ХХХ

Дар  шаҳри  Душанбе  мулоқоти раиси  Палатаи  савдо  ва  саноати  Тоҷикистон  Шариф  Саид бо  мутахассиси  лоиҳаи «Мусоидат  ба   тиҷорат» — и  барномаи  рушди  СММ  — UNDP  дар  Ҷумҳурии  Тоҷикистон  Гулсара  Мамадҷонова  ва  мушовири  маҳаллии   лоиҳаи  мазкур  Рустам  Шодибеков  баргузор  гардид. Ҷонибҳо  дар  ҷараёни  мулоқот  масоили  ҳамкории  муштарак  дар  ҳошияи  лоиҳаи «Дастгирии  таъсиси  марказҳои   рушди тиҷорат  дар   сатҳи миллӣ  ва  доир  намудани  тренингҳои   доимии   соҳибкорон» —  ро  мавриди  муҳокима қарор  доданд. Лоиҳаи  мазкурро  ПСС ҶТ  якҷоя бо  лоиҳаи «Мусоидат ба тиҷорат» — и Барномаи  рушди  СММ — UNDP  дар Тоҷикистон бо  дастгирии  молиявии Ҳукумати  Финляндия  дар  амал  татбиқ  менамояд. Зимни  мулоқот  ҳамчунин  масоили  ташкилии   иштироки   соҳибкорони   саноати  хӯрокворӣ ва  истеҳсолкунандагони  маҳсулоти кишоварзии  Тоҷикистон  дар   намоишгоҳи  махсуси   байналмилалии  ПРОДЭКСПО, ки  аз  9  то  13  январ дар  шаҳрпи  Маскав  баргузор  мегардад, баррасӣ  шуданд. Ба  гуфтаи  Шариф  Саид, дар  шароити Созмони  умумиҷаҳонии  савдо   беҳдошти   бахши  тиҷорат  бо  иштироки  соҳибкорони тоҷик дар  намоишгоҳҳои  байналмилалии  савдо  ба густариши  ҳамкории  минтақавӣ,   афзоиши   неруи  содиротӣ, рақобатпазирии  маҳсулоти  Тоҷикистон,  афзоиши  маҷмӯи  маҳсулоти   дохилӣ,  бунёди   корхонаҳои  муштарак,  ба  имзо расонидани  қарордодҳои  мутақобилан  муфид,  фароҳам овардани  ҷойҳои нави  корӣ  ва  баланд  бардоштани  сифати  зиндагии  аҳолӣ  мусоидат  мекунад. Дар ин бора агентии Ховар хабар медиҳад.

ХХХ

Сокини  ноҳияи  Фархори  вилояти  Хатлон  Давлаҳмад  Холов  бо мусоидати Намояндагии Вазорати  меҳнат,  муҳоҷират  ва  шуғли  аҳолии  ҶТ  дар  ФР  оид ба  муҳоҷират қарзи  маошашро  дар  ҳаҷми  180  ҳазор  рубл гирифт. Тавре  ки котиби  матбуоти Намояндагии хадамоти  муҳоҷирати ҶТ дар  ФР Иброҳим  Аҳмадов  хабар  дод, Давлаҳмад  Холов   дар  арафаи  Соли  Нав  дар  бораи  расонидани  ёрӣ  барои ҳалли  ин   масъала  ариза  пешниҳод  карда  буд. Ба  гуфтаи  номбурда  мавсуф  соли  гузашта  ҳамроҳи   хешовандаш  О.Зиёев  дар   ширкати  сохтмонии «СУ — 155»  шаҳри  Маскав  кор  карда, тайи  се  моҳи  фаъолияти  меҳнатӣ ҳаҷми  маошашон  300  рублро  ташкил  дода буд. Ширкати номбурда  як  қисми  ин  маблағро   дар  давраи  фаъолияти шахсони  зикршуда  пардохта,  ваъда дода буд, ки  бақияи  онро  баъди  анҷоми  корҳои  дар  нақша  гирифташуда  мепардозад. Вале ширкат  ба  ваъдааш  вафо  накард. Баъди  суҳбати  корманди   намояндагӣ бо  роҳбарияти  ширкати  сохтмонӣ ин  қазия  ба таври  мусбат  ҳал  шуда,  муҳоҷирони  меҳнатӣ  қарзи  маошашонро  гирифтанд. Ёдовар  мешавем, ки  соли  2014 маблағҳои  бо мусоидати   намояндагӣ  пардохташудаи  муҳоҷирони  меҳнатӣ  беш  аз 24  миллион  рублро ташкил  дод. Дар ин бора агентии Ховар хабар медиҳад. 

ХХХ

Ронандаи мошини тамғаи “Чанху”, рақами давлатиаш 99-60 А РТ 04, Ҳусайндод Саъдиев, соли таваллудаш 1977, сокини ноҳияи Роштқалъа, ҳангоми ҳаракат бо роҳи ғайринақлиётгарди ҷамоати деҳаи Барвози ноҳия аз сабаби боридани барфи зиёд ва лағжон шудани роҳ аз уҳдаи идораи мошин набаромад ва он  ба самти қафо лағжида, ба чуқурии 150 метр сарозер шудааст. Бино ба иттилои хадамоти матбуоти ВКД дар натиҷа худи ронанда Саъдиев Ҳ. ва 5 нафар мусофири ин мошин: Абригул Хусравбеков, соли таваллудаш 1950, Уснибону Пулодова,  соли таваллудаш 1982, Мавлоёр Худоёров, соли таваллудаш 2008, Кабир Сабздавлатов, соли таваллудаш 1988 ва Гулрӯ Ватаниева, соли таваллудаш 1991, сокинони ҳамин ноҳия ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расиданд. Мусофирони дигар: Рамзия Сабздавлатова,  соли таваллудаш 1983, Носиршо Худодов, соли таваллудаш 1979, Назардод Худодов, соли таваллудаш 1974 ва Давлатназар Силтолиев, соли таваллудаш 1970, сокинони ноҳияи мазкур ҷароҳатҳои ҷисмонӣ бардоштанд. Дар ин бора агентии Ховар хабар медиҳад.

ХХХ

Дар нишасти хабарии Корхонаи Вохидии Давлатии «Хоҷагии манзиливу коммуналӣ» ҷой доштани мушкилоти зиёд дар соҳа, бахусус дар дастрасии ҳамагон қарор надоштани  оби ошомиданӣ мавриди баррасӣ қарор гирифт. Зикр шуд, ки имрӯз 45%  сокинони кишвар бо оби истеъмолӣ таъминанду халос. Сабаби сари вақт аз байн нарафтани  ин мушкилот ва таъмин нашудани кулли сокинон бо оби ошомиданӣ- ин набудани маблағи зарурист. Ба таъкиди сарвари ин ниҳод Алимурод Тағоймуродов, барои  пурра таъмин намудани сокинони кишвар бо об ва муҷаҳҳаз гардонидани корхона бо технология 2 миллиард доллари амрикоӣ зарур аст. Дар ин бора агентии Ховар хабар медиҳад.

ХХХ

khovar.tj

Тоҷикистон дар рейтинги нави ФИФА (Федератсиони байналмилалии футбол), ки дирӯз, 8-уми январ нашр шудааст, бо 215 имтиёз дар байни 209 тими миллӣ ҷойи 136-умро касб кардааст. Тавре ки дар ин бора аз Федератсияи футболи кишвар хабар доданд, дастаи миллии Тоҷикистон дар байни кишварҳои собиқи шӯравӣ аз Қазоқистон (ҷойи 139-ум), Туркманистон (ҷойи 147-ум) ва Қирғизистон (ҷойи 152-юм) боло ҷойгир шудааст. Мунтахаби Украина, ки дар байни кишварҳои ИДМ пешсаф аст, дар рейтинги ҷаҳонӣ дар зинаи 25-ум қарор дорад. Баъдан Русия мақоми 31-ум ва Ӯзбекистон мақоми 71-умро касб кардааст. Тими мунтахаби Олмон дар феҳристи нави ФИФА бо 1725 имтиёз дар ҷойи  аввал аст. Дастаи мунтахаби Аргентина бо 1538 имтиёз дар ҷойи дуюм ва тими Колумбия бо гирифтани 1450 имтиёз дар ҷойи сеюм қарор дорад. Гуфта мешавад, дар байни даҳгонаи беҳтарин, инчунин Белгия бо 1417, Ҳолланд  бо1374, Бразилия бо 1316, Португалия бо 1160, Фаронса бо 1160, Испания бо 1142 ва Уругвай бо 1135 имтиёзӣ  ҷойгир шудаанд. Ёдовар мешавем, ки тибқи рейтинги ФИФА аз соли 1993 инҷониб имтиёзҳо ба кишварҳо аз рӯи натоиҷи дастаи мунтахаби миллиашон дар давраи чаҳор сол дода мешавад. Натиҷаи беҳтарини тими мунтахаби Тоҷикистон дар тамоми таърихаш дар феҳристи ФИФА ҷойи 106-ум дар моҳи июни соли 2013 мебошад. Дар ин бора агентии Ховар хабар медиҳад.