Барномаи «Ҳафта»

0
648 просмотров

Таҳти раёсати Президенти Ҷумҳурии Тоҷикистон, Раиси Ҳукумати кишвар Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид. Зимни баррасии масъалаи кадрҳо, ки дар оғози маҷлис сурат гирифт, аъзои нави ҳайати мушовараи Кумитаи телевизион ва радиои назди Ҳукумати Ҷумҳурии Тоҷикистон тасдиқ карда шуд. Лоиҳаҳои қонунҳо оид ба ворид намудани тағйиру иловаҳо ба қонунҳои амалкунандаи Ҷумҳурии Тоҷикистон, аз ҷумла ба қонунҳо “Дар бораи ҳаракат дар роҳ”, “Дар бораи боҷи гумрукӣ”, “Дар бораи адвокатура ва фаъолияти адвокатӣ”, “Дар бораи монополияҳои давлатӣ” ва ҳамчунин ба Кодекси ҷиноятӣ, Кодекси мурофиаи ҳуқуқвайронкунии маъмурӣ ва Кодекси ҳуқуқвайронкунии маъмурӣ маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон ирсол карда  шуд. Ба баррасии Маҷлиси намояндагони Маҷлиси Олии Ҷумҳурии Тоҷикистон ҳамчунин хулосаҳои Ҳукумати Ҷумҳурии Тоҷикистон ба лоиҳаҳои қонунҳо доир ба ворид намудани тағйиру иловаҳо ба як зумра қонунҳои амалкунанда, аз ҷумла ба қонунҳо “Дар бораи хизмати давлатӣ”, “Дар бораи роҳҳои автомобилгард ва фаъолияти роҳдорӣ”, “Дар бораи хоҷагиҳои деҳқонӣ” ва “Дар бораи маориф” ирсол гардиданд. Дар фароварди маҷлис Сарвари давлат Эмомалӣ Раҳмон дар назди масъулин доир ба муташаккилона ва босифат анҷом додани рухсатдиҳии сарбозони муҳлати хизмати ҳарбияшон анҷомёфта ва даъвати наваскарон ба хизмати ҳарбӣ, ҷамъбасти натиҷаҳои фаъолияти 9-моҳаи хоҷагии халқи кишвар, омодагӣ ба мавсими зимистон ва дигар масъалаҳои ҳалталаб супоришҳои мушаххас гузошт. Дар ин бора аз хадамоти матбуотии Президенти Ҷ.Т иттилоъ медиҳанд.

 ХХХ

Рӯзи 25-уми сентябри соли ҷорӣ,  дар ҳудуди Гвардияи миллии Ҷумҳурии Тоҷикистон аз ҷониби Президенти мамлакат Эмомалӣ Раҳмон барои хизматҳои шоён беш аз 120 нафар хизматчиёни ҳарбӣ, кормандони мақомоти ҳифзи ҳуқуқ, хизматчиёни давлатӣ ва  дигар шаҳрвандоне, ки дар амалиёти ҳарбии махсуси зидди гурӯҳи террористӣ аз худ ҷасорату маҳорат ва садоқати баланд нишон доданд, бо мукофотҳои давлатӣ ва кумакҳои моддию маънавӣ қадр карда шуд.  Тавре дар Фармони Президенти Ҷумҳурии Тоҷикистон омадааст ин нафарон «Барои хизмати содиқона ва саҳми арзанда дар таъмини ҳифзи ҳуқуқҳои конститутсионии шаҳрвандони Ҷумҳурии Тоҷикистон ва ҷасорату фидокорӣ ҳангоми мубориза бо ҷинояткорӣ ва нигаҳдории тартиботи ҷамъиятӣ» бо мукофотҳои давлатии Ҷумҳурии Тоҷикистон сарфароз карда мешаванд. Пеш аз ҳама Рустам Амакиев, собиқ командири дастаи воҳиди махсуси «Алфа»-и КДАМ  бо ордени Спитамен дараҷаи 1 ва рутбаи ҳарбии генерал-майор пас аз марг сазовор дониста шуд. Бо ордени Спитамен дараҷаи 1 Абдураҳмон Аламшозода, муовини аввали вазири корҳои дохилӣ ва Мансурҷон Умаров, муовини аввали раиси КДАМ сарфароз гардонида шуданд. Шумораи зиёди  хизматчиёни ҳарбӣ, кормандони мақомоти ҳифзи ҳуқуқ, хизматчиёни давлатӣ ва  дигар шаҳрвандон бо ордени Спитамен дараҷаи 2, ордени Шараф дараҷаи 2, медали Ҷасорат ва ифтихорномаҳои Ҷумҳурии Тоҷикистон қадрдонӣ карда шуданд. Ҳамчунин ба аҳли оила ва наздикону пайвандони 14 кормандони мақомоти қудратӣ, ки ҳангоми амалиёт ҳалок шуда буданд, кумакҳои моддию маънавӣ расонида шуд. Дар миёни бо мукофотҳои давлатӣ сарфарозшудагон 8 нафар сокинони дараи Ромити шаҳри Ваҳдат ҳузур доштанд, ки ба мақомоти ҳифзи ҳуқуқ дар ҷустуҷӯ ва нестунобуд кардани террористон мусоидати фаъол намуданд.Сарвари давлат Эмомалӣ Раҳмон зимни суханронӣ бори дигар аз номи худ ва Ҳукумати Ҷумҳурии Тоҷикистон ба тамоми низомиёни ҳарбӣ, кормандони мақомоти ҳифзи ҳуқуқ ва ҳамчунин шаҳрвандони ҷумҳурӣ, ки дар рафти амалиёти мазкур ҷасорату фидокорӣ ва матонату садоқат нишон доданд, арзи сипос намуда, ба аҳли хонавода ва наздикону пайвандони онҳое, ки дар рафти амалиёт ҷони худро фидо намуданд, изҳори тасаллияти ҳамдардӣ намуд. Маросими қадрдонии далерону фидокорон бо рафти гузашти низомӣ ба поён расид.Дар гузашти низомии бошукӯҳ беш аз 5 ҳазор нафар хизматчиёни ҳарбӣ ва кормандони мақомоти ҳифзи ҳуқуқ ширкат варзиданд. Дар ин бора аз хадамоти матбуотии Президенти Ҷ.Т хабар медиҳанд.

 ХХХ

Моҳҳои октябр-ноябри соли равон дар ҳудуди вилоят даъвати шаҳрвандони ҷинси мард, ки то рӯзи даъват ба синни 18 солагӣ мерасанд, инчунин шаҳрвандони синну солашон калон, ки ҳуқуқи ба таъхир андохтани мӯҳлати даъват ва ё озод будан аз даъват ба хизмати ҳарбиро надоранд, барои хизмат ба сафҳои Қувваҳои Мусаллаҳи Ҷумҳурии Тоҷикистон даъват карда мешаванд. Дар ин бора қарори Раиси вилоят аз 21 сентябри соли 2015, ба тасвиб расид. Тибқи ин қарор барои роҳбарӣ, назорат ва ташкили фаъолияти комиссияҳои даъватии шаҳру ноҳияҳо, комиссияи вилоятӣ оид ба даъвати шаҳрвандон ба хизмати ҳарбӣ таъсис дода мешавад. Дар ин бора аз хадамоти матбуотии Раиси вилоят иттилоъ медиҳанд.

 ХХХ

22 сентябр дар Маҷмааи таърихию фарҳангии Қалъаи Хуҷанди маркази вилоят дар чаҳорчӯбаи таҷлили Рӯзи Рӯдакӣ даври вилоятии озмуни «Рӯдакихонӣ» баргузор гардид. Ҳадаф аз гузаронидани он — дарёфти истеъдодҳои ҷавон, баланд бардоштани маънавиёти ҷомеа буда, дар озмун 33 нафар наврасону ҷавонон — мактабиёну донишҷӯёни мактабҳои таҳсилоти миёнаи умумӣ, миёнаи касбӣ ва мактабҳои олии вилоят иштирок доштанд. Дар чорабинӣ намояндагони шаҳру ноҳияҳои Бобоҷон Ғафуров, Спитамен, Ҷаббор Расулов, Қайроққум, Мастчоҳ, Айнӣ, Ашт ва ғайра  фаъол буданд. Дар ҷамъбасти озмун Раҳимҷон Бобоҷонов аз ноҳияи Бобоҷон Ғафуров сазовори  ҷои аввал, Фурӯзон Бобоев аз ноҳияи Зафаробод ба гирифтани ҷои дуюм ва Иқбол Илҳомзода аз шаҳри Конибодом ба гирифтани ҷои сеюи мушарраф гардиданд. Ғолибон бо тӯҳфаҳои хотиравӣ ва ифтихорномаҳои Раёсати фарҳанги вилоят сарфароз гардонида шуданд. Дар ин бора аз хадамоти матбуотии Раиси вилоят иттилоъ медиҳанд.

 ХХХ

Дар арафаи Иди Қурбон намояндагони Мақомоти иҷроияи ҳокимияти давлатии вилояти Суғд 232 нафар бошандагони Муассисаи давлатии Хона – интернати беморони рӯҳӣ дар ноҳияи Ҷаббор Расуловро аёдат намуда, барои онҳо дастурхони идона оростанд. Чорабиниҳои идона ҳамчунин дар Муассисаи махсус барои кӯдакони қувваи босираашон суст ва нобинои шаҳри Хуҷанд, Маркази минтақавии хизматрасонии иҷтимоӣ ба пиронсолон ва маъюбон дар шаҳри Хуҷанд, Муассисаи давлатии махсусгардонидашудаи табобатии Хона кӯдакони шаҳри Хуҷанд, Мактаб-интернати ёрирасони шаҳри Хуҷанд, Мактаб-интернати махсуси бачагони қувваи босираашон суст ва зарири шаҳри Исфара, Хонаи бачагони шаҳри Исфара, Хонаи кӯдакони байниноҳиявии шаҳри Истаравшан, Мактаб-интернат барои кӯдакони ятиму бепарастор ва аз оилаҳои камбизоати шаҳри Истаравшан, Муассисаи таълимии парваришгоҳи шаҳри Конибодом, Хона-интернати пиронсолон ва маъюбони шаҳри Панҷакент, Мактаб-интернати Мақомоти иҷроияи ҳокимияти давлатии вилояти Суғд дар шаҳри Чкалов ва ғайраҳо баргузор гардиданд. Аз ҷониби сарпарастони муассисаҳо барои бошандагон дастархонҳои идона ороста шуда, хотири қишри ниёзманди ҷомеа шод гардонида шуд. Хотиррасон мекунем,ки ҳамасола  22- юми сентябр дар Тоҷикистон  ҳамчун рӯзи Рӯдакӣ таҷлил гардида, он  ба бузургдошти шоири тавоно, қофиласолор ва бунёдгузори адабиёти тоҷику форс Абуабдуллоҳи Рӯдакӣ бахшида мешавад. Дар ин бора аз хадамоти матбуотии Раиси вилоят иттилоъ доданд.

 ХХХ

24 сентябри соли ҷорӣ, дар натиҷаи болои ҳам фурӯ рехтани издиҳоми зоирон дар ҷараёни маросими Ҳаҷ дар Мино 717 нафар ҳалок ва қариб 720 нафари дигар захмӣ шудаанд. Дар ин бора раёсати дифои шаҳрвандии Арабистони Саудӣ дар гузорише иттилоъ додааст. Бино ба иттилои манбаъ, амалиёти наҷотдиҳӣ дар маҳалли ҳодиса бо ҷалби 400 мошини «Ёрии таъҷилӣ» ва 4 ҳазор масъули раёсати дифои шаҳрвандии Арабистони Саудӣ идома дорад. Ёдовар мешавем, ки имсол зиёда аз 2 миллион зоир аз саросари олам баҳри адои фарзи Ҳаҷ ба Каъба рафтаанд. Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон хабар медиҳад, ки дар фоҷиаи дар Маккаи мукаррама бавуқӯъпайваста ҳоҷиёни Тоҷикистон осеб надидаанд. Соли равон беш аз 6 ҳазору 300 нафар шаҳрвандони Тоҷикистон баҳри адои фарзи Ҳаҷ ба Арабистони Саудӣ сафар кардаанд. Дар ин бора агентии Ховар хабар медиҳад.

 ХХХ

Паҳлавонони тоҷик дар мусобиқаи қаҳрамонии ҷаҳон оид ба дзюдо байни собиқадорон, ки рӯзҳои 21-24 сентябр дар шаҳри Амстердами Ҳолланд баргузор шуд, як медали нуқра ва ду медали биринҷӣ ба даст оварданд. Мусобиқа байни мардону занон бо ширкати 788 варзишгари аз 30-сола боло аз 68 кишвар аз рӯи 7 дараҷаи вазнҳо ва мувофиқи синну сол дар 9 гурӯҳ сурат гирифт.  Тоҷикистонро чаҳор нафар – Давлатшо Бачабеков, Хайрулло Назриев, Мирзо Абдуллоев ва Бозоралӣ Маҳмудов – намояндагӣ карданд. Дар ин бора радиои Озодӣ хабар медиҳад.

 

Нет комментариев

Также рекомендуем