Дар Истаравшан боғи истироҳативу фароғатӣ бунёд мешавад

0
132 просмотров

 Дар доираи сафари корӣ ба шаҳри Истаравшан Раиси вилоят бо ҷараёни сохтмони бинои нави Муассисаи давлатии Коллеҷи ҳунарҳои мардумии шаҳр шинос гардид. Сохтмони ин иншоот соли 2011 оғоз ёфта, он барои 320 ҷои нишаст пешбинӣ шудааст. Фармоишгар Вазорати маориф ва илми Ҷумҳурии Тоҷикистон ва пудратчӣ ҶСНК “МПМК Уротеппа” мебошад. Мувофиқи лоиҳа бунёди бинои асосии муассиса, ошхона, маҷлисгоҳ, толори варзишӣ, устохона ва хобгоҳ барои 150 нафар ба нақша гирифта шуда, то имрӯз бинои асосӣ қомат афрохтааст. МД Коллеҷи ҳунарҳои мардумӣ соли 2009 таъсис ёфта, айни замон дар ин боргоҳи ҳунаромӯзӣ 328 нафар ҷавонон дар 11 равия ба таълиму касбомӯзӣ фаро гирифта шудаанд. Дар мавзеъи Себзори шаҳри Истаравшан мувофиқи нақшаи генералӣ беш аз 5 гектар замин ба ҳудуди шаҳр дохил карда шудааст. Роҳбарияти мақомоти иҷроияи маҳаллӣ нақша дорад, ки ин мавзеъро ободу зебо намояд. Зимни боздид Раиси вилоят ба масъулин тавсия дод, ки ин мавзеъ ҷиҳати бунёди боғи истироҳативу фароғатӣ барои шаҳрвандон хело мувофиқ аст. Аз ин лиҳоз, ба масъулин дастур дода шуд, ки лоиҳаи боғро таҳия ва пешниҳод намоянд. Дар ҳудуди боғ фаввораҳо, нишастгоҳҳо, ҷойҳои истироҳатӣ барои сокинон, майдони бозии кӯдакон, маркази адибон, дӯкони фурӯши хӯрокҳои миллӣ ва армуғонҳои мардумӣ бунёд карда шуда, тамоми ҳудуди боғ чароғон карда хоҳад шуд. Бояд таъкид дошт, ки имрӯзҳо мақомоти иҷроияи ҳокимияти давлатии шаҳри Истаравшан дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон бо соҳибкорони маҳаллӣ ҳамкориҳои хубу самаранокро ба роҳ мондааст. Дар натиҷаи ин ҳамкориҳо сохтмони як қатор иншооти гуногунсоҳа ҷараён дошта, ободониву кабудизоркунӣ дар ҳудуди шаҳр вусъат пайдо намудааст.

                 Манбаъ: www.sugd.tj

Нет комментариев

Также рекомендуем