Дар Варзишгоҳи марказии шаҳри Душанбе даври сеюм ва ҷамъбастии бошукӯҳтарин чорабинии варзишии сол – Фестивали бозиҳои миллии варзишӣ, ки аз санаи 8-уми сентябр оғоз гардида, ба 26-солагии Истиқлолияти давлатии Ҷумҳурии Тоҷикистон ва “Соли ҷавонон” бахшида шуда буд, доир гардид.
Фестивали мазкур варзишгарону мутасаддиёни соҳаи варзишро аз тамоми гӯшаю канори ҷумҳурӣ ба ҳам оварда буд.
Зимни баргузории он Абдуҷаббор Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Аҳтам Абдуллозода, раиси Кумитаи кор бо ҷавонон ва варзиши назди Ҳукумати ҷумҳурӣ, намояндагон аз Ҳукумати шаҳри Душанбе, раисони шаҳру ноҳияҳои тобеи марказ низ иштирок доштанд.
Дар оғози фестивал намояндагони минтақаҳои ВМКБ, Кӯлоб, Зарафшон, Ҳисор ва Рашт таҳти савту навои миллӣ либосҳои тоҷикии хоси минтақаҳои худро ба ҳозирин муаррифӣ намуданд. Либосҳои ба барнамудаи иштирокчиён ҳар яке ифодари расму русум ва анъанаҳои миллати тоҷик буд.
Баъди намоиши либосҳои миллӣ, варзишгарони ҷумҳурӣ намудҳои бозиҳои миллии варзишӣ, аз қабили гӯштингирӣ, чавгонбозӣ, вазнбардорӣ (сангбардорӣ), дастхобонӣ, шоҳмот, бандкашӣ, шиноварӣ, пойга (варзиши сабук, давидан ба масофаҳои 200, 400, 800 метр), чиликдангал, камонварӣ, шамшерзанӣ, бандпарак, фалағмолпартоӣ, ланкабозӣ, камонғӯлак, биҷилбозӣ ва ҳойталакро ба ҳозирин намоиш доданд.
Зимни баргузории Фестивал иштирокчиён бо арҷгузорӣ ба арзишҳои миллӣ дар баробари муаррифии либосу бозиҳои миллии варзишӣ, инчунин муқаддасоти кишвар – Парчами Ҷумҳурии Тоҷикистонро муаррифӣ намуданд, ки дар охири намоиш онро чемпиони Бозиҳои олимпии Рио-Де-Жанерои Бразилия дар соли 2016 Дилшод Назаров ба майдон баровард.
Баъди намоиши Фестивали бозиҳои миллии варзишӣ бахшида ба 26-солагии Истиқлолияти давлатии Ҷумҳурии Тоҷикистон мусобиқаи бошаҳомати гӯштини миллӣ – “Гӯштингирӣ” оғоз гардид. Мусобиқаи мазкур аз ҷониби Мақомоти ҳокимияти иҷроияи шаҳри Душанбе дар якҷоягӣ бо Кумитаи кор бо ҷавонон ва варзиш ба роҳ монда шуда, варзишгарон дар се вазн (65, 80, +80) миёни ҳам рақобат намуда, ғолибон бо ифтихорнома ва мукофотҳои пулӣ қадрдонӣ шуданд.
ҒОЛИБОНИ МУСОБИҚАИ ҶУМҲУРИЯВӢ АЗ НАМУДИ ГӮШТИНИ МИЛЛӢ
Вазни 65 кг:
1. Хушқадам Хусравов – ВМКБ;
2. Ёқубҷон Боқиев – ВМКБ;
3. Маҳмадраҳим Сарахонов – Душанбе.
Вазни 80 кг:
1. Хоҷазода Беҳрӯз – Душанбе;
2. Акмалиддин Муродов – Хатлон;
3. Кароматулло Ҳакимов – Душанбе.
Вазни +80 кг:
1. Саидҷалол Саидов – Душанбе;
2. Фирдавс Насимов – Душанбе;
3. Абӯшанаи Саидхон – Душанбе.
Ҳайати тадорукоти Фестивали бозиҳои миллии варзишӣ баъди се марҳилаи гузаронидани Фестивал дар сартосари ҷумҳурӣ аз ҳисоби даставӣ тими шаҳри Душанберо ғолиби Фестивали бозиҳои миллии варзишӣ дар соли 2017 эълон намуд. Ба дастаи Хуҷанд зинаи дуюм ва ба тими Хатлон мақоми сеюм дода шуд. Инчунин, ба сардорони Бахшҳои кор бо ҷавонони ВМКБ, минтақаҳои Рашту Ҳисор ва Зарафшон барои иштироки фаъолонаашон ифтихорномаҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим карда шуданд.
Хотиррасон менамоем, ки бо эълон гардидани “Соли ҷавонон” аз ҷониби Пешвои миллат муҳтарам Эмомалӣ Раҳмон, бо мақсади эҳё, рушд ва амалии бозиҳои миллии варзишӣ ва тарбияи насли наврас дар руҳияи эҳтиром ва арҷгузорӣ ба таъриху анъанаҳои миллии аҷдодон, ҳамзамон таҳкими тарзи ҳаёти солим, ҳисси худшиносиву худогоҳӣ, зиракии сиёсӣ ва пешгирии омилҳои номатлуб дар байни насли наврас баргузории ҳамасолаи Фестивали бозиҳои миллии варзишӣ дар се марҳила (маҳаллӣ, минтақавӣ ва миллӣ) дар остонаи таҷлили иди байналмилалии Наврӯз (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) тасдиқ гардид, ки чорабинии имрӯза ҷамъбасти фестивали мазкур дар соли 2017 ба ҳисоб меравад.
Сарпарастии Фестивали бозиҳои миллии варзиширо президенти Федератсияи футболи Тоҷикистон ва раиси шаҳри Душанбе Рустами Эмомалӣ ба уҳда дорад.
Манбаъ: Сомонаи Кумитаи чавонон ва варзиш
Нет комментариев