу ҳунарҳои гуногун ба кас муяссар мегардад. Фирӯз Сайфуддинов, яке аз ҷавонони фаъол ва ихтироъкор бо дарки ин нукта ҳамеша талош меварзад, то дар самти пешанамудааш муваффақ бошаду тавассути донишҳои андӯхтааш бо ихтироъкорӣ низ машғул шавад.

Ба назари ӯ ҷавонӣ замонест, ки инсон бояд худашро бисозад: “Барои он ки дар зиндагӣ дорои фаъолияти хубу намунавӣ бошед, аввалан бояд мақсад дошта бошед. Муҳаббат ва мақсад шахсро дар ҳама соҳа комёб мегардонад. Дар баробари он ки муҳаббат ва мақсад доред, инчунин, аз тамоми имкониятҳои мавҷуда самаранок истифода бурдан хеле муҳим аст. Зеро имконияте, ки имрӯз бароятон ҳаст, онро фардо ҳаргиз ёфта наметавонед. Пас, ҳар лаҳзаи умрро мебояд самаранок ва мақсаднок истифода кард, то дар бадалаш ҳадафҳои накӯи хешро амалӣ сохт”.

Фирӯз Сайфуддинов 2–юми майи соли 1992 дар оилаи коргар ба дунё омадааст. Ӯ пас аз хатми мактаби таҳсилоти миёнаи умумии №27-и зодгоҳаш соли 2010 тибқи квотаи президентӣ ба факултети химия, биология ва географияи Донишгоҳи давлатии Кӯлоб ба номи Абӯабдуллоҳ Рӯдакӣ дохил мегардад. Соли 2015 донишгоҳро бо баҳои аъло хатм намуда, худи ҳамон сол ҳуҷҷатҳояшро ба шуъбаи магистратураи донишгоҳи мазкур бо ихтисоси химия супорида, соли 2017 магистратураро бо баҳои аъло хатм намудааст. Ҳоло бошад, дар донишгоҳи мазкур вазифаи сардори “Маркази истеъдодҳои ҷавон”-ро бар уҳда дошта, ассистенти кафедраи химия мебошад.

Аз замони донишҷӯӣ бисёр мехост, ки ба навоварӣ низ машғул бошаду дар ин самт ба дастоварде ноил гардад. Ҳамин ҳадафи накӯяш маҳз дар “Соли ҷавонон” ҷони тоза гирифту билохира ихтирои худро ба анҷом расонида, нахустпатентро ба даст овард, ки онро “дастоварди фаромушношуданӣ дар ин соли таърихӣ” меҳисобад.

Фирӯз замони донишҷӯӣ дар чандин озмунҳои ҷумҳуриявӣ иштирок намудааст. Инчунин 14-уми марти соли 2014 бо ифтихорномаи Академияи илмҳои ҷумҳурӣ, 8-уми майи соли 2014 бо ифтихорномаи Вазорати маориф ва илми кишвар, 31 октябри соли 2014 бо дипломи дараҷаи III Донишгоҳи миллии Тоҷикистон бо мақсади ишғол намудани ҷои сеюм дар озмуни кушоди ҷумҳуриявӣ аз фанни химия байни донишҷӯёни муассисаҳои илмии касбӣ ва ба ҳамин мазмун 3-уми марти соли 2015 бо дипломи дараҷаи III Академияи илмҳои ҷумҳурӣ барои ишғол намудани ҷои сеюм, боз ба ҳамин мазмун 10-уми майи соли 2016 бо дипломи дараҷаи I Донишгоҳи давлатии Кӯлоб ба номи Абӯабдуллоҳ Рӯдакӣ барои ишғоли ҷои якум аз фанни химия сазовор гардидааст.

Азбаски бисёр мехост, ба воситаи донишу таҷрибаи азбарнамудааш навоварие карда, ба ин васила малакаи зеҳнии худро такмил диҳад, дар натиҷаи ҷустуҷӯҳои зиёд барояш муяссар мегардад, ки дар натиҷа доруе дар шакли капсула бо номи “Дармонбахши меъда” ихтироъ намояд. Ихтирои кардааш соли 2017 соҳиби патент гашт. Доруи “Дармонбахши меъда” барои бемориҳои захмҳои меъда ва рудаи дувоздаҳангушта, баланд будани туршии луъоби меъда, хунравии дарунии меъда ва руда, ҳангоми газакгирии девораҳои меъда ва руда тавсия дода мешавад.

Фирӯз имрӯз фаъолияти густурдаро ба роҳ монда, доим кӯшиш менамояд, ки ҳамчун ҷавони даврони соҳибистиқлол, асри илму технология ва чун дигар ҷавонони ҳамнабзи сайёра пайваста паи донишандӯзӣ бошаду баробари ин фаъолияти эҷодиашро пеш барад. Ӯ айни ҳол дар ҳаммуаллифӣ бо олимони донишгоҳаш С.Холиқов ва Т.Ҳисейнов китоберо бо номи “Ҳалли масъалаҳои химиявӣ” (қисмҳои 1 ва 2) навиштааст, ки дар арафаи чоп мебошад.

Фирӯз мегӯяд, дар оянда нақшаҳои зиёд дорад. Дар фаъолияти корию эҷодӣ ва ҳам ихтироъкорӣ барояш барор хоҳонем.

Манбаъ: Сомонаи Ҷавонони Тоҷикистон

Нет комментариев

Также рекомендуем