Аз ҷониби Раиси вилояти Суғд Раҷаббой Аҳмадзода дар маркази ноҳияи Айнӣ ва шафати шоҳроҳи Душанбе — Хуҷанд ба бунёди Маҷмааи меҳмонхонаҳо санги асос гузошта шуд.
Раиси вилоят Раҷаббой Аҳмадзода зимни суҳбат бо сокинон ва фаъолони ноҳия иброз дошт, ки мавқеи ҷуғрофӣ ва табиати нотакрору манзараҳои дилфиреби ноҳия барои рушди соҳаи сайёҳии минтақа мусоидат менамояд. Танҳо зарур аст, ки бо истифода аз имкониятҳои мавҷуда сатҳи хизматрасонӣ беҳтар ва барои истироҳату фароғати сайёҳони дохиливу хориҷӣ шароити мусоид фароҳам оварда шавад. Бунёди Маҷмааи меҳмонхонаҳо дар доираи “Соли рушди сайёҳӣ ва ҳунарҳои мардумӣ” талаботи рӯз маҳсуб ёфта, хизматрасонии сатҳи олӣ ва замонавӣ метавонад теъдоди сайёҳону гардишгаронро боз ҳам афзун созад.
Раиси вилоят ҳамзамон таъкид кард, ки дар доираи 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон дар тамоми шаҳру ноҳияҳои вилоят корҳои ободониву созандагӣ бомаром идома дорад. Дар ин раванд дар ноҳияи Айнӣ низ корҳои бунёдкорӣ вусъати тоза пайдо намуда, аз оғози сол то имрӯз беш аз 20 иншооти гуногун мавриди истифода қарор гирифтааст. Илова бар ин, бунёди комплекси варзишӣ ва боғи фарҳангӣ – фароғатӣ, варзишгоҳ бо 10 ҳазор ҷойи нишаст, ҳавзи шиноварӣ барои кӯдакону наврасон, майдончаҳои гуногуни варзишӣ, корхонаҳо ва дигар иншооти муҳими иҷтимоӣ ҷараён дорад, ки бо мавриди истифода қарор гирифтани онҳо симои ноҳия дигаргун ва сатҳи зиндагии мардум боз ҳам беҳтар хоҳад шуд.
Ёдовар бояд шуд, ки Маҷмааи меҳмонхонаҳо бо дастгирии Ҳукумати Ҷумҳурии Тоҷикистон, мақомоти иҷроияи ҳокимияти давлатии вилоят ва саҳмгузории корхонаҳои саноатии дар ноҳияи Айнӣ фаъолиятбаранда бунёд хоҳад шуд.
Манбаъ: Хадамоти матбуоти Раиси вилояти Суғд
Нет комментариев