Гурӯҳи Арш: Дар аввал падарам зидди санъаткории ман буданд.

0
783 просмотров

Нафаре нест, ки таронаҳои рӯҳнавозу ҷоннавози гурӯҳи овозадор ва маъруфи «Арш»-ро зери лаб зам-зама накарда бошад. Гурӯҳи «Арш» бо роҳбарии Раҳматҷон Раҳматов дар шаҳри Хуҷанд соли 2001 ташкил карда шудааст. Аз ҳамон сол то инҷониб ин гурӯҳ мухлисони сершумор дораду суруду оҳангҳои қалби мардумро сароида қалбашонро таскин мебахшад. Ва мо аҳли эҷодии барномаҳои радиои «Тирози ҷавонӣ»  хостем Раҳматҷон Раҳаматовро ба меҳмонии барномаи «Ҳамроз» даъват кунем. Даъвати моро роҳбари гурӯҳи «Арш» пазируфту ба меҳмонӣ омад. Инак, фишурдаи ин сӯҳбатро пешкаши Шумо хонандагони азизу арҷманд месозем.

Нахуст салом ва Шуморо ба кошонаи худ яъне радиои «Тирози ҷавонӣ» хуш омадед мегӯем.

Раҳматҷон Раҳматов: Салом ба Шумо ва кулли мухлисону ҳаводорони барномаҳои Шумо.

Раҳматҷон Раҳматов сараввал мехостам каме дар бораи фаъолияти эҷодиатон чанд сухан мегуфтед?

Раҳматҷон Раҳматов:  Фаъолияти эҷодиамро ман аз соли 2001 оғоз намуда будам ва аз ҳамон сол то инҷониб дар ҳамин соҳа ҳастам, яъне санъаткор. Албатта, оғози фаъолияти эҷодӣ каме мушкилӣ дошт ва бо гузашти вақт ҳама мушкилиҳо бартараф шуданд.

Барои чӣ  гурӯҳи Шумо номи «Арш»-ро гирифт?

Раҳматҷон Раҳматов:  Соли аввали ташкил намудани ин гурӯҳ, яъне соли 2001 мо сарпараст доштем ва ҳамроҳ бо он нафар маслиҳат намудем, ки бояд гурӯҳи мо яке аз беҳтаринҳо бошад ва ба қуллаҳои баланди санъат бирасад, маҳз ба ҳамин хотир «Арш» номгузорӣ кардем, ки ба ҳама писанд буд.

Лутфан, атрофи суруди модаратон, ки дар ҳар як маърака зам- зама мекунед чанд ҳарф мегуфтед, зеро ин тарона барои чанд нафар писанд омадаву дар барномаҳои мо дархост ҳам мекунанд мухлисонатон?

Раҳматҷон Раҳматов:  Атрофи суруди модар ҳаминро гуфтаниам, ки ин сурудро як замон акаи Қодир, роҳбари гурӯҳи «Чеҳра» мехонданд. Он кас дар ҳамсоягии мо зиндагӣ мекунанд, як рӯз наздашон рафтам ва  гуфтам намешавад ҳамин таронаи «Модар»-ро, ки Шумо як замон сароида будед, бо ҳам дует хонем. Он кас ҳам розӣ шуданд, мо ин сурудро  бо ҳам хондем ва он писанди мухлисон гашт.

Барои чӣ Шумо бештар сурудҳои тарбиявӣ мехонед?

Раҳматҷон Раҳматов:  Ба хотири он, ки хондани чунин сурудҳо ба ман писанд аст ва ҳамзамон аз хондани ин сурудҳо сараввал худам лаззат мебарам.

20150626_145620

 

 Барои санъаткор шуданатон волидайни Шумо зид набуданд?

Раҳматҷон Раҳматов:  Бисёр саволи аҷоиб, дар оғоз вақте ки ман мехостам санъаткор шавам падарам тарафдор набуданду модарам бисёр мехостанд, ки  ман санъаткор шавам. Баъдтар падарам ҳам эҳсос карданд, ки дигар ман бидуни санъат наметавонам ва маҷбур шуданд, ки розӣ шаванд. Ҳамин тавр, бо дуои волидайни азизам ман санъаткор шудам.

Шумо дар саҳнаи эстарада худро ситора гуфта метавонед?

 Раҳматҷон Раҳматов:  (як лаҳзаи ханда) Ман худамро дар саҳнаи эстарада то ба ҳол ситора гуфта наметавонам, ба он хотир, ки баҳодиҳандаи санъати мо  ин мардум ҳастанд.

Шумо тарафдори фонограмма ҳастед?

Раҳматҷон Раҳматов:  Ба рости хуши зиёд надорам ба ҳамин чиз, зинда хондан дигар аст ва бубинед, ки дар як маърака ба таври зинда сурудхонӣ кунӣ чӣ хел қабул мекунанду ба таври фонограмма хонӣ чӣ тавр қабул мекунанд, як худатон муқоиса намоед.

Шумо ба кадом сароянда бештар пайравӣ менамоед?

Раҳматҷон Раҳматов:  Имрӯз устодони санъат хеле зиёд ҳастанд ва албатта дар аввал ҳама он нафаре, ки ба ҷодаи санъат қадам мегузорад ба як нафар пайравӣ мекунад, ман ҳам пайравӣ мекунам ба устоди раваншод ва зиндаёд Муҳаммадҷон Муҳиддинов.

Савол аз шунаванда: Мехостам дар бораи суруди «Рафтам ба ҷое, ки наояд хабари марг» маълумот медодед?

Раҳматҷон Раҳматов:  Матни ин тарона ба Бизарифа Кенҷаева тааллуқ дорад ва ҳамроҳи модарам кофта ин инсонро рафтем. Дидем, ки як нафари заиф ба синни 75 солагӣ расида буданд ва танҳо зиндагӣ мекарданду ягон кас надоштанд ва ин нафар илтимос карданд, ки ҳамин сурудро хонаму он касро якбора ба навор гирам. Ман паси омода намудани ин суруд шудам. Номбурдаро ба навор гирифтем, яъне клип омода намудем. Баъди тамошои ин клип ҳама фикр мекарданд, ки ин зан модари ман ҳастанд, аммо ин гуна нест, ин ҳамон нафаре ҳастанд, ки якаву танҳо зиндагӣ мекунанд.

Мегуфтед, ки барои омода кардани як суруд чӣ қадар вақт сарф мекунед?

Раҳматҷон Раҳматов:  Барои омода кардани як суруд вақти хеле зиёд меравад. То ин ки клип хуб барояд, мо заҳматҳои зиёд мекашем.

Дар оянда чӣ нақша доред?

Раҳматҷон Раҳматов:  Дар оянда нақшаҳои зиёд дорам. Мехоҳам ба наздикӣ дар шаҳри Хуҷанд консерт гузорам.

Саломат бошанд, тамманиёти Шумо ба мухлисонатон?

Раҳматҷон Раҳматов: Ба мухлисони азизам тамоми хушиҳоро тамманно мекунам. Бигузор ҳамеша сарбаланду комёб бошанду ба кулли мақсаду муродашон бирасанд.

Мо аҳли эҷоди барномаҳо ба Шумо қуллаҳои баланди санъатро таммано дорем.

Раҳматҷон Раҳматов:  Ташаккур, ман низ ба кулли кормандони Шумо бурдборӣ хоҳонам. Обод бошед.

 

Нет комментариев

Также рекомендуем

3D-принтер харидан имрӯз воқеъи аст

Вақте сухан дар бораи системаи 3D меравад, аксар одамонро ассотсиатсия бо  3D-айнак ба ёд меояд, ки мо зуд-зуд дар кинотеатрҳо вақти тамошои 3D—филмҳо  истифода мебарем. ...
%d такие блоггеры, как:

Сообщить об опечатке

Текст, который будет отправлен нашим редакторам: