Аз Хуҷанд то Амрико. Ду дипломи сурхи як донишҷӯи 19-солаи тоҷик

0
593 просмотров

Азизҷон Азимӣ, ҷавони 19-солаи тоҷик яке аз бонуфузтарин донишгоҳҳои Амрикоро бо ду дипломи сурх хатм кард. Ӯ таҳсилоташро дар риштаҳои иқтисод ва равобити байналмилалӣ ба поён расонд ва ҳоло тасмим дорад бо сипарӣ кардани як давраи кӯтоҳмуддати корӣ, боз ба таҳсилоташ идома бидиҳад.

Дар ҳоле, ки ҳамсинфони собиқи Азизҷон Азимӣ, ҷавони тоҷик, дар Тоҷикистон ҳамакнун таҳсил дар мактаби миёна ё соли аввали донишгоҳро поён бурданд, вай дар ИМА ду дипломи сурхи Донишгоҳи бонуфузи Ню-Йорк (NYU)-ро дар риштаҳои иқтисод ва муносибатҳои байнулмилалӣ ба даст овард.

Ин дипломҳои сурх роҳи ӯро барои кору фаъолият дар як ширкати боэътибор дар ИМА ҳамвор намуд. Ҳоло қабл аз оғози фаъолияти корӣ Азизҷон ба шаҳри Хуҷанди Тоҷикистон ба дидори ҳамватанону пайвандон омадааст.

Дар сӯҳбат ба Радиои Озодӣ ӯ ибтидо ба ин суол, ки оё баъди хатми бомуваффақияти донишгоҳ дар Амрико тавонист дар ин кишвар ба осонӣ ба худ ҷои кор пайдо кунад, гуфт:

Азизҷон Азимӣ: Бале, пас аз бо ду дипломи сурх хатм кардани Донишгоҳи Ню-Йорк ширкати “Simon-Kucher & Partners”, яке аз пешрафтатарин ширкатҳо дар бахши консалтинг, маро ба кор даъват кард. Ин ширкат ба бонкҳои боэътибори ҷаҳонӣ хизмати консалтинг ё машваратдиҳӣ мерасонанд ва бо услуби хоси худ чӣ тавр пеш бурдани корро машварат медиҳанд.

Озодӣ: Шумо чӣ тавр ҳамзамон 2 диплом ба даст овардед, он ҳам ду дипломи сурхи Донишгоҳи Ню-Йорк, ки аз донишгоҳҳои соҳибноми ҷаҳон маҳсуб меёбад? Оё ҳамзамон дар ду ҷо таҳсил мекардед?

Азизҷон Азимӣ: Нахуст ман ба Донишгоҳи Хофстра дохил шудам, факултаи аълохонҳо. Пас аз як соли таҳсили аъло, ман ба Донишгоҳи Ню-Йорк гузаштам. Ҳамин тавр, баъди як соли дигари таҳсил ман ба гирифтани стипендия, ки ба донишҷӯёни аълохон дода мешавад, муваффақ шудам. Гирандагони ин стипендия бояд мавзӯеро таҳқиқ кунанд ва рисолаи илмӣ нависанд. Ман дар ду риштае, ки таҳсил доштам, умури байнулмилалӣ ва иқтисод, рисолаҳои илмӣ таълиф намудам. Ҳар дуи ин рисола ва имтиҳонҳоро бо баҳои аъло супурдам ва баъди чор соли таҳсил, соҳиби ду дипломи сурх шудам.

Радиои Озодӣ: Таҳсил ҳамзамон дар ду факулта душвор набуд?

Азизҷон Азимӣ: Хеле душвор буд, рости гап. Махсусан дар соли чоруми таҳсил. Агар се-чор соат барои хоб вақт мемонд, хеле хурсанд мешудем. Чунки тарзи таҳқиқи мавзӯъҳои илмӣ аз услуби таҳқиқ дар кишварҳои пасошӯравӣ хеле фарқ дорад, вақт ва заҳмати зиёд талаб мекунад. Дар ИМА рисолаи илмӣ доир ба мавзӯе бар пояи омор ва таҳлил таълиф мешавад, на танҳо бо такя ба маводҳои адабиёт ва назарияҳо, аз ин нигоҳ таҳлилҳои омориву математикӣ зиёд кор бурда мешавад.

ШИРКАТҲО КАДРҲОРО ИНТИХОБ МЕКУНАНД

Радиои Озодӣ: Дар ИМА ба як хатмкардаи донишгоҳ пайдо кардани ҷои хуб осон аст? Чӣ тавр ба кор қабул мекунанд?

Азизҷон Азимӣ: Аслан дар Амрико як истилоҳ ҳаст, “рекрутмент”. Яъне, донишҷӯ тибқи як системаи муназзам аз соли дуюми таҳсил то чорум барои кори оянда омодагӣ мегирад. Ин чӣ гуна сурат мегирад? Ширкат ва корхонаҳои пешқадам, ба истилоҳ “топ-иркатҳо” аз донишгоҳҳои ҳамчунин бонуфуз донишҷӯёни пешқадамро ҳамчун кадри ояндаи худ интихоб мекунад. Зимни интихоб, таҳсили аъло ва ширкати фаъолона дар фаъолиятҳои донишгоҳӣ ба донишҷӯ бартарӣ медиҳад.

Хуб, ман дар соли дуюми таҳсил дар ду факулта дар як созмони ҷамъиятиии СММ дар назди Донишгоҳамон ба ҳайси раҳбари як бахш ва баъди ду соли фаъолият раҳбари он интихоб шудам. Дар давраи фаъолият мо бо чандин вазирон ва сафирони кишварҳои ҷаҳон маҳфилҳои мубодилаи афкор баргузор намудем. Бо ду дипломи сурх хатм кардани донишгоҳи Ню- Йорк ва раҳбари ҳамин созмон буданам вақти довлабии кор дар ширкати “Simon-Kucher & Partners” ба ман имтиёз дод ва хушбахтона, ба кор пазируфта шудам.

Радиои Озодӣ: Ин созмони донишҷӯён дар донишгоҳатон аслан чӣ гуна созмонест?

Азизҷон Азимӣ: Дар донишгоҳҳои Амрико ва Канада ин гуна созмонҳои донишҷӯӣ вуҷуд дорад, ки мисли як маҳфил фаъолият мекунанд. Дар ин созмон на танҳо донишҷӯёни ҳавасманд, ки дар риштаи муносибатҳои байнулмиллӣ таҳсил доранд, балки донишҷӯёни дилхоҳ факултаҳои илмҳои дақиқ низ метавонанд шомил шаванд.

Соли 2014, ки ман нав аъзои ин созмон будам, мо дар 3 самт фaъолият мекардем. Якум, ҳар ҳафта донишҷӯёни шомили ин созмон маҳфилҳои мубоҳиса меоростем дар мавзӯъҳои муҳими ҷаҳон, масалан, мавзӯи доғи аннексияи Қрим ба Русия. Дуюм, конфаронсҳо баргузор мекардем ва 400 – 500 нaфарро аз гӯшаву канори ҷаҳон даъват мекардем ва дар мавзӯи пешниҳоднамудаи мо баҳсҳову мубодилаи афкор сурат мегирифт. Сеюм, бо донишҷӯёни донишгоҳҳои гуногуни ИМА ва Канада, мисли Ҳарвард, Йел, Донишгоҳи Коламбиа, ки шомили ин гуна созмонҳои назди СММ ҳастанд, дар озмунҳое вориди рақобат мешудем.

Ин ҳама фаъолиятҳои давраи донишҷӯӣ ба ман ёфтани кори хуб дар Амрикоро, сидқан бигӯям, осон намуд. Барои ин ман аз донишгоҳам, ки ба муҳассилинаш ҳама гуна имконот ва шароити кашф ва ташаккули истеъдод ва лаёқатҳои донишҷӯёни худро фароҳам меорад, миннатдорам.

АЗИЗҶОН ЧИГУНА ДАР 15-СОЛАГӢ ДОНИШҶӮ ШУД?

Радиои Озодӣ: Азизҷон, хуб, баргардем ақибтар. Шумо дар 19-солагӣ соҳиби ду дипломи сурхи Донишгоҳи бонуфузи Амрико ҳастед. Чӣ тавр дар 15-солагӣ донишҷӯ шудед ?

Азизҷон Азимӣ: Ман дар Тоҷикистон дар мактаби русӣ таҳсилро сар карда будам. Бархе муаллимонам бо падару модарам машварат карданд, ки ман метавонам ба тариқи “экстерн” мактабро барвақт хатм кунам. Падару модарам ба навбати худ ба ман пешниҳод карданд, ки оё хоҳиш дорам ва гуфтанд, ки ҳама чиз ба тасмими ман вобаста аст. Он вақт ман 7-сола будам, аммо бо санҷиш ва ризояти вазорати маориф дар синфи 4 таҳсил мекардам ва ба тариқи ҷаҳиш 2 синфро паси сар гузошта будам. Ман розӣ шудам. Зимнан, то ҳол аз волидайнам, ки ҳуқуқи ихтиёрро бар дӯшам гузоштанд, миннатдорам. Ҳамин тавр, синфҳои 5 ва 6-ро низ дар як сол паси сар кардам ва барои идомаи таҳсил ба мактаби тоҷикиву туркӣ дар Хуҷанд гузаштам. Он ҷо се сол таҳсил кардам ва як иттифоқи хуш маро барои идомаи таҳсил ба Амрико бурд ва мактаби миёнаро дар сини 15-солагӣ дар он кишвар хатм кардам.

АЗ ХУҶАНД ТО АМРИКО

Радиои Озодӣ: Ин чӣ гуна сурат гирифт ?

Азизҷон Азимӣ: Ман вақти дaр синфи 9 таҳсил карданам дар Хуҷанд дар олимпидаи ҷумҳуриявӣ аз фанни биология ҷои дувумро гирифтам. Баъд мaро ҳамроҳи ду талаба аз литсейи точикиву туркии шаҳри Душанбе ба шаҳри Ҳюстен ба олимпиадаи ҷаҳонӣ, “I-SWEEEP 2008”, фиристоданд. Мо дар он ҷо ба гирифтани ҷои аввал ноил шудем ва ба Тоҷикистон бо медалҳои тилло баргаштем. Дар пайи он ба ман барои идомаи таҳсил аз чанд мактаби хусусии шаҳри Ню- Йорки Иёлоти Муттаҳида даъватнома омад. Ман ҳамроҳи волидайн як мактаби хусусии Ню-Йоркро интихоб кардем, ки дар oн фарзандони дипломатҳо аз кишварҳои Шарқи наздик ва Осиёи Миёна таҳсил мекарданд. Таҳсил пулакӣ буд ва пули онро падару модарам пардохт мекарданд. Дар пайи таҳсил, ман президенти хукумати ин мактаб низ интихоб шуда будам. Ҳамин тавр, 4 синф: 9 — 12 -ро дар ИМА хатм кардам ва дар 15 солагӣ соҳиби мукофоти давлатии Амрико аз номи Президент Барак Обама гардидам.

Радиои Озодӣ: Азизҷон, шумо, ки нав ба кор оғоз мекунед, оё дар оянда бо роҳи фаъолияти корӣ рафтанӣ ҳастед ё фикри идомаи таҳсилро низ дар сар доред ?

Азизҷон Азимӣ: Ман аз моҳи сентябри соли гузашта то моҳи май ба навиштани рисолаҳои илмии донишгоҳӣ банд будам. Ва ин соли хеле муҳим дар зиндагии ман буд ва назари маро ба зиндагӣ тағйир дод. Проффесороне, ки ман таҳти раҳбарии онҳо ду рисолаи илмӣ менавиштам, ба тариқи маслиҳат гуфтанд, ки шумо метавонед як корро аз бурун биомӯзед ва ба он машғул шавед. Вале агар мехоҳед он касбу пешаи худро аз нигоҳи илмӣ низ аз худ кунед, онро аз дарун, мағзи он биёмӯзед, онро пурра аз худ кунед ва баъд ба он машғул гардед. Ман ин машваратро пазируфтам ва мехоҳам дар оянда таҳсилро дар магистратура ва докторантура идома диҳам. Вале барои чӣ ҳозир ба кор даромадам? Мехоҳам як сол вориди як коргоҳи консалтинг шуда, бибинам чӣ тавр кор мебаранд ва дар ин бахш таҷриба андӯзам. Ҳоло ният дорам моҳи декабр барои ворид шудан ба магистратура дар бахшҳои бизнес ва идораи давлатӣ ариза дода, соли оянда таҳсилро аз сар гирам.

МАН ФАРЗАНДИ ТОҶИК ҲАСТАМ!

Радиои Озодӣ: Дар қиёс бо Тоҷикистон, дар Амрико аз чӣ зиёд писандатон меояд?

Азизҷон Азимӣ: Вақте ки як ҷавон аз кишвари дигар ба Амрико меравад, сипарӣ кардани як, ду соли аввал барояш мушкил аст. Барои он, ки фарҳанги Амрико дигар аст. Ба назарам, ягон давлати дунё мисли Амрико нест. Ба гуфтаи худи мардуми Амрико, он кишвар як давлати иммигрантҳо ё муҳоҷирон аст ва онҳо худро “миллати имммигрантҳо “ ҳам меноманд. Дар он ҷо ягон маданият даъвии маданияти аслии давлатӣ будан надорад. Худи гузаштагони сафедпӯстҳои Амрико ҳам аз Аврупо ҳиҷрат карда буданд, яъне онҳо ҳам иммигрант буданд. Барои ҳамин барои як одами наврафта як-ду сол даркор аст, то ба он фарҳанг ворид гардад. Зимнан, як хусусияти хоси фарҳанги Амрикост, ки маданияти миллат ва давлати дигарро қабул мекунад. Вале боз ҳам бaрои ташаккули инсон муҳим аст, ки фарзанди кадом миллат будани худро аз ёд набарӣ. Мо, тоҷикон миллате ҳастем, ки таърихи хеле бузург дорем ва ин гуна миллатҳои дорои таърих ва фарҳанги хеле ғанӣ дар дунё зиёд нестанд. Аз ин рӯ, ман аз он, ки тоҷик ҳастам, ифтихор дорам ва ҳама ҷо бо ифтихор мегӯям, ки ман фарзанди як миллат, як оилаи бузурги тоҷик ҳастам.

Радиои Озодӣ: Азизҷон, нияте ҳам доред, ки баъди таҳсилу кор ва таҷрибандӯзӣ дар Амрико ба Тоҷикистон баргардед ва донишу кордонии худро барои пешрафти ватан кор баред?

Азизҷон Азимӣ: Албaтта. Чунонки гуфтам, ҳозир ман ба таҳсил ва гирифтани дипломҳои магистриву докторӣ бартарӣ медиҳам. Вале дар оянда, ки имкон фароҳам шуд, мехоҳам ба ватан баргардам ва саҳми худро барои шукуфоии кишвар, беҳбуди сохтории он гузорам. Ҳозир мо дида истодаем, ки ҷавонони ватан дар мактаб ё донишгоҳ ба дастовардҳое ноил мегарданд, ки касро хеле шод ва рӯҳбаланд мекунад. Вале на ҳамаи онҳо имкон ва шароитеро, ки масалан, ман ё мисли ман ҷавононе аз нигоҳи молиявӣ барои таҳсил ва касби тахассус ва коромузӣ дар кишварҳои рушдкардаи хориҷӣ, назири Амрико дорем, надоранд. Аз ин рӯ, ман орзу дорам, ки барои беҳтарин ҷавонони мо имкони молии таҳсил дар беҳтарин донишгоҳҳои кишварҳои хориҷӣ, масалан бо роҳи маблағгузорӣ барои таҳсили ҷавонони лаёқатманд, дастрас гардад. Ман мехоҳам барои фароҳам намудани чунин шароит ба навҷавону ҷавонони ватанам хидмат кунам.

Радиои Озодӣ: Ташаккур барои сӯҳбат. Дар зиндагӣ, кору таҳсил ва амалӣ намудани ниятҳои некатон муваффақият ёратон бод!

Азизҷон Азимӣ: Саломат бошед! Ташаккури зиёд!

Манбаъ:http://www.ozodi.org/

Нет комментариев

Также рекомендуем

Официальный курс валюты на 21.06.2018

Национальный банк Таджикистана (НБТ) 21.06.2018 года с целью бухгалтерского учета и оплаты таможенной пошлины определил официальный курс иностранной валюты по отношению к сомони.  1 доллар ...