Бонки миллии Тоҷикистон муҳлати ваколати маъмурияти муваққатиро дар ҶСК «Тоҷиксодиротбонк» тамдид намуд

0
576 просмотров

Раёсати Бонки миллии Тоҷикистон дар бораи ба муддати 3 моҳи дигар тамдид намудани муҳлати фаъолияти маъмурияти муваққатӣ дар ҶСК «Тоҷиксодиротбонк» қарор қабул намуд, ки ин барои барқарорсозии пурраи фаъолияти  бонк мусоидат хоҳад кард.
Дар ин бора ба АМИТ «Ховар» аз хадамоти матбуотии БМТ хабар доданд.
Тавре қаблан иттилоъ дода будем, бо сабаби риоя накардани талаботи қонунгузорӣ, санадҳои меъёрии ҳуқуқӣ, дуруст идора накардани хавфҳо, аз ҷумла хавфҳои қарзию  пардохтпазирӣ ва ошкор кардани норасоиҳои молиявӣ, вайронкунии аксар меъёрҳои мақбул аз ҷониби ҶСК «Тоҷиксодиротбонк» ва бо мақсади солимгардонии молиявии бонк тибқи Қарори Раёсати Бонки миллии Тоҷикистон аз 18 майи соли 2016 маъмурияти муваққатӣ ба муҳлати то се моҳ таъйин карда шуд.
Ҳамзамон намояндагони маъмурияти муваққатӣ дар панҷ филиали минтақавии ҶСК «Тоҷиксодиротбонк» (Қурғонтеппа, Кӯлоб, Хоруғ, Рашт ва Хуҷанд), ки назорати фаъолияти филиалҳоро амалӣ менамоянд, таъйин гардиданд.
Дар муддати се моҳи фаъолияти худ маъмурияти муваққатӣ корҳои муайянеро оид ба солимгардонии фаъолият ва  устувории кори бонк  ба анҷом расонид. Дар ин муддат фаъолияти ҷории бонк ҳамарӯза назорат ва бо қабули қарорҳои муассир шаффофияти он таъмин карда мешуд. Тибқи супориши Мудири муваққатӣ гурӯҳи бозгардонии қарзҳо, аз ҷумла қарзҳои  мушкилситон ташкил карда шуд. Дар натиҷаи кори самаранок 41,5 млн. сомонӣ маблағи қарзи асосӣ ва 14,6 млн. сомонӣ фоизи онҳо, дар маҷмӯъ 56,1 млн. сомонӣ баргардонида шуданд. Маблағҳои мазкур, пеш аз ҳама, барои пардохти уҳдадориҳои аввалиндараҷаи бонк равона гардида, аз ҷумла, пардохти саривақтии маблағҳо аз рӯи лоиҳаҳои музди меҳнат тавассути кортҳои пардохтӣ дар ҳаҷми умумии 7,5 млн. сомонӣ ба зиёда аз 30 ҳазор нафар анҷом дода шуд.
Дар доираи ташкили корҳои фаҳмондадиҳӣ бо шахсони воқеӣ ва ҳуқуқӣ, ки дар бонк ҳисобҳо доранд, шартномаҳо оид ба тамдиди муҳлати амонатҳои амалкунанда баста шуданд, аз ҷумла амонатҳои муҳлатнок  тамдид карда шуда, фоизи пасандозҳои 909 амонатгузор ба маблағи 133,4 млн. сомонӣ бознигарӣ шуд.
Инчунин корҳо дар мавриди оптимизатсияи хароҷот, коҳиш додани масрафи амалиётӣ ва хоҷагидорӣ амалӣ мегарданд.
Дар баробари ин, бо мақсади таъмини фаъолияти муназзам ва устувори бонк, гузаронидани маҷмӯи чорабиниҳои дахлдор ва дастурӣ амалӣ намудани онҳо вақти иловагӣ, беҳсозии идоракунии корпоративӣ ва аз ҷумла, тақвияти идорасозиро тақозо менамояд.
Дар айни замон дар навбати аввал фавран солимгардонии фаъолияти мукаммали «Тоҷиксодиротбонк» тавассути барқарорсозии сармояи он ва фаъолтар намудани корҳо дар самти баргардонидани қарзҳои мушкилситон ва сари вақт иҷро кардани уҳдадориҳои бонк дар назди амонатгузорон ва кредиторон, инчунин барқарор намудани фаъолияти он ҳамчун бонки низомсози рақобатпазир афзалиятнок дониста мешавад.
Бо ин мақсад, Бонки миллии Тоҷикистон гуфтушунидро бо БАТР идома дода, ба нақша гирифтааст, ки БАТР, ХБА ва Бонки ҷаҳониро ба раванди таҳияи барномаи мукаммали дастгирии низоми бонкии Тоҷикистон ҷалб намояд.

Манбаъ: АМИТ «Ховар»

Нет комментариев

Также рекомендуем