Филми Румӣ Шоазимов “Хоби маймун” соҳиби «Оқ Илбирс» (Озодапаланг) — ҷоизаи миллии синамоии Ҷумҳурии Қирғизистон шуд.
Филми Румӣ Шоазимов «Хоби маймун» соҳиби ҷоизаҳои ҷашнвораи «Оқ Илбирс» дар се бахш — «Беҳтарин филми Осиёи Марказӣ», «Беҳтарин бозигари нақши мард дар Осиёи Марказӣ» ва «Беҳтарин бозигари нақши зан дар Осиёи Марказӣ» дониста шуд. Маросими тақдими ин ҷоизаҳо пагоҳ, санаи 14-уми апрел дар шаҳри Бишкеки Қирғизистон баргузор мешавад.
Филми ин коргардони 24-солаи тоҷик дар се бахш бо филмҳои коргардонҳои ӯзбек ва қирғиз рақобат кард. «Хоби маймун» нахустин филми комили Румӣ Шоазимов аст ва соли 2016 аз рӯи достони кӯтоҳи нависандаи инглис Уилям Ҷекобс «Панҷаи маймун» (The Monkey’s Paw) таҳия шудааст. Ин филм дар пайравӣ аз он достон ҳамон идеи қадимии «се орзуе, ки бароварда мешаванд»-ро бознамоӣ мекунад ва дар он панҷаи як маймун орзуҳоро бароварда месозад.
Нукта инҷост, ки панҷа ҳар орзуеро, ки бароварда мекунад, дар паяш арзишмандтарин доштаҳои орзукунандаро аз ӯ мегирад. Дар ин филм панҷаи маймун фарзанди қаҳрамони аслиро аз ӯ мегирад. Паёми ахлоқии ин филм ин аст, ки нишон медиҳад, гоҳе зиндагии воқеӣ басе беҳтар аз зиндагие аст, ки орзу менамоем.
Нахустнамоиши ҷаҳонии филм соли гузашта дар ҷашнвораи «Край света» дар Сахалин баргузор шуда буд. Нақшҳои асосиро ҳунарпешаҳои номии тоҷик Баҳодур Миралибеков ва Зулфия Содиқова офаридаанд.
«Оқ Илбирс» (Озодапаланг) — ҷоизаи миллии синамоии Ҷумҳурии Қирғизистон аст, ки Иттиҳодияи синамогарони Қирғизистон, Бунёди иҷтимоии «Ойтиш» ва Бунёди густариши синамои Қирғизистон барои арҷгузорӣ ва арзёбӣ аз синамогарон ва дастовардҳояшон таъсис додаанд. Барандагони ин ҷоиза тандиси озодапалангро дарёфт мекунанд.
Соли гузашта дар бахши «Беҳтарин филми Осиёи Марказӣ» филми коргардони ӯзбек Ёлқин Тӯйчиев баранда шуда буд. Ду бахши дигар имсол бори нахуст ташкил шудаанд.
Манбаъ: http://sputnik-tj.com/
Нет комментариев