Дар қитъаҳои Ким-Кучкак, даромадгоҳи шаҳри Исфара ва минтақаи Деҳмой-Пролетар корҳои таҷдиду навсозии роҳи мошингарди Исфара-Конибодом-Ҷаббор Расулов мувофиқи нақша пеш рафта истодааст.
Мутахассисону роҳсозон бо истифода аз обу ҳавои мусоид ва шароитҳои фароҳамовардашуда машғули корҳои роҳсозӣ мебошанд. Бояд хотиррасон шуд, ки дар назди дарвозаи рамзии ноҳияи Ҷаббор Расулов ба корҳои таҷдиду азнавсозии роҳи мошингарди Исфара-Конибодом-Ҷаббор Расулов дар охирҳои моҳи май оғоз бахшида шуда буд. Дар ин мавзеъ бо ҷалби роҳсозон ва техникаи зарурӣ ба корҳои кандани қабати болоии роҳ, тахту ҳамворкунӣ ва кашонидани асфалти куҳна кор ҷараён дошт. Бо гузашти 3 моҳ дар минтақаи “Деҳмой — Пролетар” наздик 4 километр таҳкурсии роҳ омода карда шуда, омодасозии боқимонда таҳкурсии роҳ бомаром идома дорад.
Зимнан, маблағи умумии корҳои таъмиру сохтмон дар марҳилаи аввали «Лоиҳаи таҷдиди қитъаҳои роҳи автомобилгарди Хуҷанд-Исфара» 45 миллион доллари амрикоиро ташкил мекунад. Аз ин маблағ 38 миллиону 250 ҳазор долларро қарз ва 6 миллиону 70 ҳазори дигарро бошад, гранти Бонки умумиҷаҳонӣ ташкил медиҳад. Фармоишгари лоиҳа Вазорати нақлиёти Ҷумҳурии Тоҷикистон ва пудратчӣ ширкати чинии “Чайна Рейлвей группкорпорейшн” мебошад.
Нет комментариев