Шудӣ аз нури истиқлол дурахшон Тоҷикистонам,
Зи меҳрат рӯи дунё партавафшон Тоҷикистонам.
Макони фазлу одоб, лутфу эҳсон Тоҷикистонам,
Барои кулли тоҷик қутби рахшон Тоҷикистонам!
Дар воқеъ, Тоҷикистони азизу маҳбуби мо аз нури истиқлол дурахшон асту парчамаш дар рӯи дунё партавафшон. Тоҷикистон сарзамини фазлу одоб асту макони лутфу эҳсон.
Ҷашни 26-умин солгарди Истиқлолияти давлатии Ҷумҳурии Тоҷикистонро бароятон муборак бод менамоем! Бигзор аз нуру зиёи истиқлолият то абад роҳи мо сӯи оянда равшану нурбор бошад!
Бисту шаш сол аст, ки мардуми шарифи Тоҷикистони маҳбуби мо дар фазои истиқлолият зиндагӣ дорад ва дар фазои Ватани азизамон хуршеди истиқлол нурафшонӣ мекунад. Мо имсол ҷашни истиқлолро дар соли санаҳои бисёр муҳими таърихӣ, 20-солагии Рӯзи Ваҳдати миллӣ, 25-солагии баргузории Иҷлосияи Шӯрои Олии Ҷумҳурии Тоҷикистон истиқбол мегирем, ки хеле рамзист. Истиқлолияти мо рамзи гӯёи озодии миллат ва мамлакат, соҳибихтиёрии давлат ва нишонаи равшани ватандориву ватандӯстии мо мебошад.
Бисту шаш сол муқаддам халқи куҳанбунёду соҳибфарҳанги тоҷик ба дастоварди муқаддасу таърихӣ — Истиқлолияти давлатӣ мушарраф гардид, ки имрӯзҳо мо ин рўйдоди бузургро бо эҳсоси ифтихору сарфарозӣ ҷашн мегирем. Истиқлолият волотарин ва бо арзиштарин дастоварди миллати тоҷик мебошад. Тоҷикистон маҳз ба шарофати истиқлолият ҳамчун узви баробарҳуқуқи ҷомеаи ҷаҳонӣ эътироф гардид.
Ба ибораи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон «Истиқлолият нишонаи ҳувият ва озодӣ, ифтихор ва номус, рамзи саодат ва шарти бақои миллати соҳибихтиёру соҳибдавлати тоҷик мебошад».
Мо дар муддати 26 соли истиқлолият тавонистем, ки бо вуҷуди мушкилоту монеаҳои зиёд пешрафти устувори ватанамонро таъмин намоем, мақоми онро дар арсаи байналмилалӣ боло бардорем, пояҳои давлатдории мустақили худро тақвият бахшем, тамоми кӯшишу талош ва захираву имкониятҳои худро ба хотири фароҳам овардани шароити мусоид барои зиндагии шоистаи халқамон равона созем.
Сарбаландиву хушбахтии мо дар он аст, ки тақдири имрӯзу фардои ватанамон дар ихтиёри худамон мебошад ва ҳар фарди бонангу номуси миллат ҳастӣ ва ҳаёти худро ба хотири озодиву пешрафти сарзамини аҷдодӣ бахшидааст.
Истиқлолият — ормони ҳазорсолаи миллӣ ва дастоварди бебаҳои таърихии миллати тоҷик аст. Истиқлолияти давлатии Ҷумҳурии Тоҷикистон бо баргузории Иҷлосияи сарнавиштсози ХVI Шӯрои Олӣ, ки масъулияти азими таърихиро ба ӯҳдаи сиёсатмадори сулҳофарину наҷотбахши миллат Эмомалӣ Раҳмон вогузошт, иртиботи амиқ дорад.
Хушбахтии мо зи файзи истиқлол аст,
Ин меҳри зиё зи файзи истиқлол аст.
Бо тоҷу ба тахт шудем баъди қарнҳо,
Армони ниё зи файзи истиқлол аст.
Ҳамватанони азизу арҷманд. Бори дигар Шуморо ба ифтихори ҷашни озодиву ободӣ – 26-умин солгарди Истиқлолияти давлатии Ҷумҳурии Тоҷикистон самимона табрик гуфта, бароятон тандурустиву хушбахтӣ, зиндагии хушу осуда, бахту иқбол ва саодати абадиро орзумандем.
Бигзор осмони соф, сулҳу суботи поянда ва ҳадафҳои наҷиби созандагӣ илҳомбахши рӯзгори осудаҳолонаи мардуми кишвари мо бошанд!
Нет комментариев