Фурқатҷон 1 кило ошро дар 11 дақиқа хӯрд

0
1 705 просмотров

Иқтисодчӣ аз ноҳияи Ашт Фурқатҷон Бӯриев дар Фестивал-озмуни «Оши палав”, ки дар шаҳри Хуҷанд баргузор гардид, як килограмм ошро дар 11 дақиқа хӯрда, унвони «Ошхури беҳтарин” ва 2000 сомонӣ ҷоизаи раиси вилояти Суғдро ба даст овард.

Дар озмуни «Ошхури беҳтарин»-и ҷашнвораи «Оши палав”, ки дар Маҷмааи таърихиву фарҳангии «Қалъаи Хуҷанд”-и маркази вилояти Суғд баргузор гардид, Фурқатҷон Бӯриев, иқтисодчии ҷамоати деҳоти Ашти ноҳияи Ашт аз байни 20 довталаби ин номинатсияи озмун ғолибиятро ба даст овард ва «Ошхури беҳтарин» эълон гардид.

Шарти озмун чунин буд, ки довталаб дар вақти муайяншуда бояд назар ба ҳарифон як килограмм ошро тез хӯрад. Довталабон ҳама баробар ба хӯрдани ош оғоз мекунанд ва нафаре, ки меъдааш ғунҷоиши оши бисёртарро дорад ва ошро зудтар ҳазм мекунад, ғолибиятро ба даст меорад.

Мӯъминов Муродҷон, сармуттахассиси Бахш оид ба корҳои дин, танзими анъана ва ҷашну маросимҳои мақомоти иҷроияи ҳокимияти давлатии ноҳияи Ашт гуфт, ки барои 20 нафар довталаби «Ошхури беҳтарин»-и Фестивали оши палав барои истеъмоли як килграмм ош 20 дақиқа муқаррар карда буданд: «Довталаб аз ноҳияи Ашт, алакай дар дақиқаи 11-ум табақи ошро холӣ кард ва ҳарифонашро шикаст дод. Ӯ бо хӯрдани як килограмм оши палав дар 11 дақиқа соҳиби 2000 сомонӣ мукофотпулии раиси вилояти Суғд Абдураҳмон Қодирӣ гардид.”

Бояд гуфт, ки Фестивал-озмуни «Оши палав” бо мақсади ташвиқу тарғиби фарҳанги рӯзгордорӣ, эҳё ва рушди анъана ва суннатҳои мардумӣ ва дар доираи чорабиниҳо бахшида ба 26-солагии Истиқлолияти давлатии Ҷумҳурии Тоҷикистон баргузор гардид.

Дар баробари сокинони вилоят меҳмонон-иштирокчиёни Ҳафтаи фарҳанги Вилояти Мухтори Куҳистони Бадахшон дар вилояти Суғд низ ба макони баргузории Фестивал – озмуни “Оши палав” ташриф оварда, аз таоми омодакардаи ошпазҳои вилоят тановул намуданд. Дар ин фестивал беш аз сад нафар ошпазони моҳир аз тамоми шаҳру навоҳии вилоят ширкат варзида, дар сад дег навъҳои гуногуни палави тоҷикиро омода ва пешниҳод намуданд.

Дар доираи Фестивал – озмуни “Оши палав” инчунин озмунҳои анъанавии “Ошхури беҳтарин” ва “Дастони моҳир” гузаронида шуданд. Дар бахши “Ошхури беҳтарин” 20 нафар дӯстдорони оши палав иштирок намуданд.

Дар поёни Фестивал – озмуни “Оши палав” ғолибони озмун дар бахшҳои гуногун муайян ва бо диплому мукофотҳои пулии Мақомоти иҷроияи ҳокимияти давлатии вилояти Суғд сарфароз гардонида шуданд. Аз ҷумла, Фурқат Бӯриев аз ноҳияи Ашт дар бахши “Ошхури беҳтарин” ва Ғуфрон Обидов аз ноҳияи Ҷаббор Расулов дар бахши “Дастони моҳир” ғолиб дониста шуда, ҳар кадоме бо диплом ва ду ҳазор сомонӣ қадрдонӣ гардиданд.

Ҳамзамон, ғолибият дар бахши “Ошпази беҳтарин дар байни арӯсон” насиби намояндаи ноҳияи Спитамен, дар бахши “Ошпази беҳтарин байни домодҳо” насиби намояндаи шаҳри Хуҷанд, дар бахши “Ошпази беҳтарин байни занон” насиби намояндаи ноҳияи Зафаробод, дар бахши “Ошпази беҳтарин байни мардон” насиби намояндаи шаҳри Конибодом, дар бахши “Ошпази беҳтарин байни занҳои куҳансол” насиби намояндаи ноҳияи Куҳистони Мастчоҳ ва дар бахши “Ошпази беҳтарин байни муйсафедон” насиби намояндаи ноҳияи Бобоҷон Ғафуров гардида, ба ҳар яке аз ғолибон диплом ва 1000 сомонӣ тақдим карда шуд.

Дар бахши “Оши палави беҳтарин” намояндаи ноҳияи Ҷаббор Расулов ғолиб дониста шуда, бо диплом ва 5 ҳазор сомонӣ қадршиносӣ шуд. Ҷойи дуюми ин бахшро намояндаи шаҳри Исфара ба даст оварда, соҳиби се ҳазор сомонӣ гардид.

Намояндагони шаҳру навоҳии Мастчоҳ, Бӯстону Гулистон, Панҷакенту Айнӣ ва Деваштичу Истиқлол, Истаравшан ва Шаҳристон низ барои иштироки фаъолона дар Фестивал-озмуни “Оши палав” бо туҳфаҳои хотиравӣ қадршиносӣ карда шуданд.

Дар доираи Фестивал-озмуни “Оши палав” ҳамзамон барои кӯдакони дорои имконияти маҳдуди мактаб-интернати ёрирасони шаҳри Хуҷанд дастархони идона ороста шуд ва кӯдакон низ аз оши палав тановул намуданд.

Манбаъ: Сомонаи Тоҷикистон таймс ва Суғд ТҶ

Нет комментариев

Также рекомендуем

На автодороге Душанбе-Худжанд спасли мужчину, машину которого накрыла лавина

Спасатели Комитета по чрезвычайным ситуациям и гражданской обороне (КЧС) Таджикистана спасли жизнь мужчине, оказавшемся погребенным под снежной лавиной. Как сообщила «Авеста» начальник пресс-центра КЧС РТ ...