Гусели аввалин гурӯҳи ҷавонон ба сафи Қувваҳои мусаллаҳи Ҷумҳурии Тоҷикистон

0
557 просмотров

3 октябр нахустин гурӯҳи наваскарон аз ҳисоби ҷавонони вилояти Суғд ба сафи Қувваҳои мусаллаҳи Ҷумҳурии Тоҷикистон сафарбар   шуданд.

Дар чорабиние, ки бахшида ба рӯзи даъватшавандагон дар Амфитеатри Қасри Арбоб бо ҳузури беш аз 7 ҳазор нафар ҷавонон, афсарону сарбозон ва фаъолон баргузор гардид, Раиси  вилояти Суғд Абдураҳмон Қодирӣ низ иштирок намуд.

Зимни сӯҳбат дар ҳузури ҷавонони шуҷоъу ҷасур Абдураҳмон Қодирӣ зикр кард, ки ҷавонони ватандӯсту бо нангу номуси мо бо дарки масъулият ва ҳисси ифтихори милливу хештаншиносӣ ҳамеша барои иҷрои рисолати фарзандии хеш омода ҳастанд. Вилояти Суғд аз қадимулайём бо иқдомҳои шоёни худ маълуму машҳур аст ва ҳамоиши имрӯза низ аз анъанаҳои матлубу мақбули аҷдодӣ маҳсуб меёбад.

— Имрӯз бо мақсади дастгирии ҳамаҷонибаи иқдоми гурӯҳи калони ихтиёриёни Артиши миллӣ, онҳое, ки хизмати Ватанро қарзи фарзандии хеш дониста, бо иродатмандӣ ба комиссариати ҳарбии шаҳру ноҳияҳо ҳозир шудаанд, лозим донистем маросими тантанавии гусели «Ҳазораи ихтиёриён»-ро ба сафи Қувваҳои Мусаллаҳи Ҷумҳурии Тоҷикистон бо иштироки волидони наваскарон, раисони шаҳру ноҳияҳо, роҳбарони мақомоти вилоятии ҳифзи ҳуқуқ, ташкилотҳои вилоятӣ собиқадорони меҳнат, фаъолонзанону ҷавонон, устодону донишҷӯёни мактабҳои олӣ ва ҳунаристонҳо доир намоем – зикр намуд Раиси вилоят.

Таъкид гардид, ки дар даврони Истиқлолият ҳукумати мамлакат бо назардошти вазъияти тағйирёбандаи ҷаҳони имрӯза масъалаҳои таъминоти моддии Қувваҳои Мусаллаҳи кишвар ва мустаҳкамгардонии иқтидори мудофиавии онро таҳти таваҷҷӯҳи хоса қарор додааст. Зеро, артиши миллӣ сипари тавоно ва кафили осудагиву амнияти мамлакат маҳсуб меёбад.

Раиси вилоят ҳамзамон гуфт, ки бо соҳибистиқлол гардидани Тоҷикистон адолати таърихӣ барқарор гардид ва сиёсати дурбинонаю хирадмандонаи Президенти мамлакат, Ҷаноби Олӣ, мӯҳтарам Эмомалӣ Раҳмон таърихи имрӯзу дирӯзи моро  ба ҳам пайваст намуд.

Давлату Ҳукумати Ҷумҳурии Тоҷикистон бо мақсади дар рӯҳияи эҳтиром ба арзишҳои маънавии таърихӣ тарбия намудани насли ҷавон, беҳтар намудани имкониятҳои мусоид барои ҷисману рӯҳан солим инкишоф ёфтани ҷавонон чандин барномаҳои давлатиро қабул ва мавриди амал қарор додааст.

Раиси вилоят дар идомаи суҳбат аз қаҳрамониҳои сарлашкарони майдони набарду шоҳони озодманиш Спитамену Деваштич, Муқаннаъ, Шоҳ Исмоили Сомониву Темурмалик, Восеи диловар ва қаҳрамонони зинданоми миллат ёдовар шуда, ба фарзандони арҷманди суғдзамини бостонро, ки имрӯз бо дарки масъулияти фарзандӣ ва амри дилу виҷдон хизмати Модар-Ватанро ихтиёр намудаанд, фатҳи қуллаҳои баланди мардонагиву матонатро таманно намуд.

Бо қаноатмандӣ зикр ёфт, ки имрӯз ба сафи Қувваҳои мусаллаҳи Тоҷикистон аз шаҳру ноҳияҳои вилоят беш аз 1000 нафар ҷавонон бо хоҳиши худ сафарбар мешаванд, ки аксари онҳо дорои маълумоти олӣ ва миёнаи касбӣ буда, дар миёни онҳо ҷавонони соҳибҳунар низ ҳастанд.

Чуноне иттилоъ дода шуд, дар нахустин рӯзи даъват дар ноҳияи Кӯҳистони Мастчоҳ ва шаҳри Истиқлол нақшаи даъват ба иҷро расида, дар як қатор шаҳру ноҳияҳо дар нахустин рӯз то беш аз 90 дарсади нақша иҷро гардидааст. Раиси вилоят бо ситоиш аз ҷасорату мардонагии ҳомиёни Ватан пеш аз ҳама ба падару модарон ва устодони ин ҷавонон барои тарбияи дурусти фарзандон изҳори миннатдорӣ баён намуд.

Гуфта шуд, ки беҳтар намудани фаъолияти қисмҳои низомӣ, шароити хизмати аскарон дар онҳо пайваста дар мадди назари Президенти мамлакат, Сарфармондеҳи Қувваҳои мусаллаҳи Тоҷикистон, Ҷаноби Олӣ, мӯҳтарам Эмомалӣ Раҳмон қарор дорад. Имрӯзҳо дар ҳамаи ҷузъу томҳои Артиши миллӣ шароити муносиби ҷавобгӯ ба талаботҳои ҷаҳони муосир барои хизмати ҷавонон муҳайё гардидаанд. Дар қисмҳои ҳарбӣ барои баланд бардоштани сатҳи маърифати ҷавонон барномаҳои гуногуни адабию таълимӣ ба роҳ монда шуда, ҷавонон баробари ба ҷо овардани хизмати ҳарбӣ аз донишҳои замони муосир низ баҳраёб мегарданд. Аскарони фаъол бо ифтихорнома ва мукофотҳои давлатӣ сарфароз ва бо унвонҳои ҳарбӣ мушарраф гардонида мешаванд.

Дар чорабинии мутантан бо ҳузури даъватшавандагон ва модарони онҳо анъанаи мардумии “нонгазон” низ сурат гирифт.

Сипас барои иштирокчиёни ҳамоиши мутантан бо ҳузури санъаткорони номии вилоят барномаи фарҳангӣ пешниҳод карда шуд. Пас аз итмоми ин барнома даъватшавандагон аз Амфитетари Қасри Арбоб ба маркази ноҳияи Бобоҷон Ғафуров омаданд. Дар шаҳраки Ғафуров барои даъватшавандагон ва волидони онҳо, дар маҷмӯъ барои 4000 нафар дастархони идона ороста шуда, барномаи фарҳангӣ низ манзур карда шуд.

Пас аз анҷоми барномаи фарҳангӣ даъватшавандагон бо рӯҳияи болида озими ҷануби кишвар шуданд.

Дар ин бора аз Хадамоти матбуоти Раиси вилояти Суғд хабар доданд

Нет комментариев

Также рекомендуем

Маблағи рекорди барои Килиан Мбаппе

Ҳамлагари ҷавони тими “Монако” Килиан Мбаппе эҳтимол аст, ки дар кӯтоҳтарин муддат дастаи “Монако”-ро ба бошгоҳи шоҳонаи “Реал Мадрид” иваз намояд. Дастаи Реал Мадрид аллакай ...