Ҷаласаи Шӯрои занони Вазорати корҳои дохилӣ

0
713 просмотров

Баланд бардоштани мақоми зан дар ҷомеа, бахусус дар мақомоти корҳои дохилӣ худ як воситаи мубориза ба муқобили хушунат ва зӯроварӣ дар оила ва паст задани ҳуқуқи занон мебошад, — қайд карда шуд дар ҷаласаи Шӯрои занони Вазорати корҳои дохилӣ, ки санаи 23-юми январ дар толори маҷлисгоҳи ВКД баргузор гардид. Дар он роҳбарият ва корманд-занони мақомоти корҳои дохилӣ иштирок намуданд. Дар оғози ҷаласа муовини Вазири корҳои дохилӣ генерал-майори милитсия Умарзода Икром Ислом зикр намуд, ки сиёсати ҳадафмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бобати баланд бардоштани мавқеи зан дар ҷомеа бо афзудани сафи занон дар мақомоти корҳои дохилӣ низ мусоидат намуд.

Манбаи акс сомонаи расмии mvd.tj

Дар солҳои соҳибистиқлолии Тоҷикистон барномаҳои зиёде таҳия гардидаанд, ки ба фароҳам овардани шароити мусоид баҳри рушди ҳамаҷонибаи зани тоҷик равона шуда, ояндаи хуби пешрафти ӯ ва боло рафтани мақоми занро дар ҷомеа муайян менамояд. И. Умарзода инчунин зикр кард, ки ҷомеаи имрӯзаро бе иштироки фаъоли занон, бе назардошти фикру андешаи онҳо тасаввур кардан душвор аст. Дар ҳамаи маъракаҳои муҳиму сарнавиштсоз занони бофарҳанги Тоҷикистон нақши созанда ва ибратбахш доранд. Боиси хушнудист, ки имрӯз тавассути сиёсати оқилонаю дурандешонаи Пешвои миллат муҳтарам Эмомалӣ Раҳмон оид ба баланд бардоштани мақоми зан дар ҷомеа ва ба вазифаҳои масъулу роҳбарикунанда таъин намудани занони фаъолу лаёқатманд дар ВКД, сафи занони соҳибмаълумот афзуда истодааст. Дар идома гуфта шуд, ки имрӯзҳо шумораи занон дар вазифаҳои масъулу роҳбарикунандаи мақомоти корҳои дохилӣ ба куллӣ фарқ мекунад. Зеро Вазири корҳои дохилӣ генерал-полковники милитсия Раҳимзода Рамазон Ҳамро ба масъалаи интихоб ва ба вазифаҳои масъулу роҳбарикунанда таъин намудани занони соҳибмаърифат чун ба як рукни муҳимми сиёсати давлатдорӣ муносибат менамоянд. Занҳо аз иҷрои вазифаҳои бардӯшдоштаи хеш бо сарбаландӣ баромада, мавриди дастгирии роҳбарияти Вазорат қарор доранд. Раиси Шӯрои занони ВКД полковники милитсия Азиза Давлатшоева зимни баромади хеш иброз намуд, ки зиёд гардидани сафи занони соҳибтахассус ва дорои ифтихори баланди миллию ватанпарастӣ дар мақомоти корҳои дохилӣ танҳо ба манфиати кор хоҳад буд, зеро беҳтарин ва арзандатарин хислат — поктинатию инсондӯстӣ, нексириштию фарҳангпарварӣ, созандагию заҳматписандӣ ва эҳсоси волои ватандӯстию ифтихори ватандориро танҳо дар самои занони покдомани мо метавон дарёфт кард.

Манбаи акс сомонаи расмии mvd.tj

Шӯрои занони ВКД ташкилоти ҷамъиятӣ буда, фаъолияти худро дар асоси Оиннома, сиёсати давлатӣ оид ба ҳифз ва таъмини ҳуқуқу манфиатҳои зан ва оила, ки ба муҳаё сохтани шароити баробар барои амалӣ гардидани ҳуқуқу манфиатҳои онҳо ва ба даст овардани баробарии гендерӣ, васеъ намудани доираи иштироки занҳо дар ҳалли вазифаҳои иҷтимоию иқтисодӣ ва идораи корҳои ҷамъиятӣ равона гардидааст, ташкил ёфтааст, — илова намуд Азиза Давлатшоева.

Ҳамчунин, раиси Шӯрои занони РВКД дар шаҳри Душанбе подполковники милитсия Бибиноз Хушвахтова баромад намуда, афзуд, ки дар РВКД дар шаҳри Душанбе ва ШВКД-и ноҳияҳои пойтахт дар давоми соли 2017-ум 89 нафар занон фаъолият менамоянд. Аз ин шумора 44 нафар афсар ва 45 нафар ҳайати қаторӣ мебошанд, ки дар вазифаҳои гуногун кору фаъолият доранд. Шӯрои занони ин раёсат пайваста бо масъалаҳои мубрам дар байни занон чорабиниҳо баргузор намуда, дар ҳифзи тартиботи ҷамъиятӣ ва амнияти шаҳрвандон саҳмгузор мебошанд. Дар охир интихоби раиси нави Шӯрои занон, муовини раиси шӯро, аъзо ва котиби шӯро барпо гардид. Ҳамин тавр, раиси Шӯрои занони ВКД подполковники милитсия Бибихол Хушвахтова интихоб гардид.

 

Манбаъ: сомонаи расмии mvd.tj  муаллиф:Тоҷиддин ЛАТИПОВ

 

 

 

 

 

Нет комментариев

Также рекомендуем