Даҳ ҳазор сокинони ноҳия бо оби ошомиданӣ таъмин шуданд

0
710 просмотров

Дар ноҳияи Рӯдакӣ иншооти обтаъминкунӣ ва беҳдоштӣ ба истифода дода шуд, ки он сокинони деҳоти Чоряккорон, Гиждалобод ва Чавлибойро бо оби тозаи ошомиданӣ таъмин намуда, ба хонандагони ду мактаби ин деҳот имкони таҳсил дар муҳити аз назари беҳдошт мувофиқро фароҳам меорад.

Маросими ифтитоҳи иншооти нави таъминкунии оби нӯшокӣ дар деҳаи Чоряккорони ноҳияи Рӯдакӣ баргузор гашт. Ин маросим аз ҷониби ташкилоти байналмилалии Оксфам якҷоя бо Ҳукумати ноҳияи Рӯдакӣ, бо мақсади нишон додани таъсир ва зарурати оби нӯшокӣ ба саломатӣ ва беҳдошти сокинони ноҳияи Рӯдакӣ баргузор гардид.

Лоиҳа аз тарафи ташкилоти Оксфам бо дастгирии молиявии Оҷонсии Швейтсария оид ба рушд ва ҳамкорӣ ва Вазорати корҳои хориҷии Финляндия бо муваффақият роҳандозӣ шуда, дастрасии даҳ ҳазор нафарро ба оби тозаи ошомиданӣ таъмин намуд. Дар маросими ба истифода дода шудани иншооти обтаъминкунӣ раиси ноҳияи Рӯдакӣ Муҳаммадраҳим Юсуфӣ, роҳбари Оҷонсии Швейтсария оид ба рушд ва ҳамкорӣ хонум Валбурга Рус ва иҷрокунандаи вазифаи раҳбари ташкилоти Оксфам дар Тоҷикистон Орхан Алӣ, иштирок намуданд.
Дар суханронии худ Муҳаммадраҳим Юсуфӣ аз сокинони ин деҳот дархост кард, ки барои сарфаи об бемасъулиятӣ накунанд ва ҳар қатраи онро мақсаднок истифода баранд. Ӯ афзуд, об дар Тоҷикистон ройгон аст, аммо сокинонро мебояд бо сари вақт пардохт намудани маблағи хизматрасонии иншооти об, барои солҳои тӯлонӣ хизмат кардани он, саҳмгузор бошанд.

Хонум Валбурга Рус, раҳбари Оҷонсии Швейтсария оид ба рушд ва ҳамкорӣ, оид ба зарурат ва арзиши об дар ҳаёт ва солимии мардуми деҳот ва насли оянда, ҳамчун нерӯмандсозии ҷомеа дар рушди минтақа, суханронӣ намуд. Ӯ афзуд, ин лоиҳа намунаи хуби ҳамкории ташкилоти Оксфам бо ҳукумат аст.

Орхан Алӣ, иҷрокунандаи вазифаи раҳбари ташкилоти Оксфам дар Тоҷикистон, дар баромади худ таъкид кард, ки дар сатҳи маҳалҳо ва ҷамоатҳо таъсиси як усули идоракунии захираҳои обӣ зарур аст, ки бо иштироки ҷомеъа, дар асоси принсипҳои шаффоф, ҳисоботдиҳӣ бунёд гардида ба талаботи дастрас кардани таъминоти об ҷавобгӯ мебошад.

Аз иншооти обтаъминкунии мазкур зиёда аз даҳ ҳазор сокини деҳоти Чорякорон, Гиждалобод ва Чавлибой истифода хоҳанд кард. Минбаъд сокинон обро аз ҷумакҳое, ки дар ҳавлиҳояшон насб шудааст, дастрас мекунанд. Солҳои пеш сокинони ин деҳаҳо аз набудани оби тозаи ошомиданӣ танқисӣ мекашиданд ва ба хусус занон маҷбур буданд, ки обро аз масоҳати дур ба хона оранд.

Инчунин ташкилоти Оксфам дар ду мактаби ноҳия макони беҳдоштӣ — ҳоҷатхона ва нуқтаҳои дастшӯйиро сохта ба истифода супорид. Минбаъд наздик ба 2300 хонанда ва омӯзгори ду мактаб, яъне мактабҳои рақамҳои 67 ва 70 (деҳоти Чорякорон ва Гиждалобод) аз ин иншоот, ки ҷавобгӯи талаботи беҳдоштӣ аст, истифода хоҳанд кард.

Иловатан лоиҳа барои беҳтар кардани вазъи саломатии кӯдакон ва шаҳрвандон дар ҷомеа тавассути ташкили маъракаҳои иттилоотӣ кӯмак намуд, то ин ки маърифати кӯдакон ва аҳолӣ оид ба мушкилоти марбут ба саломатӣ, тозагӣ, таъминоти об ва беҳдоштӣ баланд бардошта шавад. Дар натиҷа зиёда аз шаст хонандаи мактаб ва калонсолон чун тренерони барнома ва фаъолони ҷомеа омӯзонида шуданд. Онҳо оид ба саломатӣ ва қоидаҳои беҳдоштӣ ба ҳамсинфон ва аъзоёни ҷомеа дар шакли дарсҳои омӯзишӣ ва вохӯриҳо, маълумот пешниҳод мекунанд. То имрӯз ин тренерон ба 4 000 нафар таълим додаанд.

Лоиҳаи “Таъминоти об ва беҳдошт дар Тоҷикистон” TaJWSS аз ҷониби Оҷонсии Швейтсария оид ба рушд ва ҳамкорӣ маблағгузорӣ шуда, аз ҷониби Оксфам дар ҳамкорӣ бо Барномаи рушди Созмони Милали Муттаҳид (UNDP) барои солҳои 2014-2018 амалӣ карда мешавад.

Лоиҳаи “Таъминоти об ва беҳдошт дар ҷамоатҳо” аз ҷониби Вазорати корҳои хориҷии Финляндия тавассути барномаи FinWater WEI маблағгузорӣ шуда, аз ҷониби Оксфам дар ҳамкорӣ бо Ташкилоти ҷамъиятии “Иттифоқи истеъмолкунандагони Тоҷикистон” барои солҳои 2015-2018 амалӣ карда мешавад.

 

Манбаъ: Ташкилоти Оксфам ва ECO — Group «Javoni»

Нет комментариев

Также рекомендуем