Барои дӯстдорони варзиш дар дохили боғи фарҳанг ва истироҳати шаҳри Конибодом ду майдончаи сунъии варзишӣ барои бозиҳои футбол бо фарогирии тамоми шароит ва 800 ҷои нишаст ба истифода дода шуд.
Раиси шаҳр Ғайбулло Боҳирӣ барои ин иқдоми наҷиб ва ташаббуси нек ба Федератсияи футболи ҷумҳурӣ арзи сипос намуда, зикр кард, ки ақли солим дар тани солим буда, машғул шудан ба варзиш кафили солимии рӯҳу тан аст ва бо бунёди чунин майдонҳои варзишӣ ба ҷавонону наврасон роҳ кушода, ба онҳо имкониятҳои бештар дода мешавад.
Ноиби президенти Федератсияи футболи ҷумҳурӣ Дилшод Ҷӯраев изҳори умед кард, ки минбаъд ҷавонону наврасони шаҳр дар ин майдонҳои нав тамрин гузаронида, дастаи футболи шаҳр боз ҳам пешсаф мегардад ва кишварамонро дар арсаи ҷаҳонӣ муаррифӣ хоҳад кард.
Ёдовар мешавем, ки бунёди майдонҳои варзишии мазкур моҳи феврали соли равон оғоз шуда, бо маблағгузориву таваҷҷуҳи махсуси Федератсияи футболи ҷумҳурӣ ва дастгирии роҳбарияти шаҳр дар муддати кӯтоҳ сохтмони он анҷом ёфта, ба истифода дода шуд.
Ба истифода додани майдонҳои варзишӣ ба ифтихори ҷашни 25-солагии Истиқлолияти давлатии кишвар туҳфаи арзанда буда, бунёди чунин варзишгоҳҳо ба рушди варзиш, ҷалби ҷавонон ба ин соҳа, зиёд намудани шавқи онҳо ба намудҳои гуногуни варзишӣ ва пешгирии шомилшавии насли ҷавон ба ҳар гуна ҳизбу ҳаракатҳои ифротӣ мусоидат мекунад.
Манбаъ: http://khovar.tj/
Нет комментариев