Дар Душанбе нахустин кинофестивали байналмилалии филмҳои кӯтоҳ- «Навсоз» баргузор мегардад

0
559 просмотров

Аз 16 то 20 сентябри соли равон бори нахуст дар ҷумҳурӣ дар кинотеатри «Зебунисо»-и шаҳри Душанбе кинофестивали байналмилалии филмҳои кӯтоҳ таҳти унвони «Навсоз» баргузор мегардад. Кинофестивали мазкур барои ҷавонон пешбинӣ шуда, синни иштирокдорони он набояд аз 35 боло бошад (ба истиснои нақшофарон дар филм) ва давомнокии филм то 30 дақиқа муқаррар гардидааст.
Тавре ки дар суҳбат бо хабарнигори АМИТ «Ховар» Муҳибназар Холназаров, роҳбари лоиҳа зикр намуд, қабули дархостҳо барои иштирок дар кинофестивали мазкур аз 1 июн оғоз гардида, то 1 августи соли равон идома ёфта, иштирокдорон  метавонанд филмҳои мустанад, бадеӣ ва тасвириро, ки давомнокиашон аз 30 дақиқа зиёд нест,   ба мо пешниҳод намоянд. Ғолибон аз рӯи 14 номгӯи кинофестивал, аз ҷумла «Барои беҳтарин нақши мардона», «Барои беҳтарин нақши занона», «Беҳтарин коргардон»  ва ғайраҳо  мукофотонида мешаванд.
-Ҳамагон медонанд, ки синамо яке аз воситаҳои асосӣ ва пурқудрати тарғиботӣ маҳсуб мешавад ва синамои тоҷик ҳоло дар ҳолати рушд қарор дошта,  таваҷҷуҳи бештари масъулинро ба ин соҳа тақозо дорад. Мақсад аз роҳандозии ин лоиҳа низ рӯ овардан ба навгонӣ дар соҳаи филмсозии ҷумҳурӣ мебошад.
Мо, як гурӯҳ ҷавононе, ки дар ин самт фаъолият дорем, тӯли 6 моҳ ин лоиҳаро таҳия намуда, барои амалишавии он тайёрӣ дида истодаем, — иброз дошт М.Холназаров дар идомаи суҳбат.
М. Холназаров ҳамчунин иттилоъ дод, ки  дар оянда  амалишавии ин лоиҳа дар назар дошта шуда, баргузории кинофестивали байналмилалӣ   дар вилоятҳои ҷумҳурӣ ҳам ба нақша гирифта шудааст.

Манбаъ: http://khovar.tj

Нет комментариев

Также рекомендуем