Оё медонед, ки дар давлатҳои гуногуни олам як намуди имову ишора маънои мухталифро дорад?
Масалан, аз ҳама ишораи маъмули «ОК» дар давлати Англия ва Амрико тартиби пурра ва натиҷаи хубро ифода мекунад. Вале агар Шумо ба фаронсавиҳо чунин ишора кунед, онҳо баракс фикр мекунанд, ки корҳоятон ниҳоят бад аст. Дар баъзе халқиятҳо бошад, ишораи «ОК» маънои ҳеҷ кас будани Шуморо ифода мекунад.
Дар мамлакатҳои Африқо қаҳ-қаҳа карда хандидан маънии ҳайрон шудани Шуморо мефаҳмонад, на ин ки хушҳол буданатонро ифода мекунад. Дар бораи худ сухан гуфта истода, ҷопониҳо ҳатман ба бинӣ ишора менамоянд. Вале аврупоиҳо ҳангоми дар бораи худ сухан гуфтан, дасташонро ба сари сина гузошта, ҳарф мезананд.
Дар дунё бисёр имову ишораҳое вуҷуд дорад, ки мо аз мавҷудияташон ҳатто хабар надорем. Биниро қапидан ё пок кардан барои фаронсавиҳо ё итолёгиҳо маънои онро дорад, ки одами дар наздашон истода инсони хатарнок аст. Барои ҳолландиҳо бошад, чунин рафтор гувоҳи он аст, ки одами дар рӯ ба рӯяшон буда машруботи спиртӣ истеъмол кардааст. Англисҳо бошанд, аз чуниин рафтор фикр мекунанд, ки Шумо ҷосус ҳастед. Зеро дар Англия ин рафтор аломати корманди махфӣ будани Шуморо ифода мекунад.
Ангушти калонии ба бало бардошташуда барои аврупоиҳо ва амрикоҳо маънои онро дорад, ки Шумо ба такси ва ё автомобили ҳамсамт савор шуданиед. Дар Арабистони Саудӣ ва баъзе давлатҳои Осиё чунин ишора аломати беодобӣ аст. Ҳар яке аз шаҳрвандони ин мамлакатҳо бо дидани ин ишора мефаҳманд, ки Шумо ӯро аз ин ҷо пеш карда истодаед.
Бардоштани ангушти ишоратӣ ва ангушти хурдтарин барои шаҳрвандони Итолё ишораи муқадассе будааст, ки инсонро аз назари бад эмин нигоҳ медоштааст. Агар Шумо ба фаронсавиҳо ангушти ишоратии худро нишон диҳед, меранҷанд. Зеро фикр мекунанд, ки Шумо ба ӯ аз хиёнаткор будани хамсараш ишора доред.
Ишораи дӯстдоштаи аҳолии Авропо ин кафи дастони ба боло бардошташуда мебошад. Онҳо аз ин амал пай мебаранд, ки Шумо аз онҳо чизе фаҳмиданӣ хастед. Чунин ишора дар мамлакати Мексика маънои ба ришвадиҳӣ даъват карданро доштааст.
Дар мамлакати Аргентина барои рафтори ноҷо дар ҷойҳои ҷамъиятӣ аз одамон ҷарима меситонанд. Масалан, агар нафареро бинанд, ки дар кӯча дастони худро ба кисаи худ андохта бошад, ҷаримапулӣ меситонанд.
Зарнигори Рустам.
Нет комментариев