Фарзандони Муборакшо ва Муҳаббатшоҳ дар Маскав бо овози зинда ҳунарнамоӣ карданд

0
31 просмотров

Ду ҳунарманди боистеъдод ва ҷавон – Имомалишо ва Хушрӯз ҳадаф гузоштаанд, ки бар хилофи тамоюли фонограммасароӣ дар ҷаҳони мусиқӣ танҳо бо овози зинда ҳунарнамоӣ намоянд.

Консерти Имомалишо ва Хушруз-1

Санаи 7-уми май дар Маскав аввалин барномаи ҳунарии Имомалишо ва Хушрӯз баргузор шуд. Ба дидори ҳунармандони боистеъдоди Бадахшон ҷавонони тоҷик омада буданд. Мероси падар хоҳӣ…. Хушрӯз ва Имомалишо писарони ҳунармандони барҷастаи Тоҷикистон — Муборакшо Мирзошоев ва Олуча Муҳаббатшоҳ мебошанд. Муборакшо гарчи умри кӯтоҳ дошт, вале номашро абадӣ боқӣ гузошт.

Олуча Муҳаббатшоҳ-падари Хушрӯз аз беҳтарин сарояндагони мардуми Бадахшон ба шумор меравад.

Муҷрии ин барномаи ҳунарӣ Шерози Ҷобир буд. Ӯ низ писари яке аз ҳунармандони номдори театри марказии шаҳри Хоруғ аст. Ҳар се ҳам касби падарони худро пеша кардаанд. Шероз нахуст тамошобинонро ба муносибати 72-юмин солгарди Рӯзи Пирӯзӣ муборакбод намуда, консертро ба номи ҷовидонии Муборакшо оғоз кард.

“Асрҳо мегузаранд, вале номи Муборакшо зиндаву ҷовидон аст. Ӯ дар қалби ҳар яки мо бо ҳунари барҷаста ҷой гирифт”,-гуфт Шероз.

Бо оғози барномаи ҳунарӣ дар саҳна Имомалишо ва Хушруз пайдо шуданд. Онҳо якҷоя тамошобинон ва меҳмонони консертро хушомадед гуфта ба сурудани таронаҳояшон пардохтанд.

                         Аз “Парвиннамо” то “Нола дар дил дорам”

Имомалишо

Имомалишо дар барнома таронаҳои падараш-Муборакшоро сароид. Вай таронаҳои “Парвиннамо”, “Равон шуданд чор ҷавон”, “Туро намепарстам” ва “Ғариби”-ро иҷро кард. Тамошобинон намегузоштанд, ки Имомалишо худро дар саҳна танҳо эҳсос кунад. Ҳама баробари ӯ ҳамовозӣ мекарданд.

Хушрӯз пеш аз иҷрои таронаҳо изҳори шодмонӣ карда гуфт, ки “бовар надоштам, ки шумораи тамошобинонамон чунон зиёд мешавад”.

Хушрӯз нахуст суруди “Нола дар дил дорам имшаб”-ро тақдими тамошобинон кард. Дар идомаи барнома Хушрӯз оҳангҳои рақсӣ низ иҷро кард, ва тамошобинон майдони рақсро гарм карданд.

                                 Танҳо бо овози зинда

Вақтҳои охир дӯстдорони ҳунар фаромӯш кардаанд, ки овозхон бояд барномаро зинда иҷро кунанд. Имомалишо ва Хушрӯз ҳадаф гузоштаанд, ки бар хилофи тамоюли фонограммасароӣ дар ҷаҳони мусиқӣ танҳо бо овози зинда ҳунарнамоӣ кунанд. “Падарам таронаҳоро ҳамеша бо овози зинда иҷро мекард. Ман низ ҳадаф дорам, ки роҳи падарамро идома диҳам”,-гуфт Имомалишо дар сӯҳбат бо Sputnik Тоҷикистон.

Хушрӯз мегӯяд, ки овозхон танҳо дар сурати зинда сароидан метавонад тамоми эҳсоси худро нишон диҳад.

“Ҳунарнамоии овозхон гуфтугӯи ҳунарманд ва тамошобин аст. Агар зинда насароӣ, тамошобинонро аз эҳсоси зиндаи худ огоҳ наметавонӣ кард”,-бовар дорад Хушрӯз.

                 Барои модарон. Дидор бо ҳамсари Муборакшо

Хамсар ва писари Муборакшо

Байни тамошобинон меҳмонони зиёде аз шумули хешу табор, ҳамсинфону волидони ҳунармандон ҳузу доштанд. Пас аз он ки Хушрӯз суруди модарро иҷро кард, муҷрии барнома ҳамсари Муборакшоро ба саҳна хонд.

“Хонум Аввалмо аз хушбахттарин инсонҳоест, чун дар канори ҳунарманди барҷаста Муборакшо ба сар бурдааст”,-гуфт Шероз.

Баъди суруди “Модар”, Хушрӯз дигар навоҳои худро аз қабили “Барои ту”, “Худованд” иҷро карда навбати сурудхониро ба Имомалишо дод. Дар баробари ҳунармандони ҷавон дар консерт ҳамчунин “Рақси помирӣ” манзури тамошобинон шуд. Ҳунарнамоии Амонбегими хурдакак, ки бо забони русӣ суруди “Кукушка”-ро сароид ба барнома ранги дигар бахшид.

                                                Ҳама ба рақс

Тамошобинон дар консерт

Бозхонии таронаҳои Муборакшо — “Сабза ба ноз”, “Духтари деҳқон”, “Имшаб ба қиссаи дили ман”, “Ай ёрам биё” дар иҷрои Имомалишо тамошобинонро ба ваҷд оварданд ва ҳама ба рақс пардохтанд.

Дар толор шефтагони ҳунари Муборакшо ҳузур доштанд, ки ба саҳна наздик мешуданду аз дасти Имомалишо мегирифтанд, гӯё ки Муборакшоро дидор карда бошанд.

Хонум Аввалмо-модари Имомалишо дар сӯҳбат бо Sputnik Тоҷикистон гуфт, ки Имомалишо ӯро ғайриинтизор дар ҳайрат гузошт. “Ман бовар надоштам, ки Имомалишо имрӯз бо чунин санъати баланд сурудҳои падарашро иҷро мекунад. Сурудани таронаҳои Муборакшо кори осон нест”,-гуфт модари Имомалишо. “Ёдбуди Муборакшо” Дар воқеъ ин нахустин ҳунарнамоии Имомалишо ва Хушрӯз буд, ки ба як ҷашни бузурги хонаводагӣ бадал гашту ҳамагон дар ин шом боз аз Муборакшо ба некӣ ёд карданд.

Муҷрии барнома Шероз ҷавгир шуду пешниҳоде кард, ки ин консерт “Ёдбуди Муборакшо бошад”. Ва ҳамон лаҳза қарор шуд, ки ҳар сол рӯзе дар Маскав ба ёди Муборакшо бигзарад.

Идомаи роҳ… Ин нахустин ҳунарнамоии овозхонони ҷавон дар Маскав буд. Имомалишо ва Хушрӯз ният доранд, ки роҳи падарони худро идома диҳанд. “Мо дар нақша дорем дар дигар шаҳрҳо низ барнома иҷро кунем. Чунончи дар наздиктарин рӯзҳо ба Екатеринбург сафар хоҳем кард.”,- гуфт Хушрӯз. Хушрӯз ва Имомалишо ҳанӯз ҷавонанд, вале тавонистанд бе ёриву дастгирии дигарон барномаи ҳунариеро дар Маскав баргузор кунанд. Умедворем ин ҷавонон дар роҳи ҳунар комёбиҳои бузургеро ба даст оваранд

Манбаъ: http://sputnik-tj.com/

Нет комментариев

Также рекомендуем

Названы самые дорогие футбольные клубы

Опубликован рейтинг самых дорогих футбольных клубов мира, в котором первую строчку занял английский клуб “Манчестер Юнайтед”. Составители списка оценили МЮ в $3,689 млрд, при этом ...