Санаи 16-уми ноябр бахшида ба Рӯзи Президенти Ҷумҳурии Тоҷикистон дар Қасри варзиши шаҳри Хуҷанд мусобиқа дар намуди гӯштини камарбандӣ баргузор шуд.
Дар ин рӯз барои тамошои мусобиқа 3 ҳазор нафар сокинони касбу кори гуногун бо шумули гирандагони стипендияи Раиси вилояти Суғд, иштирокчиёни ҳафтаи худидоракунӣ, олимони ҷавон, варзишгарони шаҳру ноҳияҳои вилоят, устодони варзиш ва донишҷӯён ба Қасри варзиш омаданд.
Муовини Раиси вилояти Суғд Назира Ғаффорӣ зимни суханронии худ ҳозиринро бахшида ба Рӯзи Президент табрик гуфта, аз хизматҳои шоистаи фарзанди фарзонаи миллат Асосгузори сулҳу Ваҳдати миллӣ Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ёдоварӣ кард.
Бояд зикр намуд, ки дар ин мусобиқаи варзишӣ беш аз 100 нафар варзишгарон аз шаҳру ноҳияҳои Истаравшан, Ҷаббор Расулов, Шаҳристон, Спитамен, Мастчоҳ, Зафарободу Деваштич иштирок намуданд. Мусобиқа дар вазнҳои гуногун дар се бахш миёни наврасон, ҷавонон ва калонсолон баргузор шуд ва ғолибон бо медалҳо сарфароз гардонида шуданд.
Дар вазни мутлақ 10 нафар варзишгарони номии вилояти Суғд барои ғолибият талош намуданд. Дар натиҷаи қувваозмоиҳо Назир Бердиев аз ноҳияи Бобоҷон Ғафуров ҷои аввалро соҳиб шуд. Самандар Эрназаров аз шаҳри Истаравшан ва Абдусалом Саломов аз ноҳияи Ҷаббор Расулов ҷойҳои дуюму сеюмро ишғол намуданд.
Муовини Раиси вилоят Назира Ғаффорӣ ва роҳбари дастгоҳи Раиси вилоят Ғафур Зоирӣ дар вазъияти тантанавӣ ба ғолибон тӯҳфаҳои хотиравиро тақдим намуданд.
Нет комментариев