Дар Тоҷикистон маҷмааи лижаронию сайёҳӣ ифтитоҳ гардид

0
426 просмотров

Дирӯз бо иштироки Сарвазири Ҷумҳурии Тоҷикистон Қоҳир Расулзода маҷмааи лижаронию сайёҳии «Сафед-дара» баъди таъмиру навсозии куллӣ расман мавриди баҳрабардорӣ қарор гирифт. Сарвазири кишвар аз иншооти бунёдшуда ва таъмиру таҷдидгардидаи ин маҷмааи варзишию сайёҳӣ дидан намуда, ба корҳои сохтмонию ташкилии он баҳои баланд дод. Қоҳир Расулзода ва ҳайати ҳамроҳонаш бо шароити ин мавзеи варзишию сайёҳӣ, аз ҷумла аз меҳмонхонаҳои барҳавои замонавӣ, нуқтаи нигоҳдории барфгардҳо, тарабхонаю марказҳои савдо ва мавзеъҳои лижаронию барфгардӣ дидан карда, ба шароити ташкилшудаи ин маҷмаа баҳои баланд доданд. Инчунин дар ин мавзеъ мактаби махсуси кӯдакону наврасон оид ба варзиши зимистона расман ифтитоҳ гардид. Дар ин мактаб 68 нафар кӯдаку наврас ба таълими варзиши зимистона фаро гирифта шуда, аз имконияти васеи машқу тамрин ва омӯзиши нозукиҳои варзиши зимистона ҳамаҷониба бархӯрдоранд. Бо назардошти ба мавзеи варзишию сайёҳии сатҳи ҷаҳонӣ табдил ёфтани ин маҷмаа Сарвазири мамлакат таъкид дошт, ки дар ин ҷо бояд сатҳи хизматрасонӣ низ ба талоботи меъёрҳои ҷаҳонӣ мутобиқ карда шавад. Маврид ба зикр аст, ки маҷмааи лижаронию сайёҳии «Сафед-дара» аз ҷониби Ҷамъияти дорои масъулияти маҳдуди «Сафед-дара» бо ҷалби сармояи ватанӣ дар як муддати кӯтоҳ аз таъмири асосӣ бароварда шуда, як қатор корҳои сохтмонӣ дар он ба итмом расонида шуданд.

Ҷамъият дар ояндаи наздик тасмим гирифтааст, ки сохтмони фуникулёрро, ки барои кашонидани одамон ба қуллаҳои баланд хизмат мерасонад, оғоз намояд. Ҳамзамон, бо назардошти макони ҷойгиршавии маҷмаа дар ин мавзеи нотакрор ва бо табиати беҳамтояш, ҷамъият ба нақша гирифтааст, ки барои истироҳату фароғати кӯдакону наврасон дар фасли тобистон лагери тобистона низ ташкил намояд. Дар маҷмаа мутахассисони ботаҷрибаи соҳаи варзиши зимистона, мураббиёну роҳбаладон барои муаррифии мавзеъ ва дигар ҳайати хизматрасон, ки барои фароғати сайёҳону меҳмонон дар сатҳи олӣ хизмат мерасонанд, фаъолият доранд. Ҳамин тариқ, дар маҷмӯъ зиёда аз 150 ҷойҳои нави корӣ барои шаҳрвандон ташкил карда шуд. Дар хотима Сарвазир баҳри боз ҳам боло бурдани сатҳу сифати хизматрасонӣ, нигаҳдории иншооти мавҷуда ва ба роҳ мондани чорабиниҳои варзишию таблиғотӣ ба масъулин дастуру супоришҳои муфид дод. Дар ин бора сомонаи Ҷаҳоннамо хабар медиҳад.

Нет комментариев

Также рекомендуем

Официальный курс валюты на 22.08.2018

Национальный банк Таджикистана (НБТ) 22.08.2018 года с целью бухгалтерского учета и оплаты таможенной пошлины определил официальный курс иностранной валюты по отношению к сомони. 1 доллар ...