Боз 25 адад автобуси тамғаи «ЛИАЗ» ворид карда шуд

0
402 просмотров

Бо иштироки Раиси вилояти Суғд Раҷаббой Аҳмадзода дар доираи амалишавии лоиҳаи «Рушди нақлиёти ҷамъиятии шаҳри Хуҷанд» боз 25 адад автобусҳои мусофиркашонӣ ба фаъолият шурӯъ намуд.

Бояд қайд кард, ки автобусҳои мусофиркашонӣ дар натиҷаи татбиқи лоиҳаи “Рушди нақлиёти ҷамъиятии шаҳри Хуҷанд” ба маркази вилоят ворид гардида, ҳадаф беҳсозии ҳолати кунунии хизматрасонии нақлиётҳои ҷамъиятӣ ба ҳисоб меравад.

Лоиҳаи мазкур бо дастгирии Ҳукумати Ҷумҳурии Тоҷикистон ва маблағгузории Бонки аврупоии таҷдид ва рушд дар ҳаҷми беш аз 26 миллион доллари амрикоӣ амалӣ гардида истодааст.

Зимни шиносоӣ бо автобусҳои нав Раиси вилоят қайд намуд, ки бо дастгирӣ ва пуштибониҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон лоиҳаи мазкур татбиқ гардида, баҳри рафту омади сокинон шароити мусоид фароҳам оварда мешавад.

Автобсуҳои нав нисбат ба автобусҳои қаблан воридшуда калонҳаҷм буда, дарозии он 12 метр мебошад. Ҳар як автобус барои ғунҷоиши зиёда аз 100 мусофир пешбинӣ шудааст. Ҳамчунин дар дохили автобус барои маъюбон имконоти мусоиди баромаду фаромад фароҳам омадааст. Автобусҳои наву замонавӣ тамғаи “ЛИАЗ” буда, истеҳсоли Федератсияи Россия мебошад.

Ҳамакнун бо амалӣ гаштани марҳилаи дуввуми лоиҳаи зикршуда хатсайри автобусҳо боз ҳам фарохтар гардид. Ҳаракати ин автобусҳо аз маҳаллаи 34-уми шаҳри Хуҷанд оғоз ёфта, то шаҳри Бӯстон идома меёбад. Ҳамчунин, Раиси вилоят дастур дод, ки дар оянда ба самти шаҳри Гулистон низ хатсайри автобусҳо ташкил ва ба роҳ монда шавад. Ронандагони нақлиётҳои нави мусофиркашонӣ дар асоси озмун ба кор ҷалб карда шуда, мутахассисони соҳибтаҷриба ба ҳисоб мераванд.

Зимнан Раиси вилоят ба масъулин дастур дод, ки фаъолияти муназзами автобусҳои нав ба роҳ монда шуда, дар интиқоли мусофирон ягон мушкилӣ ба миён наояд.

Бояд қайд кард, ки автобусҳои наву замонавӣ мутобиқ ба талаботи замони муосир истеҳсол гардида, ҳамаи амалиёт дар он ба тариқи электронӣ ба сомон расонида мешавад. Масъулин нақша доранд дар ояндаи наздик бо мақсади баланд бардоштани хизматрасонии нақлиёти ҷамъиятӣ пардохти электронӣ ва чиптавии онро ба роҳ монанд.

Бо амалӣ гаштани марҳилаи дувуми лоиҳа шумораи умумии автобусҳо ба 50 адад расид ва мувофиқи нақша то поёни соли ҷорӣ боз 50 адад автобус ба маркази вилоят оварда мешавад.

Манбаъ: Хадамоти матбуоти Раиси вилояти Суғд

Нет комментариев

Также рекомендуем