Барномаи «Ҳафта»

0
569 просмотров

Дар ноҳияи Шоҳмансури пойтахт Сарвари давлат Эмомалӣ Раҳмон Муассисаи таҳсилоти миёнаи умумии рақами 100 — ро ба истифода дод. Мактаби мазкур баъди навсозӣ мавриди баҳрабардорӣ қарор гирифтааст. Корҳои навсозӣ 11 марти соли 2015-ум оғоз гардида, 17 августи соли 2015 ба анҷом расид ва барои сохтмону таҷҳизонидани мактаб 11 миллиону 739 ҳазору 230 сомонӣ маблағ сарф шудааст. Мактаби дуошёна барои 1480 ҷой дар ду баст пешбинӣ шуда, аз 33 синфхона, 2 толори навбунёди варзишӣ бо 420 ҷойи нишаст иборат мебошад. Тавре иттилоъ доданд, баъди пурра ба истифода додани мактаб беш аз 60 нафар бо ҷойи кори доимӣ таъмин шуданд. Зимни шиносоӣ Сарвари давлат Эмомалӣ Раҳмон дар синфхонаҳои барҳавову замонавӣ бо шароити таълим аз наздик шинос шуда, бо хонандагон суҳбати самимӣ доир намуд. Дар рафти шиносоӣ Президенти мамлакат Эмомалӣ Раҳмон бо фаъолияти синфхонаи назорати интерактивии ҷамъиятӣ, ки ҳамзамон ба низоми ягонаи идоракунӣ дар соҳаи маориф пайваст аст, шинос шуд. Ин нуқтаи идоракунӣ, ки маркази махсуси иттилоотӣ мебошад, пурра бо системаи ягонаи идоракунии соҳаи маориф пайваст буда, ҷараёни дарс, рафтори толибилмон ва иртиботи пайвастаи волидайнро бо ин муассисаи таълимӣ  таъмин менамояд, ки мутобиқ ба низоми муосир бо охирин техникаи рақамӣ муҷаҳҳаз шудааст. Баъди ифтитоҳи бинои мактаб дар ҳамин ҷо Президенти мамлакат Эмомалӣ Раҳмон дар назди омӯзгорону хонандагон ва фаъолони ноҳияи Шоҳмансур суханронӣ карда, оид ба дастгирии ҳамаҷонибаи Ҳукумати мамлакат барои рушди соҳаи маориф ва беҳдошти сатҳи таълиму тарбия, ҷалби фарзандон ба таҳсил андешаронӣ намуд.  Устодону хонандагон дар навбати худ ба Сарвари давлат барои дастгирии ҳамаҷониба ва ғамхориҳои падарона изҳори сипосу қадрдонӣ карданд. Дар ин бора аз хадамоти матбуотии Президенти Ҷ Т иттилоъ доданд.

ХХХ

То аввали ҳафтаи равон дар Тоҷикистон ҳудуди 780 ҳазор тонна зироати ғалладона ҷамъоварӣ карда шуд, ки нисбат ба ҳамин давраи соли гузашта қариб 77 ҳазор тонна зиёд буда, ҳосилнокӣ аз ҳар як гектар 27 сентнерро ташкил медиҳад. Соли равон зироати ғалладона дар майдони умумии 324 ҳазор гектар кишт шудааст. «Айни замон барои ғунучини ҳосили зироати ғалладона 242 комбайн сафарбар шудааст . Дар ҳамин ҳол, мутобиқи маълумоти оморӣ, дар таркиби истеъмоли маводи ғизойӣ дар Тоҷикистон нон 60-65%-ро ташкил медиҳад. Дар ин давраи мушкили буҳрон ҳукуматдорон борҳо аз шаҳрвандон даъват ба амал оварданд, ки зироати ғалладона ва ордро ҳаддди ақал барои 2 сол захира намоянд. Қобили зикр аст, ки Тоҷикистон мустақилона талаботи худ ба зироати ғалладона ва ордро қонеъ карда наметавонад. Ин навъи маҳсулоти ғизойӣ асосан аз Қазоқистон ба ҷумҳурӣ ворид карда мешавад. Дар ин бора ОИ «Азия-Плюс» хабар медиҳад.

 

ХХХ

Бахшида  ба  24 – умин солгарди Рӯзи Истиқлолияти давлатии Ҷумҳурии Тоҷикистон дар Мақомоти иҷроияи ҳокимияти давлатии вилояти Суғд маҷлиси тантанавӣ баргузор шуд ва ба як қатор пешқадамони соҳаҳои гуногун мукофотҳои давлатӣ ва ифтихорномаҳо супорида шуд. Дар маҷлис Сарвазири Ҷумҳурии Тоҷикистон Қоҳир Расулзода, Раиси вилояти Суғд Абдураҳмон Қодирӣ, роҳбарони воҳидҳои сохтории мақомоти иҷроияи ҳокимияти давлатии вилоят, мақомоти ҳифзи ҳуқуқ, раисони шаҳру ноҳияҳо, фаъолон, намояндагони ташкилотҳои ҷамъиятӣ, аҳли адаб, собиқадорон ва занону ҷавонон аз шаҳру ноҳияҳои вилоят иштирок доштанд.  Ҷамъомади тантанавиро Раиси вилояти Суғд Абдураҳмон Қодирӣ ифтитоҳ намуда, Сарвазири Ҷумҳурии Тоҷикистон Қоҳир Расулзода зимни суханронии худ мардуми вилояти Суғдро аз номи Президенти кишвар ва Ҳукумати Ҷумҳурии Тоҷикистон бахшида ба иди Истиқлолияти давлатӣ табрик гуфта, ба мардуми вилояти Суғд сарбаландиву саодати рӯзгорро таманно намуд. Раиси вилоят Абдураҳмон Қодирӣ низ дар навбати худ кулли сокинони вилоятро бахшида ба иди Истиқлолият табрик гуфта, барои сокинон хушиҳои рӯзгорро орзу намуд. Дар фароварди ҷамъомад ба як қатор хизматчиёни давлатӣ ва пешқадамони соҳаҳои гуногун мукофотҳои давлатӣ ва ифтихорномаҳо супорида шуд. Аз ҷумла 12 нафар бо медали Хизмати шоиста, 1 нафар бо медали Шафқат ва 4 нафар бо Ифтихорномаи Ҳукумати ҷумҳурӣ сарфароз гардонида шуданд. Дар ин бора аз хадамоти матбуотии раиси вилоят иттилоъ доданд.

ХХХ

Бино ба иттилои хадамоти матбуоти мақомоти шаҳрдории Хуҷанд, раиси  шаҳр Раҷаббой Аҳмадзода бо ҳамроҳии роҳбарони воҳидҳои сохтории мақомоти маҳаллӣ дар ин чорабинии тантанавӣ иштирок намуд. Дар мавзеи мазкур аз ҷониби коргоҳи «Хуҷандторгмаш» корҳои васлу танзими воситаҳои лидхушкунӣ ва аттраксионҳо ба анҷом расида, он бо ибтикори соҳибкори инфиродӣ Музаффар Ҷумъаев ташкил карда шуд. Пешбинӣ мешавад, ки минбаъд барои истироҳаткунандагон ҷойҳои нишасту фароғати оилавӣ, марказҳои хизматрасонии фурӯши нӯшокиҳои ташнашикан маҳсулоти қаннодию ширинӣ ва ғайр ба истифода дода мешаванд. Дар ин макони фароғатӣ зиёда аз 30 намуд атраксионҳои дилхушкунӣ ва фарогатӣ насб гардида ҳамарӯза барои қабули сокинону меҳмонони маркази вилоят омода аст. Лозим ба қайд аст,ки дар ин руз меҳмонони нахустини ин маркази фароғатӣ тарбиятгирандагони муассисаҳои иҷтимоии кӯдакону наврасонва фарзандони оилаҳои ниёзманд  буданд. Барои кӯдакон ва тарбиятгирандагони парваришгоҳхо дар ин рӯз бо дастгирии Мақомоти иҷроияи ҳокимияти давлатии шаҳри Хуҷанд тамоми намуди хизматрасонӣ ройгон ташкил гардид. Дар баробари ин раиси шаҳри Хуҷанд ба масъулини соҳаи мақомоти маҳаллӣ супориш дод,ки минбаъд низ тибқи ҷадвали муқарраргардида бояд кӯдакону наврасони парваришгоҳхо ва оилаҳои эҳтиёҷманд ройгон истироҳат намоянд. Дар  ин бора аз хадамоти матбуотии раиси  шаҳри Хуҷанд иттилоъ доданд.

ХХХ

Аз 19 то 24 сентябри соли равон дар Қасри тенниси шаҳри Душанбе Мусобиқаи байналмилалӣ оид ба теннис байни наврасон барои дарёфти “Ҷоми Президенти Тоҷикистон” баргузор мешавад.  Дар назар аст, ки  дар ин мусобиқаи байналмилалӣ варзишгарон аз кишварҳои Арманистон, Туркманистон, Қазоқистон, Украина, Эрон ва дигар кишварҳо иштирок намоянд.   Ин 6-умин мусобиқаи байналмилалӣ оид ба теннис мебошад, ки теннисбозони наврас барои ба даст овардани «Ҷоми Президенти Тоҷикистон» миёни худ рақобат мекунанд. Ёдрас мешавем, ки “Ҷоми Президенти Тоҷикистон оид ба теннис” аз соли 2005 таъсис ёфта, дар байни варзишгарони наврас гузаронида мешавад.  Дар ин бора агентии Ховар хабар додааст.

Нет комментариев

Также рекомендуем