Бабри барфӣ ё озодапаланг дастгир гардид

0
1 906 просмотров

Сокинони деҳаи Имоми ҷамоати Ванқалъаи ноҳияи Шуғнон ҳафтаи охир шоҳиди  ҳамлаи бабри барфӣ ба чорвои хонагӣ шуданд. Дар натиҷаи ин ҳамла 41 сар чорвои сокинон талаф ёфт. Сокини ин деҳа Мамадсаид Симаков гуфт,  ки «соати чори субҳ ҳамсари ман ба оғилхона рафта, дарро кушода мебинад, ки 36 сар моли майда ба хун оғуштаанд ва  дар кунҷи оғилхона бабри барфӣ истодааст. Ҳамсарам дарро зуд баста, давида ба хона омад.

Манбаи акс сомонаи расмии АМИТ «Ховар»

Ман белро гирифта, дарро кушодам. Бабри барфӣ маро тела дода, ба ҷониби кӯҳсор гурехт». Рӯзи дигар боз бабр ба деҳа фаромада, панҷ сар моли майдаи сокини ин деҳа Имомёрбек Чоршанбиевро ҳадафи ҳамла қарор дод. Ин дафъа соҳиби хона дару равзанаи оғилхонаро сахт баста, ба Раёсати муҳити зисти вилоят хабар дод. Сардори шуъбаи олами наботот ва ҳайвоноти раёсати мазкур Шакар Юсуфбеков гуфт, ки «баъди ба маҳали ҳодиса расидан қафаси оҳанинро дар назди дари оғилхона гузоштем. Бабри барфӣ гӯштро дар даруни қафас дида, худаш вориди он шуд. Баъдан ин бабр ба ағбаи Кӯҳтезак, ба як минтақаи дур аз маҳали аҳолинишин интиқол дода шуд». Намояндаи созмони байналмилалии «Пантера» дар Тоҷикистон Ҷурабек Баҳриев аз муносибати хайрхоҳонаи сокинони деҳа нисбат ба ин ҳайвони нодир изҳори хушҳолӣ карда, гуфт, ки «дар ҳоли ҳозир шумораи онҳо дар Тоҷикистон аз 300 то 350 сар боқӣ мондааст.

Манбаи акс сомонаи расмии АМИТ «Ховар»

Мо ҳамеша ҳангоми суҳбат аз сокинони деҳа хоҳиш мекунем, ки дар ҳифзу нигоҳдории ин ҳайвони нодир бо  мо ҳамкорӣ кунанд. Дар навбати худ созмони мо дар ҳамкорӣ бо Барномаи рушди Созмони Милали Муттаҳид кӯшиш мекунад, ки ба оилаҳои зарардида кумаки моддӣ  расонад». Ба гуфтаи Ҷурабек Баҳриев, дар ду соли охир бабри барфӣ ва ё худ озодапаланг панҷ маротиба барои ҷустуҷӯи ғизо ба деҳоти назди доманакӯҳҳои вилоят  фаромадааст ва сокинон ин ҳайвони нодир ва зеборо  бо иззату эҳтиром  боз ба «хонааш» гусел карданд.

 

Манбаъ: сомонаи расмии АМИТ «Ховар»

Нет комментариев

Также рекомендуем

Мулоқот бо раиси Ҳукумати Федератсияи Русия Дмитрий Медведев

Имрӯз Президенти Ҷумҳурии Тоҷикистон Эмомалӣ Раҳмон раиси Ҳукумати Федератсияи Русия Дмитрий Медведевро, ки барои иштирок дар ҳамоиши навбатии сарони ҳукуматҳои кишварҳои иштирокдори Иттиҳоди Давлатҳои Мустақил ...