Аз 12 то 17 июни соли равон дар шаҳри Освего, Ню-Йорки ИМА Олимпиадаи байналмилалии илмии мактабҳои миёна оид ба масъалаҳои муҳит «GENIUS-2017» баргузор гардид, ки дар он аз Ҷумҳурии Тоҷикистон 6 нафар хонандагон иштирок намуда, соҳиби 2 медали тилло ва 4 медали биринҷӣ гардиданд. Дар олимпиада хонандагон аз 73 давлати дунё бо пешниҳоди 791 лоиҳа иштирок карданд. Дар ҷамъбаст бо гирифтани 6 ҷойи ифтихорӣ Парчами Тоҷикистон дар арсаи ҷаҳон баланд бардошта шуд. Маҳинаи Муҳаммад, Сабрина Давлатова аз Муассисаи давлатии таълимии Мактаби байналмилалии президентӣ дар шаҳри Душанбе сазовори ҷойи якум, Анварҷон Раҳимов, Дилшодҷон Абдураҳимов аз Муассисаи давлатии таълимии Литсей-интернати президентӣ барои кўдакони болаёқати Ҷумҳурии Тоҷикистон ва Акбарҷон Ҳақдодов, Сомон Гулаҳмадов аз Мактаби байналмилалии шаҳри Душанбе сазовори ҷойҳои сеюм гардиданд. Бояд зикр кард, ки аз аввали соли 2017 хонандагони тоҷик дар 10 олимпиадаҳои байналмилалӣ иштирок намуда, сазовори 87 медал (14 медали тилло, 33 медали нуқра, 40 медали биринҷӣ) гардидаанд.
Манбаъ: www.khovar.tj
Нет комментариев