Боздиди корӣ аз шаҳрҳои Хуҷанд ва Гулистон

0
52 просмотров

Раиси вилояти Суғд Раҷаббой Аҳмадзода зимни боздиди корӣ аз шаҳрҳои Хуҷанд ва Гулистон бо ҷараёни корҳои ободониву созандагӣ шинос гардид.

Ҷоизи зикр аст, ки чун дигар минтақаҳои вилоят дар шаҳрҳои саноатии Хуҷанду Гулистон низ ба истиқболи 30-солагии Истиқлолияти давлатии Ҷумҳурии Тоҷикистон бунёди силсилаиншооти гуногун идома дошта, мардум бо ҷонибдорӣ аз сиёсати пешгирифтаи Ҳукумати Ҷумҳурии Тоҷикистон ба ободкорӣ машғуланд.

Раҷаббой Аҳмадзода сараввал ба минтақаи озоди иқтисодии “Суғд” ташриф оварда, ҷараёни сохтмон ва васлу насби дастгоҳу таҷҳизоти наву замонавиро дар ҶСК “КМС шаҳри Хуҷанд” мавриди назар қарор дод. Коргоҳи мазкур ба истеҳсоли бозичаҳои кӯдакона ва дучархаҳо нигаронида шуда, аз панҷ сех иборат мебошад.

Тавре дар аснои шиносоӣ аён гардид, то имрӯз аллакай аксари корҳои сохтмонӣ ба итмом расонида шуда, рангу бори биноҳо, ободонии муҳити атроф ва васлу насби таҷҳизотҳои нав босуръат идома дорад. Тамоми дастгоҳҳои корхона аз Ҷумҳурии мардумии Чин ворид карда шуда, аллакай якчанд хатҳои истеҳсолӣ насб карда шудааст. Дар марҳилаи аввали фаъолият истеҳсоли 10-15 намуд маҳсулот ба нақша гирифта шуда, минбаъд шумораи он то ба 50 намуд расонида мешавад. Бо мавриди баҳрбарадорӣ қарор гирифтани корхона марҳила ба марҳила то 50 нафар ба кори доимӣ ҷалб карда хоҳанд шуд. Корхонаи мазкур дар кишвар аввалин корхонае маҳсуб меёбад, ки дар он бозичаҳои гуногун барои кӯдакон истеҳсол мешавад. Маҳсулоти дар корхона истеҳсолшаванда воридотивазкунанда буда, дар сурати пурра ба кор даромадани он содироти маҳсулоти тайёр ба мамлакатҳои ҳамсоя низ ба нақша гирифта шудааст.

Дар идомаи боздиди корӣ Раиси вилоят бо рафти сохтмони мактаби санъат дар шаҳри Гулистон шинос шуд. Бинои мактаби санъат дар маркази шаҳр ҷойгир буда, аз ду ошёна ва таҳхона иборат мебошад. Дар дохили бино зиёда аз 30 утоқи дарсӣ, толори барҳаво бо 135 ҷойи нишаст, ошхона, арт-галерея ва дигар ҳуҷраҳои ёрирасон ҷойгир карда шудааст. То имрӯз аллакай аксари корҳои сохтмонӣ ба анҷом расида, воридсозии мебелу курсиҳо идома дорад. Зимни шиносоӣ бо рафти корҳои сохтмонӣ Раиси вилоят ба сифати корҳо баҳои баланд дод. Қайд гардид, ки бо шарофати Истиқлолияти давлатии Ҷумҳурии Тоҷикистон ва талошу заҳматҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳаи фарҳанг таваҷҷуҳи хоса зоҳир мегардад. Дар ин раванд дар қаламрави вилоят қасрҳои боҳашамати фарҳангӣ бунёд ва хонаҳои маданият таҷдиду навсозӣ гардида, барои кормандони соҳа имконоти муосид фароҳам оварда шуда истодааст.

Дар мактаби санъати  шаҳри Гулистон аз рӯи 15 равия 150 толибилм ба омӯзиши санъати мусиқӣ ва беш аз 80 нафар ба омӯзиши ҳунари рассомӣ ҷалб мегарданд.

Дар шаҳри Гулистон Раиси вилоят инчунин бо нақшаи таҷдиду навсозии системаи оби нӯшокии шаҳр шинос гардид. Тавре маълумот дода шуд, иқдоми мазкур бо дастгирии Ҳукумати Ҷумҳурии Тоҷикистон ва маблағгузории Бонки аврупоии таҷдид ва рушд ва дар асоси лоиҳаи “Барқарорсозии оби нӯшокӣ дар шаҳри Гулистон” амалӣ карда шудааст. Барои анҷоми босифати корҳо зиёда аз 2 миллион доллари амрикоӣ масраф гардида, 15 ҳазор метр қубур хобонида шуда, 4 чоҳи амудӣ бунёд ва 3 адади он таъмиру навсозӣ карда шудааст. Дар маркази шаҳри Гулистон наздик 10 ҳазор нафар умр ба сар бурда, зиёда аз 150 адад корхонаву муассисаҳо фаъолият мебаранд ва ҳолати таъминоти онҳо бо оби нӯшокӣ ба маротиб беҳтар карда шуд. Қаблан сокинони шаҳр давоми як шабонарӯз ҳамагӣ чор соат бо оби нӯшокӣ таъмин буданд ва пас аз татбиқи лоиҳаи мазкур шаҳрвандон ба оби хушсифати нӯшиданӣ пурра таъмин гардиданд.

Худи ҳамин рӯз Раиси вилояти Суғд Раҷаббой Аҳмадзода ва раиси Кумитаи телевизион ва радиои назди Ҳукумати Ҷумҳурии Тоҷикистон Маҳмадсаид Шоҳиён рафти корҳои сохтмонӣ ва бунёди бинои иловагии Телевизиони вилояти Суғдро мавриди назар қарор доданд. Бояд тазаккур дод, ки дар назди Маркази техникии Идораи телевизион ва радиои вилоят бо маблағгузории мақомоти иҷроияи ҳокимияти давлатии вилоят бинои нав бунёд карда мешавад. Иншооти сохташаванда аз ду ошёна иборат буда,  барои фаъолияти кормандон шароити муосид фароҳам мегардад. Ҳамчунин бо дастгирии роҳбарияти вилоят бинои кунунии Маркази техникии телевизиони вилоят ба таъмиру таҷдид фаро гирифта шуда, дар дохили он шароити замони муосир барои сабту пахши барномаҳо муҳайё карда хоҳад шуд.

Ҳангоми боздид Раиси вилоят ба сохтмончиён ҷиҳати тезонидан ва анҷоми босифати корҳо, интихоби масолеҳи хушсифат, кабудизор намудани атрофи бино дастуру супоришҳои мушаххас дод. Раиси Кумитаи телевизион ва радиои назди Ҳукумати Ҷумҳурии Тоҷикистон Маҳмадсаид Шоҳиён таъкид дошт, ки бояд тамоми корҳои сохтмонӣ дар асоси талабот ба роҳ монда шуда, нозукиҳои кори телевизион ба инобат гирифта шавад. Дар ин ҷода мутахассисони Кумита омода ҳастанд, ки сохтмончиёнро дастгирӣ намоянд.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

Рушди роҳрави байналмиллалии нақлиётӣ

Чанде  пеш  дар  шаҳри  Истамбули  Туркия  ҷаласаи ёздаҳуми  ҳарсолаи Комиссияи  байниҳукуматии ТРАСЕКА  корашро  анҷом  дод.  Дар  ҷаласа  ҳайати  Тоҷикистон  бо  роҳбарии   вазири  нақлиёти  кишвар ...