Раиси Академияи илмҳои Тоҷикистон мегӯяд, ки аз моҳи декабри соли гузашта боз тақрибан ҳар рӯз дар кишвар замин меҷунбад, аммо ба қавли ӯ ин заминҷунбиҳо бо нерӯи камтар рух дода, «хатарнок нестанд». Фарҳод Раҳимов рӯзи 14 январ дар як нишасти хабарӣ дар Душанбе гуфт, ки «бояд сокинон аз ин заминларзаҳо ба воҳима наафтанд».
Ӯ дар посух ба суоли ин ки оё дар пайи заминларзаҳои пайдарҳам кӯли Сарез осеб дидааст ё не? гуфт: «Сарез ҳеч осеб надидааст ва бо чунин нерӯе, ки замин дар Тоҷикистон меҷунбад, аслан зиён нахоҳад дид.» Оқои Раҳимов дар идома заминларзаи моҳҳои охирро ба «пайдо шудани ҳаракати қишрҳои зеризаминӣ дар минтақа» рабт дод.
Ин изҳороти президенти Академияи илмҳои Тоҷикистон дар ҳолест, ки танҳо дар зарфи шабонарӯзи ахир дар кишварҳои Осиёи Марказӣ, аз ҷумла Тоҷикистон чаҳор вуқӯи заминларза сабт шудааст.
Заминларзаи аввал шаби 13 январ бо нерӯи 4,4 дараҷаи Рихтер дар атрофи шаҳри Душанбе рух дода, тибқи иттилои Маркази зилзиласанҷии Аврупо, маркази ин заминларза дар 62-километрии шимолуғарби пойтахт ва 46-километрии ноҳияи Айнӣ будааст.
Заминларзаи дуюм соати 00.49-и рӯзи 14 январ дар 147-километрии шаҳри Бишкек, пойтахти Қирғизистон ба қайд гирифта шуда, Заминларзаи сеюм ба иқтидори 5 дараҷаи Рихтер дар саргаҳи марзи Тоҷикистону Қирғизистон ва Чин рух додааст.
Тоҷикистон дар яке аз минтақаҳои зилзилахези қораи Осиё ҷойгир шудааст ва ҳар сол дар ин кишвар даҳҳо заминларзаи шиддаташон мухталиф сабт мешавад. Охирин заминларзаи шадид, ки Тоҷикистону Афғонистон ва Покистонро такон дод, шаби 25 ба 26 декабри соли гузашта рух дода буд. Он офати табиӣ, ки шиддаташ 6,2 бал баровард шуд, дар Тоҷикистон хисороте дар пай надошт, вале бино ба гузоришҳо, дар Бадахшони Афғонистон садҳо хонаро тахриб кард.
Аммо дар пайи заминларзаи шадиди рӯзи 7-уми декабр, ки низ Тоҷикистону кишварҳои ҳамсояаашро такон дод, садҳо манзил дар Бадахшони Тоҷикистон, бештар аз ҳама дар водии Бартанг тахриб шуд. Дар маҷмӯъ, ба ҳисоби мақомоти маҳаллӣ, дар рустоҳоиҒудара, Нисур, Рухч, Дерхуд, Баррӯшон, Деррӯшон, Вамд ва маркази ноҳияи Рӯшон беш аз 200 манзил пурра ва 832 хонаи дигар қисман хароб шудаанд.
Манбаъ: http://www.ozodi.tj/
Нет комментариев