Чунин маълумотро зимни нишасти матбуотӣ, Раиси шаҳри Хуҷанд Маъруф Муҳаммадзода дар ҳузури зиёда аз 40 нафар рӯзноманигорони дохилию хориҷӣ пешниҳод намуд.
Гуфта шуд, ки аз санаи 31-уми июли соли равон ҳаракати автобусҳои нав дар навбати аввал аз рӯи ду хатсайр ба роҳ монда мешавад. Бино ба иттилои Раиси шаҳр оғоз аз ҳафтаи оянда, санаи 31-уми июл автобусҳо сараввал тариқи 2 хатсайр ба кор оғоз мекунанд.
Баъдан дар назар аст, ки моҳи август ва дар умум то охири моҳи сентябр боқимонда автобусҳо ба Хуҷанд тариқи роҳи оҳан оварда шуда, шурӯъ аз моҳи октябр ҳамаи 100 автобус аз рӯи 10 хатсайри муайян ҳаракат мекунанд.
Дар ин замина аз сабаби оне, ки аксарияти ронандагон аз автовокзали «Пахтакор» ба микроноҳияи 3-юм рафтан нахостанд, қарор карда шуд, ки дар минтақаи «Галамайдон» як истгоҳи охирон, яъне, автовокзали нав сохта мешавад, то автобусҳо дар он ҷо қарор гиранд.
Паҳлуи дигар он аст, ки оҳиста-оҳиста то ба кор даромадани ҳамаи хатсайрҳо ҳамаи маршруткаҳо аз шаҳр бароварда шуда, дар самти беруназшаҳрӣ кор мекунанд. Аз сабаби оне, ки автобусҳо калон ва ғунҷоишашон бисёртар аст, тибқи нақшаи пешина хатсайрҳо дар масофаи дароз ба ҳисоб гирифта шудаанд. Яъне, 3 мкр — Ғафуров, 3 мкр — Бӯстон, 3 мкр — Гулистон, аз 34 мкр — Ғафуров, 34 мкр — Бӯстон, 34 мкр — Гулистон, ҳамчунин, 3 мкр — Пахтакор-Галамайдон, 34 мкр — Пахтакор-Галамайдон, зикр дошт шаҳрдор.
Хотиррасон менамоем, ки бо дастгирии Ҳукумати Ҷумҳурии Тоҷикистон ва дар доираи лоиҳаи «Рушди нақлиёти ҷамъиятии шаҳри Хуҷанд», ки бо маблағгузории Бонки Аврупоии Таҷдид ва Рушд амалӣ хоҳад шуд, ба маркази вилоят – шаҳри Хуҷанд 25 адад автобусҳои замонавии истеҳсоли Федератсияи Россия ворид карда шуд.
Автобусҳои воридкардашуда ҷавобгӯи талаботи замони муосир буда, ҳар як автобус дар як вақт метавонад беш аз 70 мусофирро ба манзил бирасонад. Тибқи иттилои масъулин автобусҳо дар 10 хатсайр ҳаракат мекунанд.
Медиапортали «Тироз»
Нет комментариев