Тибқи дастуру супоришҳои Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон ва нишондодҳои Раиси вилояти Суғд Раҷаббой Аҳмадзода дар рӯзҳои таҷлили ҷашни наврӯзи байналмилал муовини Раиси вилояти Суғд Анвар Яъқубӣ ва Раиси шаҳри Хуҷанд Маъруф Муҳаммадзода ба манзили якчанд нафар собиқадори арсаи сиёсат, иқтисодиёт, иҷтимоиёт ва ғайра рафта, эшонро табрик намуданд.
Зимни мулоқоти самимӣ бо Шоири халқии Тоҷикистон Фарзона, Шаҳрвандони фахрии шаҳри Хуҷанд Биҳоҷал Раҳимова, Сайрам Исоева, Мукаррамахон Бузуркова, иштирокчии Иҷлосияи 16-уми Шӯрои Олии Ҷумҳурии Тоҷикистон Бойпоччо Фатҳиддинов, собиқадори меҳнати соҳаи саноат Муборак Неъматова, собиқадори меҳнати соҳаи хизмати давлатӣ Дадоҷон Музаффаров ва дигарон таъкид шуд, ки мардуми шарафманди вилоят ифтихор аз он доранд, ки маҳз ташаббусҳои шоистаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ойину ҷашнҳои миллӣ ва арзишҳои фарҳангие, ки ваҳдату ягонагии маънавии мардумро таҳким мебахшанд, ба Феҳристи мероси Созмони Милали Муттаҳид ворид гардида, бо шукуҳу шаҳомати хоса таҷлил мегарданд. Пазироии ҷашнҳои миллии мо, аз ҷумла Наврӯз, аз ҷониби ин созмони бонуфузи ҷаҳонӣ шаҳодати он аст, ки мардуми фарҳангофару бунёдкори мо ҳамеша дар саргаҳи тамаддуни башарӣ қарор дошт. Ин нукта дар Паёми имсолаи Пешвои муаззами миллат чунин зикр гардидааст: “Дар даврони истиқлолияти давлатӣ ойину ҷашнҳои миллӣ ва арзишҳои фарҳангие, ки дар давоми асрҳо ягонагии мардумро ҳифз мекарданд, аз қабили Наврӯз, Меҳргон, Сада, Шашмақом, Фалак, атласу адрас, чакан ва монанди инҳо эҳё гардиданд. Аз ҷониби ҷомеаи ҷаҳонӣ эътироф гардидани мероси таърихиву фарҳангии мо дар айни замон эътирофи тоҷикон ҳамчун миллати тамаддунсозу фарҳангӣ мебошад.
Аёдатшудагон аз ин иқдоми шоиста ва инсонпарварона миннатдорӣ баён намуда, аз заҳматҳои шабонарӯзии Роҳбари Давлат муҳтарам Эмомалӣ Раҳмон ёдоварӣ карда, шукронаи нозу неъмат ва амну осиштагии кишварро намуданд.
Манбаъ: Дафтари матбуоти Раиси шаҳри Хуҷанд
Нет комментариев