БАРНОМАИ ҲАФТА

0
225 просмотров

Президенти кишвар Эмомалӣ Раҳмон роҳбарони сохторҳои амният ва хадамоти махсуси кишварҳои аъзои Иттиҳоди Давлатҳои Мустақилро, ки барои иштирок дар ҳамоиши навбатии Шӯрои роҳбарони ин соҳаи давлатҳои созмони номбурда ба Тоҷикистон ташриф овардаанд, ба ҳузур пазируфт. Дар мулоқот авзои кунунии минтақа ва ҷаҳон, роҳҳои пурзӯр намудани муборизаи муштарак бо хатарҳои терроризму ифротгароӣ ва дигар таҳдидҳо баррасӣ шуд. Тавре зикр гардид, масоили вобаста ба тадбирҳои муштарак барои таъмини амнияти иттилоотӣ, пешгирӣ аз фаъолияти унсурҳои терроризму ифротгароӣ, миллатпарастии иртиҷоӣ ва роҳ надодан ба бетартибиҳои оммавӣ аз мавзӯъҳои асосии ҳамоиши навбатии Шӯрои роҳбарони сохторҳои амният ва хадамоти махсуси кишварҳои аъзои Иттиҳоди Давлатҳои Мустақил дар шаҳри Душанбе мебошад.Таъкид гардид, ки барои таъмини амну суботи доимӣ дар минтақа ва мусоидат ба рушди бонизоми ҷомеа бояд тамоми тадбирҳои муассири пешгирӣ аз хатарҳои ҷаҳони муосир ва роҳҳои ба амал баровардани ин чораҳо андешида шаванд. Дар ин бора аз Хадамоти матбуоти Президенти Ҷумҳурии Тоҷикистон иттилоъ доданд.

 XXX

Дар Давлати Кувайт ҷаласаи 42-юми Шӯрои вазирони корҳои хориҷии давлатҳои аъзои Созмони Ҳамкории Исломӣ, кори худро идома бахшид. Вазири корҳои хориҷӣ Низомиддин Зоҳидӣ дар он иштирокчиёни чорабиниро бо мавқеи Ҷумҳурии Тоҷикистон нисбат ба масъалаҳои мубрами олами ислом, ки ба рӯзномаи ҷаласа ворид шудаанд, шинос кард ва аз кишварҳои аъзои Созмони Ҳамкории Исломӣ ҷиҳати иштироки фаъол дар Конфронси дарпешистодаи байналмилалӣ дар мавзӯи об дар шаҳри Душанбе даъват ба амал овард. Дар ҳошияи рӯзи дуввуми кори ҷаласа  мулоқоти дуҷонибаи муовини вазири корҳои хориҷии Ҷумҳурии Тоҷикистон Низомиддин Зоҳидӣ бо муовини вазири корҳои хориҷии Давлати Кувайт Холид Сулаймон Ҷоруллоҳ сурат гирифт ва зимни он тамоми маҷмӯи масъалаҳои рушду тақвияти равобити дуҷонибаи байни Тоҷикистон ва Кувайт мавриди муҳокима ва ибрози назар қарор доштанд. Дар ин бора агентии Ховар хабар медиҳад.

 XXX

Дар шаҳрҳои Теҳрон ва Шерози Эрон ҳамоиши байналмилалии бузургдошти Хоҷа Ҳофизи Шерозӣ  баргузор гардид, ки дар он ду нафар устодони ДДХ профессор Матлуба Хоҷаева ва мудири кафедраи адабиёти классикии тоҷик Нуралӣ Нурзод ширкат намуданд.Дар ин ҳамоиши бонуфузи байналмиллалӣ ҳофизпаҷӯҳон аз кишварҳои Тоҷикистон, Афғонистон, Туркия, Ҳиндустон, Бангладеш, Қазоқистон ҳузур пайдо намуданд. Устодони ДДХ профессор Матлуба  Хоҷаева дар мавзӯи «Ҳофиз ва Пушкин» ва дотсент Нуралӣ Нурзод зери унвони «Таъсири Ҳофиз дар таҳаввули шеъри форсии Фароруд” суханронӣ намуданд. Дар ҳошияи баргузории ҳамоиш ширкаткунандагон ба зиёрати мазороти Шайх Саъдӣ ва Ҳофизи Шерозӣ мушарраф гардиданд. Ҳамоиш ду рӯз идома ёфта, дар он муҳимтарин масоили марбут ба зиндагиномаву осор, афкори фалсафӣ, адабӣ, ахлоқӣ, сабки таълифот ва амсоли ин баррасӣ шуданд. Ҳамчунин дар ин ҳамоиш муҳаққиқони рӯзгор ва осори Носири Хусрав аз кишварҳои Амрико, Инглистон, Олмон, Тоҷикистон, Афғонистон, Озарбойҷон, Сурия ва амсоли ин ширкат ва суханронӣ намуданд. Дар ин бора аз хадамоти матбуотии Раиси вилоят иттилоъ медиҳанд.

 XXX

Иштирокчии 29-умин “Конвенсияи байналмилалӣ оид ба сифат дар соли 2015” — Осоишгоҳи “Зумрад”-и шаҳри Исфара соҳиби ҷоизаи байналмиллалии тиллоии “Куалити Саммит” гаштааст. Маросими ҷоизасупорӣ дар шаҳри Ню-Йорк-и ИМА, ки дар он намояндагони 72 ширкати ҷаҳонӣ иштирок доштанд,  доир гашта, Осоишгоҳи “Зумрад” дар номгӯи “Барои сатҳу сифати олии хизматрасонӣ” ҷои пешсафро касб намуда, ҷоизаи мазкурро мушарраф гаштааст. Бояд хотиррасон кард, ки қаблан низ дар замони шӯравӣ осоишгоҳи «Зумрад»  аз осоишгоҳҳои намунавӣ ва дорои шӯҳрати хосса ба ҳисоб рафта, он чандин маротиба ғолиби озмунҳо байни осоишгоҳҳои  умумииттифоқӣ гаштааст. Дар ин бора агентии Ховар хабар медиҳад.

 XXX

Дар  қароргоҳи  Федератсияи  футболи  Тоҷикистон  маросими  қуръапартоии  даври  пешакии Ҷоми  ҷумҳурӣ  баргузор гардид. Дар  марҳалаи  аввали  мусобиқот барои  дарёфти Ҷоми  миллӣ  13  дастаи  лигаи  якум  қувваозмоӣ  менамоянд. Тавре  ки  аз Федератсияи  футболи  Тоҷикистон  хабар  доданд,  вохӯриҳои даври   пешакӣ  дар  ду  минтақа баргузор гардида, аз  рӯи  натиҷаи онҳо чор  дастаи   минтақаи  якум  ва ду  дастаи  минтақаи  дуюм  ба вохӯриҳои ҳаштякниҳоӣ барои  дарёфти  Ҷоми  Тоҷикистон  роҳхат  пайдо мекунанд. Дар ин бора агентии Ховар хабар медиҳад.

Нет комментариев

Также рекомендуем