Эмомалӣ Раҳмон: Мо бояд ба эътимоди мардум сазовор бошем

1
767 просмотров

— Масъалаҳои ҳифзи истиқлолияти давлатӣ, тамомияти арзӣ, таъмини амният ва фароҳам овардани шароит барои зиндагии шоистаро мардуми Тоҷикистон ба дӯши мо вогузор кардааст ва мо бояд ба ин боварӣ сазовор бошем, — иброз дошт имрӯз зимни ироаи паёми худ ба парлумон президенти Тоҷикистон Эмомалӣ Раҳмон.

Сарвари давлат қайд кард, ки соли гузаштаро ҳукумати Тоҷикистон бо дастовардҳои назаррас сипарӣ карда, дар кишвар суръати устувори рушд ба қайд гирифта шуд. «Ҳаҷми Маҷмӯи маҳсулоти дохилӣ (ММД)-и Тоҷикистон дар соли гузашта 45,6 млрд. сомонӣ ва суръати афзоиши он 6,7%-ро ташкил дод», — гуфт президент.

Ӯ зикр кард, ки соли гузашта даромадҳои пулии аҳолӣ 23,8 млрд. сомониро ташкил дода, пасандозҳои пулии аҳолӣ дар бонкхо 21% афзуданд. «Соли 2014 дар Тоҷикистон 250 ҳазор ҷойҳои кории доимӣ, мавсимӣ ва муваққатӣ фароҳам оварда шуданд, ки ба коҳиши сатҳи камбизоатӣ дар ҷумҳурӣ мусоидат кард», — таъкид дошт Эмомалӣ Раҳмон.

Бино ба гуфтаи сарвари давлат, соли 2014 сатҳи афзоиши аҳолии кишвар 2,5% ва давомнокии ҳаёт ба ҳисоби миёна 73,4 солро ташкил дод, ки дар муқоиса бо нишондиҳандаи соли 2000-ум 5 сол зиёдтар аст.

«Нишондиҳандаҳои Буҷети давлатии кишвар дар соли гузашта 102% ба иҷро расида, ҳаҷми қарзи берунаи Тоҷикистон тамоили коҳишро касб кард ва соли гузашта 22,8% аз ҳаҷми умумии ММД-ро ташкил дод», — афзуд президенти мамлакат. Дар ин бора news.tj хабар медихад.

1 comment

Опубликовать новый комментарий

Также рекомендуем