Субҳи имрӯз дар Душанбе ҷаласаи якуми Платформаи минтақавии кишварҳои Осиёи Марказӣ ва Қафқоз оид ба паст кардани хатари офатҳои табиӣ ба кори худ шурӯъ кард.
Дар конфронси байналмилалӣ, ки масъулияти баргузории он ба зиммаи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон гузошта шудааст, роҳбарони вазорату идораҳои ваколатдор оид ба пешгирӣ ва рафъи ҳолатҳои фавқулода аз Ҷумҳуриҳои Озарбойҷон, Арманистон, Қазоқистон, Қирғизистон, Ӯзбекистон ва Туркманистон, ҳамчунин намояндагони вазоратҳои маориф, меҳнат ва рушди иҷтимоӣ, корпусҳои дипломатӣ, созмонҳо ва муассисаҳои Созмони Милали Муттаҳид, мушовири Дабири кулли СММ оид ба ҳолатҳои фавқулода ширкат меварзанд.
Ҳадаф аз баргузории конфронс, татбиқ намудани тавсияҳои «Барномаи қолабии Сендай оид ба паст кардани хавфи офатҳои табиӣ дар солҳои 2015-2030» буда, оид ба ҳамкории минтақавӣ дар самти паст намудани хавфи офатҳои табиӣ ва қабули қарорҳои муҳим барои вокуниши саривақтӣ, пешгирии офатҳои табиӣ ва техногенӣ дар минтақаи Осиёи Марказӣ ва Қафқоз, мушкилоти мавҷуда ва роҳҳои ҳалли он ва дигар масоили вобаста мавриди муҳокимаву баррасии иштирокдорони конфронс қарор дода мешаванд.
Дар назар дошта шудааст, ки вобаста ба натиҷаҳои рӯзи нахустини кори конфронс имрӯз соати 17 дар меҳмонхонаи Хайят-реҷенси Душанбе барои хабарнигорони ватанӣ ва хориҷӣ нишасти матбуотӣ баргузор мегардад. Ин чорабинии сатҳи байналмилалӣ давоми ду рӯз идома меёбад.
Хотиррасон мешавем, ки «Барномаи қолабии Сендай оид ба паст кардани хавфи офатҳои табиӣ дар солҳои 2015-2030» моҳи марти соли 2015 дар Ҷопон қабул карда шуда, он барои мусоидат кардан ба кишварҳои Осиёи Марказӣ ва Қафқоз дар бахши пешгирӣ кардан ва бартараф намудани оқибатҳои офатҳои табиӣ пешбинӣ шудааст.
Манбаъ: http://khovar.tj/
Нет комментариев