Боғи Лучоб — дар ноҳияи Абӯалии Синои шаҳри Душанбе дар теппаи Лучоб (баландии 60 метр аз сатҳи баҳр) байни соҳили дарёҳои Варзоб (Душанбе) ва Лучоб воқеъ аст.
Дар қисми шимолии он маҳаллаи Лучоб, бинои Донишкадаи тарбияи ҷисмони Тоҷикистон ва дар ҷануби боғ оромгоҳи намояндагони илму фарҳанг ҷойгир аст. Соли 1980 дар қисми ҷанубии боғ мақбараи Шоири халқии Тоҷикистон Мирзо Турсунзода (меъмор Б. Зуҳуриддинов, ҳайкалтарош Д. Рябичев) бунёд шудааст. То мақбараи Мирзо Турcунзода зинапояе сохта шудааст, ки аз ду тарафаш гулбоғи зебо дорад.
Дар майдони боғ дарахту буттаҳои гуногун ҷамъ оварда шудаанд. Боғ яке аз ҷойҳои истироҳати сокинони шаҳр ва сайругашти мактаббачагон мебошад. Дар қисми шарқии боғи Лучоб соли 2012 боғи дигари шаҳри Душанбе – Боғи «Пойтахт» бунёд шудааст.
Дар майдончаи махсуси теппаи Лучоб ва мақбараи Шоири халқии Тоҷикистон Мирзо Турсунзода оромгоҳи намояндагони илму фарҳанг — Лоиқ Шералӣ, Фазлиддин Муҳаммадиев, Ҷалол Икромӣ, Тўҳфа Фозилова, Ғаффор Валаматзода, Малика Собирова, Рауф Баротов, Бозор Собир, Мўъмин Қаноат ва дигарон воқеъ аст.
Нет комментариев