Ихтиёри Иқболшоҳ бо суруди “Бе Лайло” Ғолиб гардид

0
410 просмотров

Сарояндаи ҷавону умедбахш ва серғайрату боистеъдоди Хуҷанди бостонӣ Ихтиёри Иқболшоҳ ҳамеша дар эҷоду ҷустуҷӯи суруду таронаҳои наву пурмазмун мебошад. Ин аст, ки ӯ бо суруди навэҷоди худ “Бе Лайло”  дар ҳафтаи якуми моҳи декабр аз ҳама зиёд овоз гирифта, дар лоиҳаи ҷадид аз радиои “Тирози Ҷавонӣ” бо ном Хит-парад ғолиб омадааст.

Мақсуди Ихтиёр, ки бештар бо тахаллуси Ихтиёри Иқболшоҳ машҳур аст,  1-уми феврали соли  1991 дар шаҳри Хуҷанд ба дунё омадааст.

Бо хоҳиши мухлисони сершумори суруду таронаҳои Ихтиёри Иқболшоҳ бо ӯ мусоҳибае оростем:

– Фаъолияти эҷодии худро кай оғоз кардед?

– Фаъолияти эҷодии ман, аз соли 2007 моҳи феврал сар шуда буд.  Дар консерти “Ёдбуди Ҳасани Вализод”, ки яккахони гурӯҳи “Иқбол”буд иштирок намуда, ҳамон рӯз пайрави гурӯҳи Иқбол шудам. Дар оғози кор,  ман бо продюсери гурӯҳ – Фирӯз Юсуфов самти асосии иштироки маро ҳамчун сароянда дар ин коллектив аниқ намудем.

Вале зиндагӣ ва роҳи эҷодии санъаткор  пурталотӯб аст ва айни ҳол бо розигии Фирӯз Юсуфов  тахаллуси “Ихтиёри Иқболшоҳ”-ро қабул намуда, худ танҳо фаъолият бурда истодаам.

– Шавқу ҳаваси Шумо ба ғайр аз санъаткорӣ?

– Гӯш кардани мусиқӣ,  ба варзиш машғул шудан ва эҷод кардани шеърҳо.

– Кадом хислатҳои инсониро мепарастед?

– Он хислатҳои инсонро мепарастам, ки нишонаи инсонгарӣ, эътиқоди қалбӣ ва худотарсиро дошта бошад. Ҳамаи мо бегуноҳ нестем, барои то  марраи пешгузошта расидан ба хатоиҳо роҳ медиҳем…  Муҳимаш, сари вақт огоҳ шавем ва ба такрории хатоиҳо роҳ надиҳем!

– Шогирд тарбия кардаед?

– Не, ба фикрам  ман худам  то ҳол  аз меҳр ва парвариши устод нигаронӣ дорам.

– Муносибати Шумо ба хониш ва навозиши «зинда».

– Муносибати ман ба хониши зинда хеле ҷиддӣ мебошад, барои он ки бо хониши зинда баромад мекунам. Ҳаракат дорам, ки дар консетрҳои худ пурра бо хониши зинда баромад кунам.

– Кадом санъаткори шинохта ва гурӯҳи касбиро мепарастед?

– Муборакшоҳ, Далер Назаров ва Ҳасани Вализодро.

– Равияи мусиқавии Шумо?

– Равияи мусиқавии ман – оммавӣ  (populare)  мебошад. Фаҳмо, содда ва шунаво будани маводи эҷодӣ – ин самт ва равияи ман дар эстрада.

– Агар маблағи зиёд медоштед ба куҷо ва ё ба кадом кор сарф мекардед?

– Аввалан ба камбағалон ва он одамоне, ки мӯҳтоҷи дастгирӣ  ҳастанд ёрдам мекардам ва баъдан корҳои худро ба пеш мебурдам.

= Ҳолати хандовар, аҷоиб ва хотирмон, кӣ дар фаъолияти эҷодии Шумо рӯй дода буд:

– Бале,  ҳолатҳои хандовар дар фаъолияти санъаткор  бисёр рӯй медиҳанд. Расман,  Шумо агар ба паси саҳна пеш аз консерт,  вақти машқ ё  ҷараёни эҷодкорӣ мушоҳида намуда онро сабт намоед,  ин худаш аллакай яке аз филмҳои мазҳакавии беҳтарин шуданаш мумкин, ки ҳатто ҷоизаи “Оскар”-ро сазовор аст (шӯхиомез).

– Нақшаи Шумо дар соли 2018, яъне дар оянда чиро мехоҳед амалӣ намоед?

– Ин  пеш аз ҳама ташкили консерҳо дар қаламрави вилояти Суғд. Инчунин вобаста ба мавсиму идҳои дар пеш буда, эҷоди сурудҳои нав ва банаворгирии клипҳо.

 

Дар интиҳо гуфтанием, ки суруду таронаҳои наву ҷолиби Ихтиёри Иқболшоҳро метавонед тавассути шабакаи радиоии “Тирози Ҷавонӣ” бишнавед ва ҳаловат баред. Инчунин минбаъд ҳамарӯза соати 09:30 аз мавҷи 106,7 FM – барномаи “Хит-парад” – бо суруду таронаҳои тозаву ҷаззобро гӯш кунед!

 

 

 

Нет комментариев

Также рекомендуем

Аз соли нав номгузорӣ тағйир меёбад

Кумитаи забон ва истилоҳоти Тоҷикистон «Феҳрасти ягонаи номҳои миллӣ»-ро барои тасвиб ба ҳукумат пешниҳод кард. Ин феҳраст аз чор ҳазор намунаи номҳои тоҷикӣ иборат аст ...