Хуҷанд: таъмиру таҷдиди Маҷмааи Шоҳ Исмоили Сомонӣ

0
327 просмотров

Ба муносибати 30 солагии Истиқлолияти давлатии Ҷумҳурии Тоҷикистон ва эълон гардидани 1300 рӯзи созандагию бунёдкорӣ дар шаҳри Хуҷанд корҳои созандагию ободкорӣ ҷараёни тоза мегирад.
Бо иқдоми роҳбарияти шаҳри Хуҷанд бо гузашти зиёда аз 7 сол бори аввал майдони ҳудуди Маҷмааи Шоҳ Исмоили Сомонии шаҳр таъмиру таҷдид шуда истодааст.
Дар ин майдон аз ҷониби пудратчиёни ҶДММ «Юсуф2016» корҳои таъмиру азнавсозии пайроҳа ва сафолаку мармари зинапояҳои маҷмаа, ки кӯҳнаву фарсуда шудаанд, мавриди азнавсозӣ қарор гирифтааст.Таъмиру таҷдид ва азнавсозии ноқилҳои чароғи фаввораҳои Маҷмаа аз ҷониби муассисаи «Чароғонкунӣ»-и шаҳр бомаром идома дорад.
Корҳо ибтидои моҳи феврал оғоз гирифта, интизор меравад, ки даҳаи аввали моҳи марти соли равон анҷом пазирад. Ва то мавсими истироҳату фароғати шаҳрвандон баистифода дода мавриди баҳрабардорӣ қарор мегирад.
Ёдовар мешавем, ки ҳанӯз 6-уми августи соли 2011 аз ҷониби Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон ба истиқболи солгарди 20 – уми истиқлоли давлатии Тоҷикистон пайкараи бошукўҳи асосгузори давлати бузурги тоҷикон Исмоили Сомонӣ ифтитоҳ ёфт.
Дар суханронии табрикии Сарвари давлат Эмомалӣ Раҳмон, аз ҷумла зикр гардид, ки пайкараи Исмоили Сомонӣ ва ороишоти атрофи он дар зарфи як соли охир аз ҷониби ширкатҳои меъморию сохтмонии ватанӣ бунёд ёфтааст.
Ин пайкараи зебо офаридаи ҳайкалтарош ва гудозгари бадеӣ Мансур ҳоҷибоев буда, аз металли ранга сохта шудааст. Баландии худи пайкара 13 метр ва бо таҳкурсиаш 27 метр мебошад.
Нишони дасти Исмоили Сомонӣ ва тоҷи сараш бо оби тилло рўпўш гардидааст.
Маълумоти деворнигораҳои ду паҳлўи зинапояҳо ва 4 паҳлўи таҳкурсии пайкара аз ташкилёбӣ ва таърихи давлати Сомониён мухтасар ҳикоят мекунанд.
Дар атрофи пайкараи Исмоили Сомонӣ 5 фаввораи гуногун бо ҳамсадоии мусиқии форам кор мекунад.
Чароғҳои рангоранги рўшноидиҳанда, зинапояҳои зебо ва сабзаю кабудизор аз ҷумлаи ороишоти атрофи пайкара мебошанд.
Дар майдони назди пайкараи навбунёди Исмоили Сомонӣ, ки ба мавзеи зебою дилкаши сайру тамошо табдил ёфтааст, ба истиқболи 20 – умин солгарди истиқлоли давлатии Тоҷикистон ва ифтитоҳи ин макони ифтихорафзо базму тараби бошукўҳи идона ороста шуд.

Манбаъ: Дафтари матбуоти Раиси шаҳри Хуҷанд

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: