Модар — ин сабзтарин барги хилқат, боғбони бӯстони зиндагии мост. Ҳамаи мо – инсонҳо дар домани поки ин мазҳари раҳмати лутфи Илоҳӣ чун чашмаи меҳрубониву сафо камол меёбем.
Санаи 24 августи соли равон дар Таваллудхонаи № 1-и шаҳри Душанбе як санаи хотирмоне буд. Зеро дар ин рӯзи нек модари хушбахт Нуралиева Шаҳодатхон соли таваллудаш 1988, истиқоматкунандаи ноҳияи Файзобод, деҳаи дашти Мирзо чоргоникро таваллуд мекунад. Зуҳро Каримова духтури навзодон мегӯяд, ки чоргоникҳо ду писару ду духтар санаи 24 августи соли 2016 соати 11-и рӯз чашм ба дунёи ҳастӣ кушоданд. Айни замон саломатии модару кӯдакон хуб аст ва мо аз роҳбарияти Кумита кор бо занон ва оилаи назди Ҳукумати Ҷумҳурии Тоҷикистон Қосимзода Идигул Тағо изҳори сипос менамоем, зеро бо шунидани ин хушхабар намояндагони Кумита зуд ба пурсиши модари ҷавон омаданд.
Имсол мо 25-умин солгарди Истиқлолияти давлатии хешро ҷашн мегирем ва ман ду Шоҳписару ду Шоҳдухтарро дар арафаи ид ба шавҳарам тӯҳфа намуда умедворам, ки фарзандонам дар оянда ворсонӣ арзандаи Ватан бошанд мегӯяд ба табассум модари хушбахт Шаҳодатхон Нуралиева.
Манбаъ: Кумитаи кор бо занон ва оилаи назди Ҳукумати Ҷумҳурии Тоҷикистон
Нет комментариев